كورمەگە سۋرەتشىنىڭ پەيزاج جانرىنداعى 75-كە جۋىق تۋىندىسى قويىلدى. سەرىكجان ىسقاقبەك ۇلىنىڭ ناتۋراسىنداعى پەيزاجدىق ەتيۋدتارىنا ادام مەن تابيعاتتىڭ اجىراماس بىرلىگى ارقاۋ ەتىلگەن. اسىرەسە كەسكىندەمەشى نازارىنا كوك اسپان مەن اسقارالى شىڭ بيىكتەرى كوبىرەك ىلىككەنىن بايقار ەدىڭىز.
– مەنىڭ شىعارمالارىمدا كەڭ-بايتاق دالامىزدىڭ دارحاندىعى مەن كەڭدىگىن جىرلاعان تابيعات كورىنىستەرى باسىم كەلەدى. ويتكەنى ءوزىم اۋىلدا تۋىپ-وسكەن سوڭ با, اسقار تاۋلار مەن بيىك شىڭداردى سالۋعا ەرەكشە قۇشتارمىن, – دەيدى سۋرەتشىنىڭ ءوزى.
جالپى پەيزاجدىڭ دەربەس جانر رەتىندە قىتايدا XV عاسىردا پايدا بولعاندىعى ايتىلادى. اقىندىق شابىت باسىم كەلەتىن قىتاي سۋرەتشىلەرىنىڭ كەسكىندەمەسىندەگى كەڭىستىك مۇنارتقان تۇمانمەن ۇلاسىپ جاتاتىن شەكسىزدىككە نەگىزدەلەدى. ال سەرىكجاننىڭ كەسكىندەمەلىك تۋىندىلارىنداعى شەكسىزدىككە بالاناتىن اسپان بىردە انە-مىنە جاۋارداي بولىپ تۇنەرىپ توبەڭنەن تونسە, بىردە ۇشى-قيىرى جوق كوكجيەكپەن موماقان استاسىپ جاتادى. سۋرەتشىنىڭ سەزىمى, كوڭىل كۇيى, تابيعاتقا دەگەن كوزقاراسى ايرىقشا كورىنەتىن «بوياۋعا سىڭگەن بوزدالا», «ىستىقكول», «ۇشقوز اۋىلى», «قارا جون», «لاپاس ءۇي» كارتينالارى سۋرەتشى شىعارماشىلىعىنداعى شوقتىعى بيىك تۋىندىلار. «لاپاس ءۇي» تۋىندىسىندا ويناقى جىلى تۇستەردىڭ ءوزارا بايلانىسى مامىراجاي كوڭىل كۇي تۋدىرادى. كومپوزيتسيا قۇرىلىمى ورتالىق بولىككە نەگىزدەلىپ, ايقارا اشىق جاتقان ەسىكتەن بىردەن ىشكە كوزىڭىز تۇسەدى. مۇرنىڭىزعا قىشقىلتىم قۇرت ءيىسى كەلگەندەي مە, الدە قازان-وشاقتىڭ ماڭىندا ۇزاقتى كۇن كۇيبەڭدەپ اپاڭىز جۇرگەندەي مە, ايتەۋىر ءدال بالا كۇنگىدەي قامسىز قاراپ تۇرعانداي بولاسىڭ.
– پەيزاج قانداي دا ءبىر جەردى اينىتپاي بەينەلەي سالۋ ەمەس, وندا سۋرەتشىنىڭ ىشكى تولعانىسىن بەرۋدىڭ تاماشا مۇمكىندىگى جاتىر. تابيعات وتە قۇبىلمالى, سول ءساتتى ۇستاپ قالۋ ءۇشىن بارىڭدى سالىپ, ىستىققا كۇيىپ, سۋىققا توڭاسىڭ. ال سالعان سۋرەتىڭ تاماشا شىعىپ جاتسا بارلىق قيىندىقتى ۇمىتىپ, كوڭىلىڭىز جادىراپ كەتەدى. بۇل رەتتە ىستىقكولگە ساپار كەزىندە سالىنعان كومپوزيتسيالارىمدى ەرەكشە ايتار ەدىم, – دەيدى سەرىكجان.
1978 جىلى قىتايدىڭ ىلە-قازاق اۆتونوميالى وبلىسىنا قارايتىن كەڭسۋ اۋىلىندا تۋعان سەرىكجان شىڭجاڭ كوركەمونەر اكادەمياسىنىڭ سۋرەت فاكۋلتەتىندە وقىعان. «ىمىرت» اتتى جۇمىسى قىتاي ۇلتتىق مۋزەيىنىڭ «التىن قورىنا» ساقتالعان.
ايا ءومىرتاي,
«ەگەمەن قازاقستان»
