سەسسيا بارىسىندا حالىقارالىق قاۋىپسىزدىكتىڭ ماڭىزدى ماسەلەلەرى قارالدى. تالقىلاۋلاردا ەۋروپا ەلدەرىندە وتەتىن سايلاۋ بارىسىندا سىرتتان تونەتىن سان الۋان قاۋىپتەر مەن ولاردىڭ سايلاۋعا ارالاسۋىنا قارسى تۇرۋ, وڭتۇستىكتەگى تۇراقسىزدىق, قارا تەڭىز وڭىرىندەگى دەموكراتيا مەن ادام قۇقىقتارىنا كومەكتەسۋ, قيىر سولتۇستىك پەن جەرورتا تەڭىزىندە ازاماتتاردى قورعاۋ, سولتۇستىك كورەيانىڭ يادرولىق باعدارلاماسى, اليانستىڭ عىلىمي-تەحنولوگيالىق ارتىقشىلىقتارى, باتىس بالقانداعى قاۋىپسىزدىك, سونداي-اق ناتو-نىڭ ارنايى جەدەل كۇشتەرىنىڭ ءرولى ماسەلەلەرى قوزعالدى.
سەسسياعا قاتىسۋشىلار شىعىس جانە ورتالىق ەۋروپاداعى ەنەرگەتيكالىق قاۋىپسىزدىك, ساۋدا حالىقارالىق جۇيەسى مەن عارىش سالاسىن دامىتۋدىڭ كەلەشەگى جونىندە پىكىر الماستى.
سەسسيا اياسىندا قازاقستاندىق دەپۋتاتتار كانادا پارلامەنتى قاۋىمدار پالاتاسىنىڭ توراعاسى دجەفف ريگانمەن جانە كانادالىق سەناتور, «كانادا-قازاقستان» دوستىق توبىنىڭ تەڭ توراعاسى دجوزەف دەەممەن كەزدەستى. كەزدەسۋ بارىسىندا دەپۋتاتتار ەكىجاقتى ىنتىماقتاستىقتى ودان ءارى جوعارى دەڭگەيگە كوتەرۋ قاجەتتىگىن, سونداي-اق قازاقستان مەن كانادا پارلامەنتتەرى اراسىنداعى بايلانىستاردى بەلسەندى جۇرگىزۋدىڭ ماڭىزدىلىعىن اتاپ ءوتتى.
سونىمەن قاتار بريتاندىق دەپۋتات, ۇلىبريتانيا پالاتاسىنىڭ قازاقستانمەن ىنتىماقتاستىق جونىندەگى پارتيا توبىنىڭ جەتەكشىسى بوب ستيۋارتپەن جانە تۇركيانىڭ دەپۋتاتى كاميل ايدىنمەن كەزدەسۋلەر ءوتتى.
