جاستار مەن ستۋدەنتتەردىڭ جانە جالپى جۇرتشىلىقتىڭ كەلۋىنە ارنالعان كەڭسەنىڭ قابىرعالارىنا ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا ايتىلعان باستى ماسەلەلەر ايقىندالىپ جازىلعان. سونىمەن قاتار تورعاي-ارقالىق وڭىرىندەگى كيەلى جەرلەردىڭ كارتاسى ىلىنگەن. ونىڭ ءبىرازى ايماقتىق جانە رەسپۋبليكالىق ماڭىزى بار تىزىمدەرگە ەندى.
كابينەتكە ەلباسى ماقالاسىندا ايتقان الەمدەگى وزىق 100 كىتاپتىڭ قازاق تىلىنە اۋدارىلعان 18 كىتابى قويىلدى. وسى «رۋحاني جاڭعىرۋ» جوبالىق كەڭسەسىنىڭ اشىلۋ سالتاناتىنا ارقالىق قالاسىنىڭ اكىمى ەلدار كۇزەنباەۆ ونىڭ لەنتاسىن قيدى. ول جوبالىق كەڭسە تەك ستۋدەنتتەردىڭ عان ەمەس, جالپى قالا جاستارىنىڭ, تۇرعىندارىنىڭ ءجيى باس سۇعاتىن ورنىنا اينالسا قۇبا-قۇپ ەكەنىن ايتتى.
اشىلعانىنا كوپ بولماسا دا, ءبىلىم ورداسىنداعى كوپتەگەن شارالاردى وسىندا وتكىزۋ ءۇشىن وقىتۋشىلار مەن ستۋدەنتتەردەن ءوتىنىش تۇسكەن. وتكىزىلەتىن شارالاردىڭ ءتىزىمى مەن كەزەك كەستەسى دە جاسالدى.
«رۋحاني جاڭعىرۋ» باعدارلاماسىنداعى ايتىلعان ماسەلەلەردىڭ بارلىعى جۇزەگە اسۋ ءۇشىن ەڭ الدىمەن جاستار تاراپىنان ىنتالى جۇمىستار كەرەك. ءۇش تۇعىرلى ءتىلدى مەڭگەرۋ ءاربىر جاس ءۇشىن تەرەڭ رۋحاني بايلىق عانا ەمەس, ول ەرتەڭگى باسەكەگە قابىلەتتىلىگىن قالىپتاستىرادى. وسى كەڭسەدە جاستار جۇزەگە اسىراتىن تالاي تاماشا جوبالار, ىستەر دۇنيەگە كەلەدى دەپ سەنەمىز» دەيدى ينستيتۋت رەكتورىنىڭ كەڭەسشىسى, «رۋحاني جاڭعىرۋ» جوبالىق كەڭسەسىنىڭ مەنەدجەرى سابىرجان تاسماعامبەتوۆ.
جاقىندا ينستيتۋتتا ء«ۇش تۇعىرلى ءتىل – باسەكەگە قابىلەتتىلىكتىڭ نەگىزى» اتتى عىلىمي-پراكتيكالىق كونفەرەنتسيا ءوتتى. وندا ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى بۇگىنگى ۇرپاقتىڭ باسەكەگە قابىلەتتى بولۋ ءۇشىن كوپ ءتىلدى ءبىلۋى, ۇلتتىق كودتى ساقتاۋ, تۋعان جەرگە دەگەن پاتريوتتىق سەزىمدى تاربيەلەۋ سەكىلدى كوپتەگەن وزەكتى ماسەلەلەر قارالدى. ينستيتۋت رەكتورى سەيىتبەك قۋانىشباەۆ ەلدىڭ ەرتەڭى سەنىپ تاپسىرىلاتىن بۇگىنگى جاستارعا ءوزىنىڭ دۇنيەتانىمىن قايتا قۇرۋ كەرەكتىگىن, ءوز حالقىمىزدىڭ رۋحاني قۇندىلىقتارىن جوعالتپاۋ, اعا ۇرپاق وكىلدەرىنىڭ تاجىريبەسىنەن ۇلگى الۋ كەرەكتىگىن ايتتى. كونفەرەنتسيادا وبلىستىق «رۋحاني جاڭعىرۋ» جوبالىق ءوفيسىنىڭ مەنەدجەرى, «جايدارلى جاستار» قوعامدىق قورىنىڭ ديرەكتورى مارعۇلان باكىر, و.بايقوڭىروۆ اتىنداعى جەزقازعان ۋنيۆەرسيتەتىنىڭ دوتسەنتى, پەداگوگيكا عىلىمدارىنىڭ كانديداتى زامزاگۇل قاشقىنباەۆا ادامگەرشىلىك قۇندىلىقتاردى دامىتۋدا «رۋحاني جاڭعىرۋ» باعدارلاماسىنىڭ ءرولى, ءتىلدىڭ, ادەبيەتتىڭ ۇلتتىق كودتى ساقتاۋداعى ماڭىزى تاقىرىپتارىندا ماڭىزدى اڭگىمە ايتتى.
كونفەرەنتسيا قوناقتارى «رۋحاني جاڭعىرۋ» جوبالىق كەڭسەسىنە ۇلكەن باعا بەردى.
ءنازيرا جارىمبەت,
«ەگەمەن قازاقستان»
ارقالىق
