اتالعان ءىس-شارالاردىڭ ماقساتى – قوعامدىق قاۋىپسىزدىكتى قامتاماسىز ەتۋ, اتىس قارۋى مەن جارىلعىش زاتتاردى قولدانا وتىرىپ جاسالاتىن قىلمىستار مەن قۇقىق بۇزۋشىلىقتاردىڭ الدىن الۋ.
بيىل اتالعان اكتسيا 10 ساۋىردەن باستالىپ, حالىقتىڭ قولىنداعى قارۋلاردى ساتىپ الۋ ءۇشىن رەسپۋبليكالىق بيۋدجەتتەن 125,4 ملن تەڭگە بولىنگەن.
– اكتسيا شەڭبەرىندە ەل ازاماتتارى 2454 بىرلىك اتىس قارۋىن, 35 مىڭ دانا ويىق ۇڭعىلى قارۋدىڭ پاتروندارىن تاپسىردى, – دەدى م.بايبولوۆ.
ءىىم-ءنىڭ دەرەكتەرىنە قاراعاندا, مۇنداي اكتسيا 2008 جىلدان باستاپ وتكىزىلە باستاعان. بارلىق اكتسيالاردىڭ ناتيجەلەرى بويىنشا حالىق تاراپىنان اقشالاي سىياقىعا ەرىكتى تۇردە 47 مىڭنان استام اتىس قارۋى جانە 1 ميلليوننان استام ويىق ۇڭعىلى قارۋدىڭ پاتروندارى تاپسىرىلعان. بۇل ماقساتتارعا بولىنگەن قازىنانىڭ جالپى سوماسى 1,5 ملرد تەڭگە قاراجاتىنا ەل ىشىنەن قارۋ-جاراق ساتىپ الىنعان.
م.بايبولوۆ سوڭعى ون جىلداعى ارنايى اكتسيالاردىڭ ناتيجەسىندە زاڭسىز اينالىمداعى قارۋ-جاراق پەن وق-دارىلەردىڭ جانە جارىلعىش زاتتاردىڭ اناعۇرلىم ازايعاندىعىن ايتىپ وتىر. تومەندەگەن كورسەتكىش – 5,5 ەسەگە جەتەعابىل.
ءىىم وكىلىنىڭ ايتۋىنا قاراعاندا, تۇرعىنداردىڭ قولىنداعى زاڭسىز زاتتاردىڭ ازايۋىنا ءتۇسىندىرۋ جۇمىستارىنىڭ اۋقىمى كەڭەيگەندىگى جانە قارۋدى ءوز ەركىمەن تاپسىرۋشىلاردىڭ اكىمشىلىك, قىلمىستىق جاۋاپكەرشىلىكتەردەن بوساتىلاتىندىعى سەبەپ بولعان.
– بۇل ءىىم قولعا العان جالعىز ءىس-شارا ەمەس. جىل سايىن تۇراقتى تۇردە «قارۋ», «قۇقىق ءتارتىبى», «براكونەر» جەدەل-الدىن الۋ شارالارىنىڭ ناتيجەسىندە دە زاڭسىز ساقتالعان قارۋلار تاركىلەنىپ كەلەدى. وسى ۋاقىتقا دەيىن سوڭعى اتالعان ءىس-شارالار ناتيجەسىندە زاڭسىز ساقتالعان 2 مىڭداي قارۋ انىقتالىپ, الىندى. جالپى, سەگىز جىل ىشىندە زاڭسىز اينالىمنان 60 مىڭنان استام قارۋ الىنعان بولسا, ونىڭ 47 مىڭدايىن حالىق ءوز ەرىكتەرىمەن تاپسىردى, – دەيدى اكىمشىلىك پوليتسيا كوميتەتى توراعاسىنىڭ ورىنباسارى.
ءىىم سوڭعى جىلدارى اتىس قارۋىن, جارىلعىش زاتتاردى قولدانۋ ارقىلى جاسالاتىن قىلمىستاردىڭ دا ازايعاندىعىن تىلگە تيەك ەتتى. ماسەلەن, سوڭعى بەس جىلدا مۇنداي قىلمىستار ەكى ەسەگە ازايعان.
ال تۇرعىنداردان سۋىق قارۋدى ەرىكتى تۇردە قايتارۋ اكتسياسى الداعى ءۇش جىلدا دا جالعاسىن تاپپاق. بۇل ماقساتتارعا رەسپۋبليكالىق بيۋدجەتتەن 309 ملن تەڭگە قاراستىرىلعان.
سەرىك ابدىبەك,
«ەگەمەن قازاقستان»
