ۇلتتىق ءداستۇرىمىزدى ساقتاۋعا جانە «ماڭگىلىك ەل» پاتريوتتىق يدەياسىنىڭ نەگىزىندە جەكە تۇلعانى رۋحاني تۇرعىدان دامىتۋعا باعىتتالعان ايتۋلى مادەني شارا قازاقستان رەسپۋبليكاسىنىڭ تۇڭعىش پرەزيدەنتى كۇنىنە ارنالىپ وتكىزىلدى.
ونەرلى ورەندەر اراسىندا جىل سايىن وتكىزىلەتىن مەرەيلى مۋزىكا بايقاۋىنىڭ نەگىزگى ماقساتى – جەكە تۇلعانى قالىپتاستىرۋداعى اسا باي رەسۋرس رەتىندە ءان شىعارماشىلىعىنىڭ ماڭىزدىلىعىن ارتتىرۋ, مۋزىكا ونەرىنىڭ ءتۇرلى جانرلارىندا جاس دارىندى ورىنداۋشىلاردى انىقتاۋ جانە قولداۋ سەكىلدى مازمۇندى ءھام ماڭىزدى مۇراتتارمەن استاسادى.
– كەڭ دالانىڭ قاسيەتى مەن قۇدىرەتى بولار, قازاق ەلى – وتە تالانتتى حالىق. ونىڭ ايقىن ايعاعى – ەلباسىمىزدىڭ انشىلىك پەن سازگەرلىك قىرى. جاڭا عانا ەكراننان كورسەتىلگەن پرەزيدەنتىمىزدىڭ ورىنداۋىنداعى ءاندى تىڭداپ وتىرىپ تاڭعالدىم. كاسىبي مۋزىكانت رەتىندە ءبىر فالش نوتا ەستىگەن جوقپىن. بۇل دا بولسا قازاقتىڭ قانىنا سىڭگەن ايرىقشا قاسيەتتەرىنىڭ ءبىرى.
وزدەرىڭىز بىلەتىندەي, وتكەن جىلى تۇساۋى كەسىلگەن جوبا بيىل مىنە, جالعاسىن تاۋىپ, ساپالىق تۇرعىدان جاڭا دەڭگەيگە كوتەرىلگەنىنە كۋا بولىپ قۋانىپ وتىرمىن. جاس جەتكىنشەكتەرىمىزدىڭ تالانتىن تانىپ, بولاشاعىنا باعىت سىلتەۋگە سەپتەسەتىن مۇنداي اۋقىمدى ءان بايقاۋلارى بىزگە وتە قاجەت. الداعى ۋاقىتتا كونكۋرس ءوزىنىڭ گەوگرافيالىق اۋقىمىن كەڭەيتىپ, حالىقارالىق دەڭگەيدە وتكىزىلەدى دەپ سەنەمىن جانە ول باستامانى قۋانا قولدايمىن. ۇلتتىق مۋزىكامىز ارقىلى الەم قازاقتى تانىپ جاتسا, بۇل – ءبىز ءۇشىن ۇلكەن مارتەبە, دەدى قازىلار القاسىنىڭ توراعاسى, بەلگىلى كومپوزيتور, قازاقستاننىڭ ەڭبەك سىڭىرگەن قايراتكەرى كەڭەس دۇيسەكەەۆ.
وسىمەن ەكىنشى مارتە وتكىزىلىپ وتىرعان بايقاۋعا بيىل ەلىمىزدىڭ تۇكپىر-تۇكپىرىنەن بارلىعى 150 ءوتىنىم كەلىپ تۇسكەن. جاس ەرەكشەلىكتەرىنە ساي 12 مەن 14 جاس جانە 15 پەن 17 جاس ارالىعىنداعى ەكى توپقا ىرىكتەلىپ الىنعان ۇمىتكەرلەر ەلباسى شىعارماشىلىعىنان تاڭدالعان ۇزدىك اندەردى ورىندادى. جاس ونەرپازدار ىزدەنىسىن كومپوزيتور, قازاقستاننىڭ ەڭبەك سىڭىرگەن قايراتكەرى, قازاق ۇلتتىق ونەر ۋنيۆەرسيتەتىنىڭ «مۋزىكاتانۋ جانە كومپوزيتسيا» كافەدراسىنىڭ پروفەسسورى كەڭەس دۇيسەكەەۆ توراعالىق ەتكەن قازىلار القاسى ساراپقا سالىپ, جۇزدەن جۇيرىك, مىڭنان تۇلپار شىققان دارىندى بالالاردى ارنايى ديپلومدارمەن ماراپاتتاپ, جەڭىمپازدارعا مۋزىكالىق اسپاپ الۋعا ارنالعان سەرتيفيكاتتار تابىس ەتىلدى.
بايقاۋ قورىتىندىسى بويىنشا, «بابامنان قالعان كەڭ دالا» نوميناتسياسىندا پاۆلودار قالاسىنىڭ اقسۋ قالاسىنان كەلگەن «مەرەي» توبى توپ جارسا, ء«بىزدىڭ سۇيىكتى پرەزيدەنتىمىزدىڭ اندەرى تولقىنى» اتالىمىنداعى ارنايى جۇلدەنى ءاليا ابدىقادىر (الماتى قالاسى), ءنازيرا يبراگيموۆا (ساتپاەۆ قالاسى) جانە «جۇلدىزاي» توبى (استانا قالاسى) تەڭدەي ءبولىستى. «قاسيەتتى دومبىرا» نوميناتسياسى ورالدىق جاسمينا پالات, اينار مۋسينا, سابينا جۇماگەلدينوۆا ەسىمدى ونەرپازداردان قۇرالعان تريو مەن استانالىق بەيبارىس بايبورىنوۆكە تابىس ەتىلدى. ال بايقاۋدىڭ باس جۇلدەسى – گران-پري سىيلىعىن ن.ءا.نازارباەۆتىڭ «گورود موي» ءانىن جوعارى دەڭگەيدە ورىنداپ شىققان تالانتتى قاتىسۋشى استانا قالاسىنداعى №66 مەكتەپ-ليتسەيىنىڭ 11-سىنىپ وقۋشىسى انەل ورازباەۆا جەڭىپ الدى.
نازەركە جۇماباي,
«ەگەمەن قازاقستان»
