ەلباسىمىز قوعام تاراپىنان زور سەرپىلىس تۋدىرعان « ۇلى دالانىڭ جەتى قىرى» اتتى باعدارلامالىق ماقالاسىندا ۇلى دالانىڭ ۇلى ەسىمدەرىن ۇلىقتاۋدى جانە ورتاق فولكلورلىق مۇرالاردى زەرتتەۋدى ايرىقشا تاپسىرعان ەدى. اتالعان ماقالا كەڭىنەن تالقىلانىپ جاتقاندا الىستان اقجولتاي جاڭالىق جەتتى. التايدان تاراعان تۇگەل تۇركىنىڭ كيەسى, قوبىزدىڭ يەسى, ورتاق ميف پەن فولكلوردىڭ اتاسى سانالاتىن قورقىت اتا مۇراسى ادامزات تاريحىندا ايرىقشا ءىز قالدىرعان قۇبىلىس رەتىندە يۋنەسكو-نىڭ ماتەريالدىق ەمەس مادەني مۇرالار تىزىمىنە ەندى.
بىلتىر ناۋرىز ايىندا قازاقستاننىڭ باستاماشىلىعىمەن جانە باۋىرلاس تۇركيا, ازەربايجان مەملەكەتتەرىنىڭ قولداۋىمەن ۇيىمنىڭ قاراۋىنا الىنعان بۇل جۇمىس وسىلايشا يگى ناتيجەمەن اياقتالدى. «قورقىت اتا مۇراسى: داستان, اڭىز جانە مۋزىكا» دەگەن اتاۋمەن ەنگىزىلگەن قۇجات ماۆريكي رەسپۋبليكاسىنىڭ استاناسى پورت-لۋيستە وتكەن يۋنەسكو-نىڭ ماتەريالدىق ەمەس مادەني مۇرالاردى قورعاۋ جونىندەگى كوميتەتىنىڭ 13-ۇكىمەتارالىق وتىرىسىندا ماقۇلدانىپ, ءتيىستى شەشىم قابىلداندى.
بارشا حالقىمىزعا قۇتتى بولسىن!
