وتىرىسقا ءماجىلىس دەپۋتاتتارى, دەنساۋلىق ساقتاۋ, ينۆەستيتسيالار جانە دامۋ, ۇلتتىق ەكونوميكا, ءبىلىم جانە عىلىم, اقپارات جانە كوممۋنيكاتسيالار, اۋىل شارۋاشىلىعى مينيسترلىكتەرىنىڭ, باس پروكۋراتۋرانىڭ, قوعامدىق ۇيىمداردىڭ جانە وقۋ ورىندارىنىڭ وكىلدەرى قاتىستى. قارالعان ماسەلە بويىنشا الدىمەن دەنساۋلىق ساقتاۋ ءمينيسترىنىڭ ورىنباسارى ءلاززات اقتاەۆا بايانداما جاسادى.
جيىندا بۇگىنگى تاڭدا قوعامدى الاڭداتىپ وتىرعان ماسەلەلەردىڭ قاتارىندا سانيتارلىق-ەپيدەميولوگيالىق باقىلاۋ تالاپتارى مەن نورمالارىن ساقتاۋ, تاعام ونىمدەرىنىڭ قاۋىپسىزدىگىن قامتاماسىز ەتۋ, مەديتسينالىق قىزمەت ساپاسىن باقىلاۋ ماسەلەلەرى اتالدى. سونىمەن قاتار جالپى ينفەكتسيالىق اۋرۋ مەن ۋلانۋ, ولىممەن اياقتالۋ سياقتى قوعامدا جاعىمسىز پىكىر قالىپتاستىرعان باسقا دا جاعدايلار ورىن العان ساتتە ءتيىستى مەملەكەتتىك ورگاننىڭ ۋاكىلەتتىگىنە شەكتەۋ قويۋ كەرى اسەرىن بەرەتىندىگى ايتىلدى. وعان قوسا, شۇعىل تەكسەرۋ قاعيداتتارىنىڭ بولماۋىنا بايلانىستى كاسىپكەرلىك سۋبەكتىلەر قاتەلىكتەرىن جىلدام تۇزەپ, جىبەرگەن كەمشىلىكتەرى ءۇشىن جازادان قۇتىلىپ كەتۋدە.
سونداي-اق تاۋەلسىز ساراپتاما, سونىڭ ىشىندە تاۋەلسىز مەديتسينالىق ساراپتاما, تاۋەلسىز ساراپشى مارتەبەسى مەن ساراپشىلىق قىزمەت كورسەتۋ تالاپتارىنا قاتىستى نورماتيۆتىك-قۇقىقتىق بازا جەتىلمەگەن.
ءسوز سويلەۋشىلەر دەنساۋلىق ساقتاۋ سالاسىندا اۋرۋدىڭ الدىن الۋىنا قايتا باعدارلانۋ قاجەتتىلىگى جونىندە ايتتى. ونىڭ ىشىندە وزەكتى ماسەلەلەر رەتىندە مىندەتتى ەكپە, جۇقپالى جانە جۇقپالى ەمەس اۋرۋلاردىڭ الدىن الۋ, سالاماتتى ءومىر سالتىن ناسيحاتتاۋ, حالىقتىڭ اقپاراتتاندىرۋ دەڭگەيىنىڭ تومەندىگى نازارعا الىندى. بايانداماشىنىڭ ايتۋىنا قاراعاندا, سوڭعى جىلدارى ەلىمىزدە سوزىلمالى جانە جۇقپالى اۋرۋلاردى انىقتاۋ مەن ەمدەۋگە جۇمسالاتىن شىعىن وسكەن. وسى ماقساتتارعا كەتەتىن بارلىق شىعىندار 95 پايىزدى قۇراعان.
سونىمەن قاتار دەنساۋلىق ساقتاۋداعى جالپى قاراجات كولەمىنىڭ تەك 3 پايىزى عانا ءبىزدىڭ ەلىمىزدە الدىن الۋ ءىس-شارالارىنا جۇمسالادى, ال ەقدۇ مەملەكەتتەرىندە بۇل كورسەتكىش 10 پايىزدى قۇرايدى.
وتىرىستا كاسىپكەرلەردىڭ الدىندا كەزدەسەتىن كەدەرگىلەردى الىپ تاستاۋ, قوعامدىق دەنساۋلىق ساقتاۋ قىزمەتى سالاسى ءۇشىن كادر دايارلاۋ, قوعامدىق بىرلەستىكتەردىڭ ونىمدەر مەن تاۋارلار ساپاسىن قامتاماسىز ەتۋدەگى ءرولى, ت.ب. ماسەلەلەر تالقىلاندى.
جيىن ناتيجەسى بويىنشا ۇكىمەت پەن ءتيىستى مەملەكەتتىك ورگانداردىڭ اتىنا ۇسىنىستار ازىرلەندى.
سەرىك ابدىبەك,
«ەگەمەن قازاقستان»
