وتكەن تاۋلىكتە استانادا تولاسسىز قار جاۋىپ, داۋىلدى ەسكەرتۋ جاريالاندى. وسىعان بايلانىستى قالاداعى تاسجولدار دا جابىلعان بولاتىن. بۇگىن تاڭەرتەڭ قالا تۇرعىندارى كوممۋنالدىق قىزمەتتەردىڭ كەلۋىن كۇتپەي, تۇرعىن ۇيلەرىنىڭ اۋلاسىن قاردان تازارتۋعا شىقتى.
سارىارقا اۋدانىنىڭ اۋماعىنداعى اباي داڭعىلى, 1 مەكەن-جايى بويىنشا ورنالاسقان ءۇيدىڭ تۇرعىندارى كۇندىز اۋلاسىنداعى قاردى كۇرەپ, جاياۋ جۇرگىنشىلەر وتپەلدەرى مەن بالالارعا ارنالعان الاڭداردى مۇزدان تازارتتى.
«مەن بۇل ۇيدە 2011 جىلدان باستاپ تۇرامىن. ءوزىمىز تۇرىپ جاتقان ءۇيدىڭ اۋلاسىنداعى جاعدايعا بەي-جاي قاراي المايمىن. مۇندا ءبىزدىڭ بالالارىمىز ءوسىپ كەلەدى عوي. كەشە كۇنى بويى قار جاۋدى. جولداردا كوممۋنالدىق قىزمەتتەر بەلسەندى جۇمىس ىستەۋدە. الايدا جاۋعان قار مولشەرىنىڭ كوپ بولعانى سونشا, كوممۋنالدىق قىزمەتتەر بارلىق اۋماقتاردى تازارتۋعا ۇلگەرمەي جاتىر. كەشە كورشىلەرىمىزبەن تاڭەرتەڭ بارلىعىمىز ءبىر ادامداي اۋلانى تازارتۋعا شىعامىز دەپ ۇيعاردىق. اۋدان اكىمدىگىنە شاعىم تۇسىرمەي, كەرىسىنشە وعان كومەك كورسەتكەن ءجون ەمەس پە؟!», دەيدى ءۇيدىڭ تۇرعىنى مارات ساليەۆ.
ايتا كەتەيىك, سينوپتيكتەر مۇنداي تۇراقسىز اۋا رايىنىڭ الداعى كۇندەرى دە ساقتالاتىنىن ەسكەرتەدى. 26-27 قاراشادا ەلوردادا كوشپەلى بۇلت شىعىپ, كەي كەزدە قار جاۋادى, بۇرقاسىن ءجۇرىپ, كوكتايعاق بولادى دەپ كۇتىلۋدە. وڭتۇستىك-باتىستان سوعاتىن جەلدىڭ ەكپىنى 9-14, كەي كەزدە 15-20 م/س جەتەدى. اۋا تەمپەراتۋراسى تۇندە جانە كۇندىز -8...-10 گرادۋستى قۇرايدى.
