ەلباسىمىزدىڭ « ۇلى دالانىڭ جەتى قىرى» اتتى ماقالاسى قوعامعا ۇلكەن وي سالدى. سانانى ءدۇر سىلكىندىرىپ, رۋحتى وياتاتىن ويلار مەن باستامالار كوتەرىلگەن ەكەن. رەجيسسەر رەتىندە ماعان «تاريحتىڭ كينو ونەرى مەن تەلەۆيزياداعى كورىنىسى» اتتى ءبولىمى ەرەكشە اسەر ەتتى.
ماقالادا «ۇلت قاھارماندارىن ۇلگى تۇتۋ ءۇردىسىن قالىپتاستىرۋعا جول اشاتىن ساپالى بالالار فيلمدەرى مەن مۋلتيپليكاتسيالىق سەريالداردى اسا قاجەت ەتەتىن وسكەلەڭ ۇرپاقتىڭ دا تالعامىنا ەرەكشە نازار اۋدارۋ كەرەك» دەلىنگەن.
مەنىڭشە, بۇل – وتە ماڭىزدى ءارى جاۋاپتى ءىس. ۇرپاق ساناسىنا ۇلى تۇلعالارىمىزدى, تاريحىمىزدى ءسىڭىرۋ ارقىلى وتانشىل ازاماتتار تاربيەلەي الامىز. تۇركىستان وبلىسىنداعى «وڭتۇستىكفيلم» مەكەمەسى مەن «ساق» كينوستۋدياسىنىڭ دا كوزدەگەنى – وسى. بۇعان دەيىن ءبىزدىڭ شىعارماشىلىق توپ ازىرلەگەن فيلمدەر مەن مۋلتفيلمدەر كورەرمەن تاراپىنان جوعارى باعالاندى. ەلباسىمىزدىڭ وسى ماقالاسىنان كەيىن ءبىز شىعارماشىلىق ىزدەنىستى ەكى ەسە ارتتىرىپ, بۇدان دا بيىك ماقساتتاردى كوزدەيتىن بولامىز. داڭقتى باتىرلارىمىز بەن ۇلت قاھارماندارىن كينو جانە انيماتسيالىق فيلم ارقىلى دارىپتەۋدى جالعاستىرامىز.
باتىرحان داۋرەنبەكوۆ,
«وڭتۇستىكفيلم» كوممۋنالدىق مەملەكەتتىك مەكەمەسىنىڭ ديرەكتورى
