مايقايىڭ كەنتىنىڭ تۇرعىن-ءۇي كوممۋنالدىق شارۋاشىلىق, سۋ جۇيەلەرى, قۇبىرلار جاعدايى وسى كۇنگە دەيىن بىتپەيتىن ماسەلەگە اينالۋدا.
1997 جىلدارى سۋ, جىلۋ بولماي, كەنتتىڭ حالقى جارتىلاي كوشىپ تە كەتكەن-ءدى. قازىر كەنتتە 9 مىڭنان اسا حالىق تۇرادى. بىرنەشە ءوندىرىس ورىندارى ورنالاسقان. بىراق, شەشىمىن تاپپاي تۇرعان شارۋالار ءالى دە از ەمەس.
قۇبىرلاردى جاڭادان توسەۋ جۇمىستارىن جۇرگىزۋ ءۇشىن باياناۋىل اۋدانىنىڭ اكىمدىگى كەنتكە وبلىستىق بيۋدجەتتەن قاراجات بولىنسە دەپ وتىر. باسقارما بولسا, وزدەرىڭ اۋداندىق بيۋدجەت ەسەبىنەن جوندەڭدەر دەپ ۇسىنىس بىلدىرگەن.
سوندىقتان, وبلىستىق اكىمدىك جيىنىندا وبلىس اكىمى بولات باقاۋوۆ توزعان قۇبىرلاردى تۇگەندەپ, ءار شاقىرىمىنىڭ كىمگە تيەسىلى ەكەنىن انىقتاۋدى تاپسىردى. مونوپوليستەردىڭ, سەنىمدى باسقارۋعا العان ينۆەستورلاردىڭ مىندەتتەمەلەرىن ۋاقىتىندا ورىنداۋىن قاداعالاۋ قاجەتتىگى دە ايتىلدى.
ال, كەنت اكىمدىگىنىڭ مالىمەتىنشە, كەنتتەگى جالپى ۇزىندىعى 33,143 شاقىرىم «ەكىباستۇز-مايقايىڭ» سۋ تارتقىشى جانە كەنت ىشىلىك ۇزىندىعى 38 شاقىرىم سۋ قۇبىرى «مايقايىڭ التىن» اق-قا سەنىمگەرلىك باسقارۋعا بەرىلگەن.
وڭىردە بيىل رەسپۋبليكالىق بيۋدجەت ەسەبىنەن وڭىردەگى 4 جوبانى ىسكە اسىرۋ ءۇشىن 3,3 ملرد. تەڭگە قاراستىرىلدى. وبلىستىق بيۋدجەتتەن بولىنگەن 120 ميلليون تەڭگەگە اقسۋ قالاسىنىڭ ماگيسترالدى قۇبىرلارىنىڭ قۇرىلىسى جۇرگىزىلدى.
ال ,«نۇرلى جول» باعدارلاماسى بويىنشا وڭىردە بيىل 5 جوبا قولعا الىندى. بىراق, اقسۋ قالاسىنداعى نەگىزگى ورتالىق سۋ بەرۋشى ستانسانىڭ قايتا قالپىنا كەلتىرۋ جۇمىستارى سىلبىر جۇرگىزلۋدە.
وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ مالىمەتىنشە, وڭىردەگى وبلىس ورتالىعى, ەكىباستۇز بەن اقسۋ قالالارىندا 1251 شاقىرىم سۋ قۇبىرلارى جەلىسى جانە 889 شاقىرىم سۋدى بۇرۋ قۇبىرلارى بار. توزعان قۇبىرلار جارتىلاي جوندەلۋدە.
2015-2018 جىلدارى ءۇش قالادا قۇنى 5,6 ملرد. تەڭگە تۇراتىن 15 جوباسى جۇزەگە اسقان. جوبا بارىسىندا ەكىباستۇز, اقسۋ قالالارىندا ۇزىندىعى 28,3 شاقىرىمدىق سۋ قۇبىرىنىڭ قۇرىلىسى جۇرگىزىلسە, وبلىس ورتالىعىندا سۋ تازارتۋ قۇبىرلارى جاڭارتىلىپتى.
فاريدا بىقاي,
«ەگەمەن قازاقستان»
پاۆلودار وبلىسى
