ايماق باسشىسىنىڭ ءبىرىنشى ورىنباسارى ايداربەك ساپاروۆ اگروسەكتوردىڭ دامۋ الەۋەتى جايلى بايانداما جاسادى.10 ايدىڭ قورىتىندىسى بويىنشا اۋىلشارۋاشىلىعىنىڭ جالپى ءونىمى 464 ميلليارد تەڭگەنى قۇرادى. 61 ميلليارد تەڭگە ينۆەستيتسيا قۇيىلدى. 5,3 ميلليون توننا بيداي قامباعا ءتۇستى. مايلى داقىلداردىڭ القابى ۇلعايىپ, 1 ميلليون گەكتارعا جەتتى. بيدايدىڭ جالپى ءونىمى 61 ميلليرد, مايلى داقىلدار 25 ميلليارد تەڭگەگە ۇلعايدى. اۋىلشارۋاشىلىعىنداعى ەڭبەك ونىمدىلىگى ءبىر ادامعا شاققاندا 2,4 ميلليون تەڭگە بولسا, جىل سوڭىنا دەيىن 3 ميلليون تەڭگەگە جەتپەك.
سالتاناتتى شارادا بىرنەشە اتالىم بويىنشا جەڭىمپازدار انىقتالدى. گەكتار بەرەكەلىگىن 23,6 تسەنتنەردەن اينالدىرعان قىزىلجار اۋدانىنا 30 ميلليون تەڭگەنىڭ سەرتيفيكاتى تابىس ەتىلدى. جامبىل اۋدانى 20 ميلليون, اققايىڭ اۋدانى 10 ميلليون تەڭگە سىياقىعا يە بولدى.
اۋىلشارۋاشىلىعى سالاسىنا تسيفرلىق تەحنولوگيالاردى قولدانۋدا «اتامەكەن اگرو», ەگىس القاپتارىن ءارتاراپتاندىرۋدا «بابىق-بۇرلىق», جوعارى ەڭبەك ونىمدىلىگىن قامتاماسىز ەتۋدە «سەرۆيس جارىس» سەرىكتەستىكتەرى ەڭ ۇزدىك دەپ تانىلىپ, ارنايى سىيلىقتار تاپسىرىلدى.
اۋىلشارۋاشىلىعى سالاسىن دامىتۋداعى ۇلەستەرى ءۇشىن «شاعالا اگرو», «شاتيلو جانە ك», «تايىنشا استىق» شارۋاشىلىقتارىنىڭ جەتەكشىلەرى كەۋدەلەرىنە «اۋىلشارۋاشىلىعى سالاسىنىڭ ۇزدىگى» توسبەلگىسى قادالدى. ءبىر توپ ديقان وبلىس اكىمىنىڭ قۇرمەت گراموتاسى مەن العىس حاتىن الدى. كونتسەرتتىك باعدارلامادا ەلىمىزگە تانىمال انشىلەر قايرات باەكەنوۆ, «فورمات» توبى ونەر كورسەتتى.
ءومىر ەسقالي,
«ەگەمە قازاقستان»
سولتۇستىك قازاقستان وبلىسى
