باتىس قازاقستان وبلىسى اكىمىنىڭ ورىنباسارى ميرجان ساتقانوۆتىڭ قۇتتىقتاۋ سوزىمەن اشىلعان كونفەرەنتسيادا اكادەميك قاجىم جۇماليەۆتىڭ قازاق اۋىز ادەبيەتى, ادەبيەت تاريحى, ادەبيەت سىنى, ادەبيەت تەورياسى سالاسىنداعى زەرتتەۋلەرى جانە ونىڭ بۇگىنگى كۇنمەن ساباقتاستىعى, جالپى ەلىمىزدەگى فيلولوگيالىق ءبىلىم بەرۋ: قازاق, ورىس, اعىلشىن ءتىلى مەن ادەبيەتى ماسەلەلەرى, باستاۋىشتا جانە مەكتەپكە دەيىنگى وقىتۋ مەن تاربيەلەۋدەگى جاس ەرەكشەلىك ماسەلەلەرى سەكىلدى كوپتەگەن ماڭىزدى تاقىرىپتار كەڭىنەن ءسوز بولدى. حالىقارالىق كونفەرەنتسياعا ارنايى شاقىرىلعان تانىمال عالىم, ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى زينول-عابدەن بيسەنعالي «ادەبيەت تاريحى مەن تەورياسى تۋرالى قاجىم جۇماليەۆ تولعامدارى» اتتى بايانداما جاسادى.
وسى جيىنعا شەتەلدەردەن - م.اقموللا اتىنداعى باشقۇرتستان مەملەكەتتىك پەداگوگيكالىق ۋنيۆەرسيتەتىنىڭ دوتسەنتى, فيلولوگيا عىلىمدارىنىڭ كانديداتى, «باشقۇرت ادەبيەتى مەن مادەنيەتى» كافەدراسىنىڭ مەڭگەرۋشىسى گاليما گالينا, م.اقموللا اتىنداعى باشقۇرتستان مەملەكەتتىك پەداگوگيكالىق ۋنيۆەرسيتەتىنىڭ دوتسەنتى, تاريح عىلىمدارىنىڭ كانديداتى, «ەۋرازيا حالىقتارى فولكلورى مەن ەتنوگرافياسى» عىلىمي ورتالىعىنىڭ جەتەكشىسى روزالينا بايازيتوۆا, قاراقالپاقستان جازۋشىلار وداعىنىڭ ادەبي ءماسليحاتشىسى, جازۋشى, فيلولوگيا عىلىمدارىنىڭ كانديداتى ءاميرلان سەيدين كەلگەن ەكەن. مەيماندار قاجىم جۇماليەۆتىڭ تەك قازاق ادەبيەتى ەمەس, تۋىسقان تۇركى حالىقتارى ادەبيەتى عىلىمىنىڭ قالىپتاسۋىنا قوسقان زور ۇلەسىن العىس سەزىمىمەن اتاپ ءوتتى.
احمەت بايتۇرسىن ۇلى اتىنداعى ءتىل ءبىلىمى ينستيتۋتىنىڭ پروفەسسورى, فيلولوگيا عىلىمدارىنىڭ دوكتورى جامال مانكەەۆانىڭ «رۋحاني جاڭعىرۋ: اكادەميك قاجىم جۇماليەۆ زەرتتەۋلەرى نەگىزىندە ابايدىڭ ء«تىل الەمىن» تانۋ» اتتى بايانداماسىن دا جينالعاندار جىلى قابىلدادى.
باتىس قازاقستان يننوۆاتسيالىق-تەحنولوگيالىق ۋنيۆەرسيتەتىنىڭ دوتسەنتى, فيلولوگيا عىلىمدارىنىڭ كانديداتى, وسى حالىقارالىق كونفەرەنتسيانى ۇيىمداستىرۋشىلاردىڭ ءبىرى ازامات مامىروۆ «ق.جۇماليەۆ اتىنداعى عىلىمي زەرتتەۋ جانە قوسىمشا ءبىلىم بەرۋ» ورتالىعى قۇرىلعانىن حابارلادى. سونىمەن قاتار ادەبيەتتانۋعا ولشەۋسىز ۇلەس قوسقان عالىمنىڭ اتىنداعى جۇماليەۆ وقۋلارى ورال قالاسىندا جىل سايىن ءداستۇرلى تۇردە ءوتىپ تۇراتىن بولدى.
«قاجىم جۇماليەۆتىڭ قازاق اۋىز ادەبيەتى, ادەبيەت تاريحى, ادەبيەت تەورياسى سالاسىنداعى زەرتتەۋلەرىنىڭ ماڭىزى وراسان. سوندىقتان اكادەميكتىڭ شىعارماشىلىعى مەن تۋىندىلارىن زەرتتەۋدى جاڭا بەلەسكە كوتەرۋ قاجەت» دەيدى عالىمدار.
قازبەك قۇتتىمۇرات ۇلى,
«ەگەمەن قازاقستان»
سۋرەتتى تۇسىرگەن تەمىربولات توقمامبەتوۆ
