«رەسەيلىك عالىم مالۋس سيەۆەرسي تۇقىمىن زاماناۋي الما تۇرلەرىنىڭ ارعى اتاسى ەكەنىن انىقتاعاندا, قازاقستان ورماندارى ماۋەلى جەمىسكە تولى بولاتىن. قازىر جابايى المانىڭ كەلەشەگىنە قاۋىپ ءتونىپ تۇر», دەيدى ماقالا اۆتورى مەرسەدەس حاتتون.
جۋرناليست وقيعانىڭ ءمان-جايىنا قانىعىپ, تولىققاندى مالىمەت بەرۋ ءۇشىن تۇرگەن شاتقالىنا بارعان ەكەن. م.حاتتون قاسىنداعى گيدپەن سۇحبات قۇرا وتىرىپ, ماسەلەنىڭ وزەكتىلىگىنە توقتالادى.
«سۋىق», دەدى «قازاقستان ترەككينگ كلاب» گيدى الەكسەي راسپوپوۆ كوتەرىلىپ بارا جاتقاندا كولىكتىڭ تەرمومەترىن كورسەتىپ. قازاقستاننىڭ ەكىنشى قالاسى الماتى تومەندە, قالىڭ ءتۇتىننىڭ اراسىنا جاسىرىندى.
ەكى ساعات بويى جول ءجۇرىپ, تۇرگەن شاتقالىنا جەتكەندە ءبىز كولىكتەن شىعىپ, ساپارىمىزدى جاياۋ جالعاستىردىق. جوعارى شىعۋ قيىن بولعان جوق, بىراق وتكىر جەل ساۋساقتارىمدى جانسىزداندىرىپ, ەرنىمدى كەبەرسىتىپ جىبەردى. وتىز جىل بويى ءوڭىردى ارالاۋمەن اينالىساتىن راسپوپوۆتان ايماقتىڭ تاريحى تۋرالى سۇرادىم.
«كوپ وزگەردى», دەيدى ول. پىكىرىن ناقتىلاۋ ءۇشىن كەڭەس وداعىنىڭ قۇلاعانىن, لاستانۋدىڭ ارتقانىن جانە مۇزدىقتاردىڭ كولەمى ازايعانىن مىسالعا كەلتىردى. الايدا نەگىزگى دالەل بۇل ەمەس ەدى. تيان-شان تاۋىنىڭ ىلە الاتاۋ تارماعىنىڭ ەتەگىندە ورمانداي ۇيىسقان مالۋس سيەۆەرسيدىڭ, ياعني جاباي المانىڭ جوعالۋ قاۋپى تۋىنداۋى ۋاقىتتىڭ وزگەرگەنىنە دالەل بولۋعا جەتكىلىكتى», دەلىنگەن BBC-دەگى ساراپتامادا.
سونىمەن قاتار, ماقالا اۆتورى الماتىداعى ورتالىق بازارعا بارىپ, ونداعى جاعدايدان دا ءبىراز مالىمەت تاراتادى. سوڭىندا م.حاتتون جابايى المانىڭ جويىلمايتىنىنا سەنىم بىلدىرەدى.
ماقالانىڭ تولىق نۇسقاسىن الداعى ۋاقىتتا «ەگەمەن قازاقستان» گازەتىنەن وقي الاسىزدار.
