كينوگەرلەر قاۋىمى كوپتەن كۇتكەن قۋانىشتى ءراسىم «باقشىساراي» سالتانات سارايىندا ءوتىپ, ۇزاق جىلدار فيلم ءتۇسىرۋ ءىسىنىڭ باسى-قاسىندا جۇرگەن ارداگەرلەر مەن جاس بۋىننىڭ كينوداعى ەڭبەگىنە وداق تاراپىنان ءوز باعاسى بەرىلدى.
جۇلدەنى تاعايىنداۋداعى ماقسات تا ۇلتتىق كينەماتوگرافيا سالاسىنىڭ دامۋىنا ۇلەس قوسقان تۋىندىلاردى باعالاۋ جانە حالىققا كەڭىنەن تانىستىرۋ بولاتىن. شىعارماشىلىق جەتىستىكتى نىسانا ەتىپ وتاندىق كينونى وركەندەتۋ جولىندا ەڭبەكتەنىپ جۇرگەن بيىلعى جىلدىڭ ۇزدىكتەرىن انىقتاۋدى مۇرات تۇتاتىن «قۇلاگەر» تەك وسى سالانىڭ عانا ەمەس, جالپى ونەردەگى شىنايى باسەكەلەستىكتى ارتتىراتىن دەڭگەيى بيىك سايىس رەتىندە قابىلداناتىنى راس. سوندىقتان جۇلدەنىڭ ناعىز يەلەرىن تاۋىپ, تابىستالۋى قاشان دا كوڭىل تولقىتاتىن ساتكە اينالعان.
وتاندىق كينونىڭ بيىلعى جىلعى ولجاسى «ورالمان» بولعانىن ونىڭ ەكى بىردەي جۇلدەنى الۋىمەن دە ايقىندالعانداي. كوركەم فيلم بويىنشا ەكى بىردەي ۇزدىك وسى فيلمنەن بوي كورسەتتى: «ۇزدىك فيلم» بولىپ «ورالماننىڭ» ءوزى تانىلسا, وسى فيلمدەگى قايسارلىق تۇنعان وبرازى ءۇشىن دۋلىعا اقمولدا «ۇزدىك اكتەر» بولىپ مويىندالدى. كينوداعى ءوز تۇعىرىن كانن فەستيۆالىندە كوتەرىپ, گەرمانيادا وتكەن كينوسايىستا ودان ءارى بيىكتەتە تۇسكەن سامال ەسلياموۆا بۇل جولى دا «ۇزدىك اكتريسا» اتانۋىمەن سول تۇعىردى ءبىرجولا بەكىتكەندەي بولدى. «ۇزدىك كومپوزيتور» «تۇركىسىب» ءفيلمىن مۋزىكامەن كوركەمدەگەن قۋات شىلدەباەۆقا, «ۇزدىك وپەراتور» ء«ليفتىنى» تۇسىرگەن ازامات دۋلاتوۆقا, «ۇزدىك دىبىسرەجيسسەرى» سەرگەي لوبانوۆقا, «ۇزدىك گريم» ومىرزاق شمانوۆقا, «ۇزدىك كاسكادەر» قاسىم جۇماعوجينگە, «الماس قىلىش» فيلمىندەگى كيىم ۇلگىلەرىن جاساعانى ءۇشىن «ۇزدىك كوستيۋمەر» جۇلدەسى اجار اۋباكىروۆاعا تابىستالدى. ارداق امىرقۇلوۆ «ۇزدىك رەجيسسەردى» ەنشىلەدى. ادامگەرشىلىكتى ەسكە سالىپ, ىزگىلىككە ۇندەيتىن «اكەگە قوڭىراۋ شالۋ» ءفيلمى دە اتاۋسىز قالعان جوق, سەرىك اپىرىموۆ «ۇزدىك ستسەناريدىڭ» اۆتورى رەتىندە جۇلدەگە يە بولدى.
سوڭعى جىلدارى قايتا تىنىسى اشىلعان دەرەكتى كينو سالاسىن جانداندىرىپ, ءونىمدى جۇمىس ىستەپ جۇرگەن عازيز ناسىروۆ پەن انۆارا سادىقوۆا «قازاق ءبيى» دەگەن تۋىندىسى ءۇشىن «ۇزدىك ءفيلمنىڭ» اۆتورلارى اتاندى. ال «التىن ەمەل» دەرەكتى ءفيلمىن تۇسىرگەن ولەگ بەليالوۆ «ۇزدىك رەجيسسەردى» ولجالادى.
بيىل عانا قانات قاعىپ شىقسا دا, قازاق انيماتسياسىنا جاڭالىق اكەلىپ قوسىپ, مۋلتيپليكاتسيانى ءبىر بەلەس بيىككە كوتەرىپ تاستاعان «مۇزبالاقتىڭ» جىلدىڭ «ۇزدىك ءفيلمى» اتانباسىنا ءاددىسى دە جوق ەدى. سونداي-اق ساپالى ساراپتامالارى ارقىلى جارىق كورگەن جاڭا فيلمدەردىڭ سىرىنا بويلاپ, جالپى كينو تۋرالى تولعامدى ويلارىمەن ساۋاتتى سىن قالىپتاستىرۋداعى ەڭبەگى ءۇشىن بەلگىلى كينوتانۋشى ءنازيرا مۇقىشەۆا «ۇزدىك كينوسىنشى» بولىپ تانىلدى. ەشقاشان اكەسىن كورمەگەن بوزبالانىڭ جانتولقىنىسىن جەتكىزەتىن بەرىك جاقانوۆتىڭ «اسانى» «ۇزدىك قىسقامەتراجدى فيلم» رەتىندە اتالعاندا, بۇل قازىلار القاسىنىڭ ادىلەتتى شەشىمى سياقتى قابىلداندى. «ۇزدىك دەبيۋت» «نا گراني» فيلمىنە بەرىلدى. ۇزاق جىلدار بويى كينو سالاسىندا ەڭبەكتەنىپ كەلە جاتقان قادىر قوساي مەن يگور ۆوۆنيانكوعا «قازاق كينوسىنا قوسقان ۇلەسى ءۇشىن» جۇلدەسى تابىستالدى.
ايگۇل احانبايقىزى,
الماتى
