قاپشاعاي جاعالاۋىنا دەمالۋعا بارعان جۇرت وسى اۋماقتاعى كۇننىڭ ساۋلەسى نۇرلى, قىزۋى مول ەكەنىن بىلسە كەرەك. «Universal energy CO» كومپانياسىنىڭ قۋاتتى كۇن باتەرەيالارى ءدال وسى دەمالىس ايماعىنا جاقىن جەرگە, شەڭگەلدى اۋىلىنىڭ ماڭىنا ورنالاسپاق. 400 گەكتار جەردى الىپ جاتقان اۋماققا كۇننەن قۋات وندىرەتىن پانەلدەر قويىلىپ جاتىر. قۇرىلىس جۇمىسىنا 500 ادام جۇمىلدىرىلعان ەكەن. ولار گەرمانيادا وندىرىلگەن قۋات جيناۋشى پانەلدەردى ورناتۋدا. ستانسا تولىق ىسكە قوسىلعان كەزدە 26 ادام تۇراقتى جۇمىس ورنىمەن قامتىلاتىن بولادى.
بالامالى ەنەرگيا كوزىن جينايتىن ستانسانىڭ العاشقى كەزەڭى جىل سوڭىنا دەيىن پايدالاۋعا بەرىلمەك. ماماندار سالىنىپ جاتقان كۇن ەلەكتر ستانساسىنىڭ قۋات ءوندىرۋ كۇشى كەلەسى جىلدىڭ ءبىرىنشى توقسانىنا دەيىن 100 مۆت ەنەرگيا بەرۋگە جەتەتىنىن ايتۋدا. ستانسانىڭ تولىق ىسكە قوسىلۋىمەن بۇل كورسەتكىش تاعى دا 50 مۆت ەنەرگياعا كوبەيمەك. وندىرىلگەن قۋات كوزى ايماقتاعى ەلەكتر ەنەرگياسىنا دەگەن سۇرانىستى قامتاماسىز ەتۋگە باعىتتالماقشى.
ايتپاقشى, بۇل ستانسا قۇرىلىسىنىڭ نەگىزگى قۇرىلتايشىسى – قىتايلىق «CHINT Group» كومپانياسى. شانحاي قالاسىندا ورنالاسقان كومپانيا الەم بويىنشا ەلەكتر قۇرىلعىلارىن شىعارۋشى رەتىندە تانىمال. بۇگىنگە دەيىن رەسەي, اقش, كانادا, اۋستراليا, گونكونگ, سينگاپۋر سياقتى الەمنىڭ دامىعان 11 ەلى وسى كومپانيانىڭ قىزمەتىنە جۇگىنگەن ەكەن. قاپشاعاي ماڭىندا سالىنىپ جاتقان كۇن ەنەرگياسى ستانساسى تمد ەلدەرى اراسىندا العاش سالىنۋدا. ءارى بۇل جوبا «CHINT Group» كومپانياسى تاراپىنان قازاقستان نارىعىنا قۇيىلعان قوماقتى ينۆەستيتسيا بولىپ وتىر.
قاپشاعاي جازىعىندا بوي كوتەرگەن كۇن ەلەكتر ستانساسى ايماقتاعى «جاسىل» ەنەرگيا ءوندىرۋ ىسىنە دە سەرپىن بەرەدى دەيدى ماماندار. بۇل «بولاشاقتىڭ ەنەرگياسى» اتاۋىمەن ەكسپو كورمەسىن وتكىزىپ, الەمدى قالپىنا كەلەتىن ەنەرگيا كوزدەرىن دامىتۋعا ۇندەپ وتىرعان ەلىمىزدىڭ باستى ۇستانىمى ەكەنىن ايگىلەيدى. ونىڭ ۇستىنە كۇن قۋاتىن وندىرەتىن پانەلدەردىڭ كوبەيۋى وڭىردەگى ەلەكتر ەنەرگياسىنا دەگەن سۇرانىستى ازايتۋعا باستاماقشى. قازىر الماتى وبلىسىنىڭ ەنەرگەتيكالىق مۇمكىندىگى ىشكى قۋات نارىعىنداعى سۇرانىستىڭ 60 پايىزىن عانا ورىنداۋعا مۇمكىندىك بەرەدى. قالعان قاجەتتىلىك جامبىل وبلىسى مەن قىرعىز ەلىنەن ساتىپ الىنۋدا.
وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسى باسشىسىنىڭ ورىنباسارى نۇرلان شاياحمەتوۆتىڭ ايتۋىنشا, وڭىردە «جاسىل» ەنەرگيا باعدارلاماسىن جۇزەگە اسىرۋ اياسىندا 2025 جىلعا دەيىن بالامالى قۋات كوزىن وندىرەتىن 25 نىسان سالىنىپ, پايدالانۋعا بەرىلەدى ەكەن. بۇل – جەتىسۋ ولكەسىندەگى ەنەرگەتيكالىق سۇرانىستى وتەۋگە ءارى تابيعاتتى قورعاۋعا باعىتتالعان ماڭىزدى قادام.
− بالامالى قۋات كوزىن ءوندىرۋ بويىنشا قاپشاعاي ماڭىنداعى كۇن ەلەكتر ستانساسىنىڭ قۇرىلىسىنان بولەك, الاكول اۋدانىنداعى جوڭعار قاقپاسى اۋماعىندا جەل ەنەرگياسىن يگەرۋ جۇمىستارى قارقىن الدى. بۇل – ناعىز بولاشاقتىڭ ەنەرگياسى, جەمىسىن دە الداعى ۋاقىتتا كورەتىن بولامىز. قازىر وبلىس بويىنشا وندىرىلەتىن ەنەرگيا كوزى 2 ملرد كيلوۆاتت/ساعات بولسا, ونىڭ قالپىنا كەلەتىن رەسۋرستاردان الىناتىنى 38 پايىز شاماسىندا. جوبا جۇزەگە اسقاننان كەيىن بۇل كورسەتكىش ءوسىپ, «جاسىل» ەنەرگيا ءوندىرۋ دە ارتا تۇسەدى دەگەن سەنىم بار, − دەيدى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسى باسشىسىنىڭ ورىنباسارى نۇرلان شاياحمەتوۆ.
قالماحانبەت مۇقامەتقالي,
«ەگەمەن قازاقستان»
الماتى وبلىسى
