وسى كەزگە دەيىن 4 قويما جۇمىس ىستەپ كەلگەنىمەن, توزىعى جەتكەن جانە كوكونىس ساقتاۋدىڭ تالاپتارىنا ساي ەمەس. مەملەكەت قولداۋىنىڭ ارقاسىندا دميتري شاراپاەۆ جەتەكشىلىك ەتەتىن «رادۋگا» جشس-ءى سىيىمدىلىعى ەكى مىڭ توننالىق جاڭا كوكونىس ساقتاۋ قويماسىن تۇرعىزدى. بۇل وڭىردەگى كوكونىستەردى ءبولىپ ساقتاۋعا ارنالعان العاشقى زاماناۋي قويما بولىپ تابىلادى. ول سوڭعى ۇلگىدەگى جەلدەتۋ جانە سۋىتۋ جۇيەلەرىمەن تولىق قامتاماسىز ەتىلگەن. چەحيالىق توڭازىتقىشتار تۇگەلىمەن اۆتوماتتاندىرىلعان. وسىنىڭ ارقاسىندا كوكونىس ونىمدەرىن, ونىڭ ىشىندە تۇراقتاندىرۋ قورىنىڭ ءونىمىن ساپالى ءارى ۇزاق ساقتاي الادى. بۇگىندە 800 توننا كارتوپ, پياز, ءسابىز, قىرىققابات جەتكىزىلگەن.
زاماناۋي قويمانىڭ مۇمكىندىكتەرىمەن تانىسقان ايماق باسشىسى قۇمار اقساقالوۆ جۇزەگە اسىرىلعان جوبانىڭ ستراتەگيالىق ماڭىزىن اتاپ ءوتتى. ساۋدا نۇكتەلەرىنە كوكونىس ۇزبەي جەتكىزىلىپ, قىسقى جانە كوكتەمگى مەزگىلدەردە كوكونىس باعاسىنىڭ نەگىزسىز وسۋىنە, دەلدارداردىڭ ارالاسۋىنا جول بەرىلمەيدى.
«ەسكى قويمالاردىڭ مۇمكىندىگى شەكتەۋلى بولعاندىقتان, كوكونىس ناۋرىز ايىنا دەيىن عانا ساقتالاتىن. قور تاۋسىلعاننان كەيىن باعانىڭ ءوسۋى بايقالاتىن. ەندى كوكونىس ونىمدەرىن شىلدە ايىنا دەيىن ساقتاي الامىز. باعانى تۇراقتاندىرۋدىڭ وزگە دە جولدارى قاراستىرىلاتىن بولادى», دەيدى ق. اقساقالوۆ.
بيىل جارتى ميلليون تونناعا جۋىق كارتوپ جينالدى. 110 مىڭ توننا كوكونىس الىندى. كەلەسى جىلى كوكونىس القاپتارى تاعى دا ۇلعايتىلماق.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
