«بالالار ەۋروۆيدەنيەسىنە» 20 ەلدىڭ تالانتتى جاستارى قاتىستى. بۇل كونكۋرستا قازاقستان العاش رەت باق سىنادى. فينالدا ءار ەلدىڭ وكىلدەرى ادىلقازى القاسى مۇشەلەرىنىڭ داۋىستارىن جاريالادى. قازاقستان ءوزىنىڭ 12 ۇپايىن «Doma» ءانىن ورىنداعان ماكەدونيالىق ماريا سپاسوۆسكاياعا بەردى. ال دانەلياعا ادىلقازى القاسى مۇشەلەرى 68 ۇپاي بەرىپ, ول 8-ورىنعا شىقتى. بۇدان ءارى بۇل ۇپايعا تەلەكورەرمەندەردىڭ 103 ۇپايى قوسىلىپ, ول 171 باللمەن التىنشى ورىنعا يە بولدى.
باس جۇلدەنى 215 ۇپايمەن پولشالىق روكسانا ۆەنگەل جەڭىپ الدى. ونىڭ ىشىندە 136 ۇپاي - كورەرمەندەر بەرگەن داۋىس سانىنىڭ ۇلەسى. ەكىنشى ورىن 203 ۇپايمەن فرانتسيا ونەرپازىنا بۇيىردى.ءۇشىنشى ورىندى 201 ۇپايمەن اۋستراليا ءانشىسى الدى.
