DQ شوۋىندا وسىعان دەيىن حالىق كوڭىلىنەن شىعىپ كەلگەن ۇزدىك توپتامالار مەن جاڭا كومپوزيتسيالار ۇسىنىلدى. 2016 جىلى قىتايدا وتكەن I am singer كونكۋرسىندا شىرقالعان «اداجيو» بۇل جولى دا ديماشتىڭ مارتەبەسىن اسقاقتاتا ءتۇستى. دۋماندى كەشتە «اداي» كۇيىن توگىلتە ورىنداعان ديماش, ەرلىك كۇرەسكە تولى دالا جىرىمەن سان مىڭداعان جۇرەكتى تابىستىرىپ اكەتتى. ال جارق ەتكەن جاسىن تالانت دەنيس تەننىڭ قۇرمەتىنە ورىنداعان S.O.S. D'un Terrien En Detresse ءانىن زال قوسىلا شىرقاپ, وتكەن كۇننىڭ ارتتا قالعان جارقىن ەلەسىن قيماستىقپەن ەسكە الىستى. ءتىپتى ءانشى كوزىنە جاس الىپ, «دەنيس ەكەۋمىز «S.و.S» ءانىن ورىنداپ, بىرگە ونەر كورسەتۋدى ارمانداعان ەدىك. ەندى بۇل ءاندى جالعىز ايتۋىما تۋرا كەلىپ تۇر, دەنيس جادىمىزدا ماڭگى قالار جارىق جۇلدىز», دەپ ساعىنىشپەن جەتكىزدى. پوپ-مۋزىكا كورولى اتانعان مايكل دجەكسوننىڭ تانىمال اندەرىنەن پوپۋري ورىنداپ, ەپيزودتىق بيىمەن ورتانى جاڭاشا تۇرلەنتتى.
ديماشتىڭ ومىردەگى ءھام ونەردەگى تىرەگى, قولداۋشىسى قانات ايتباەۆتىڭ ايتۋىنشا, كونتسەرتكە قاتىسقان جانكۇيەرلەر الىس-جاقىن 47 شەت مەملەكەتتەن كەلگەن. كونتسەرتكە بەلگىلى اعىلشىن ءانشىسى تاليا ستورم دا قاتىسىپ, انشىگە شىعارماشىلىق تابىس تىلەدى.
«استانالىق «تەررا بالەت» توبى, سونىمەن قاتار ۇلت-اسپاپتار انسامبلىندە كەرەمەت ونەر كورسەتىپ جۇرگەن ۇل-قىزدار ءبىزدىڭ قازاقتىڭ اندەرىنە ۇلتتىق رەڭك پەن ءوڭ بەرە وتىرىپ, سۇيەمەل جاسادى. قازاق ايتپاقشى, «جاياۋدىڭ شاڭى, جالعىزدىڭ ءۇنى شىقپايدى». كوپ بولىپ, ەل بولىپ كوتەرگەن جۇك جەڭىل. وسى جەردە قانشاما جانكۇيەر مەن تىڭدارمان بار, ەل-جۇرت بار, ەلدىڭ باسشىلىعى بار - قولداۋ جاساپ جاتقاننان كەيىن وسىنداي جەتىستىكتەرگە جەتىپ جاتىرمىز», - دەدى قانات ايتباەۆ.
سالتاناتتى شوۋعا ارنايى قاتىسقان مادەنيەت جانە سپورت ۆيتسە-ءمينيسترى اقتوتى رايىمقۇلوۆا مادەني شارانى ەلباسى نۇرسۇلتان نازارباەۆتىڭ «رۋحاني جاڭعىرۋ» باعدارلاماسى اياسىندا مادەنيەت جانە سپورت مينيسترلىگى ۇيىمداستىرعانىن اتاپ ءوتتى. سونداي-اق, ساتىلعان بيلەتتەردەن تۇسكەن قارجى حالىقارالىق بايقاۋلارعا قاتىساتىن جاس تالانتتاردى قولداۋ ماقساتىندا جۇمسالاتىن بولادى.
ايا ءومىرتاي,
«ەگەمەن قازاقستان»
