سەنات توراعاسى قازاقستان پارلامەنتى ءۇشىن ەقىۇ پارلامەنتتىك اسسامبلەياسى ءبىرىنشى كەزەكتە ىقىلاس تۋعىزاتىنىن, سەناتورلاردىڭ حالىقارالىق قىزمەتىندە ونىڭ جۇمىسىنا بەلسەندى قاتىسۋ باسىمدىققا يە ەكەنىن ايتتى. ول, سونداي-اق قازاقستانداعى الەۋمەتتىك-ەكونوميكالىق جانە ساياسي رەفورمالار تۋرالى جۇزدەسۋشىنى حاباردار ەتىپ, پرەزيدەنت ن. نازارباەۆتىڭ تاياۋدا جاريا ەتىلگەن جولداۋىنداعى ازاماتتاردىڭ ءال-اۋقاتىن ارتتىرۋعا باعىتتالعان شارالارعا جان-جاقتى توقتالدى. ق.توقاەۆتىڭ پىكىرىنشە, ەۋروپا مەن ازيا اراسىنداعى ساۋدا-ەكونوميكالىق جانە كولىك-لوگيستيكا بايلانىستارىن كەڭەيتۋ باسا نازار اۋدارۋدى تالاپ ەتەدى, ول ايماق تۇراقتىلىعىن قولداۋداعى ماڭىزدى ماسەلەلەردىڭ ءبىرى بولىپ تابىلادى.
سەنات توراعاسى اتاپ وتكەندەي, قازاقستاننىڭ ەقىۇ-مەن ءوزارا ءىس-قيمىلىنىڭ باسىم باعىتتارىنىڭ قاتارىندا كولىك, قاۋىپسىزدىك, كيبەرقاۋىپسىزدىك, زاڭ ۇستەمدىگى مەن تەرروريزمگە قارسى ءىس-قيمىل ماسەلەلەرى بار. ق.توقاەۆ ەقىۇ پا-نىڭ تاياۋدا بىشكەكتە وتكەن سەسسياسىنىڭ ناتيجەلەرى تۋرالى وڭ پىكىر ءبىلدىردى جانە مۇنداي شارالار ورتالىق ازيانىڭ وزەكتى ماسەلەلەرىنە حالىقارالىق قوعامداستىق نازارىن اۋدارۋعا ىقپال ەتەتىنىن ايتتى.
گ.تسەرەتەلي قازاقستاندى ەقىۇ-نىڭ ماڭىزدى ارىپتەستەرىنىڭ ءبىرى رەتىندە اتادى جانە ورتاق قاتەرلەرگە بىرلەسە قارسى تۇرۋ ماقساتىندا ءوزارا ۇنقاتىسۋدى ورىستەتۋگە ەلەۋلى تۇردە كۇش سالۋ نيەتىن ءبىلدىردى. ەقىۇ دەلەگاتسياسىنىڭ باسشىسى قازاقستاندا جۇزەگە اسقان كونستيتۋتسيالىق رەفورمانى جوعارى باعالادى جانە پارلامەنت مىندەتىنىڭ كەڭەيۋى مەن زاڭ ۇستەمدىگىن قولداۋعا ارنالعان قۇقىقتىق وزگەرىستەردىڭ ماڭىزىن اتاپ ءوتتى. گ. تسەرەتەليدىڭ ايتۋىنشا, ەقىۇ سوت-قۇقىقتىق رەفورمالار, ايماقتاعى قاۋىپسىزدىكتى قامتاماسىز ەتۋ, تەرروريزممەن كۇرەس ماسەلەلەرى بويىنشا قازاقستانمەن تىعىز ۇنقاتىسۋدى ودان ءارى جالعاستىرۋ نيەتىندە بولىپ وتىر.
