كاسىپقوي رينگتەگى جەتى كەزدەسۋدىڭ بارلىعىن جەڭىسپەن اياقتاپ, التى قارسىلاسىن نوكاۋتپەن ۇتقان ەكىنشى ورتا سالماقتاعى 24 جاستاعى نۇرزات سابيروۆ روككي مونتويا پوچەكومەن كۇش سىناسادى. 36 جاستاعى مەكسيكانىڭ وكىلى 34 مارتە شارشى الاڭعا كوتەرىلىپ, 32 رەت باسىمدىق تانىتتى. 22 باسەكەنى مەرزىمىنەن بۇرىن اياقتادى. مونتويانىڭ كاسىپقويلار اراسىندا جۇرگەنىنە 20 جىلدان اسا ۋاقىت وتسە دە, ول تەك ءبىر رەت قانا WBC نۇسقاسىنىڭ وڭىرلىك التىن بەلبەۋى ءۇشىن تالاسقان ەكەن. الايدا سول كەزدەسۋدە ايتۋلى بوكسشى ءوزىنىڭ وتانداسى داۆيد لوپەستەن ۇتىلىپ قالدى.
جاستار اراسىنداعى الەم چەمپيونى, 20 جاستاعى سادريددين احمەتوۆ بيىلعى جىلدىڭ كوكتەم ايىنان بەرى كاسىپقويلار اراسىندا ونەر كورسەتىپ ءجۇر. سوعان قاراماستان ول ءوزىن جاقسى قىرىنان كورسەتىپ, كورەرمەندەردىڭ كوزايىمىنا اينالىپ ۇلگەردى. ازىرگە ءتورت رەت قانا رينگكە شىققان قانداسىمىز بارلىق جەكپە-جەگىن ايقىن جەڭىسپەن اياقتادى. ەندى ءبىرىنشى جارتىلاي ورتا سالماقتاعى سادريددين احمەتوۆ مەكسيكالىق جوزە فرانسيسكو زينيگامەن ايقاسادى. ول 27 جاستا. كاسىپقويلار اراسىندا جۇدىرىقتاسىپ جۇرگەنىنە جەتى جىلدان استى. سول ۋاقىت ارالىعىندا 27 كەزدەسۋ وتكىزگەن زينگا 14 رەت جەڭىسكە جەتتى. 5 قارسىلاسىن نوكاۋتقا جىبەردى. 11 مارتە ۇتىلىپ, تاعى ەكى باسەكەدە تەڭ ەسەپ تىركەلدى.
عالىم سۇلەيمەن,
«ەگەمەن قازاقستان»
