قازىرگى تاڭدا وڭىردە 2022 جىلعا دەيىن سۋارمالى القاپتاردىڭ كولەمىن 4,6 ەسەگە ارتتىرۋعا دايىندىق جۇمىستارى جۇرگىزىلۋدە. ماسەلەن, اقسۋ اۋىلدىق اۋماعىنا قاراستى «تيمۋر» شارۋا قوجالىعى 2 مىڭ گەكتار جەرىنىڭ 850 گەكتارىن سۋارمالى شارۋاشىلىققا پايدالانۋدا. شارۋاشىلىق كارتوپ, ءسابىز وسىرەدى. بيىل گەكتارىنان 450-500 تسەنتنەر كارتوپ پەن 750-850 تسەنتنەردەن ءسابىز جينادى.
سەرىكتەستىك باسشىسى راۆيل مينگازوۆ شارۋاشىلىقتى دامىتۋعا 2,5 ملرد تەڭگە جۇمساعان. 8 مىڭ توننا كارتوپ پەن مىڭ توننا ءسابىز ساقتايتىن قويما دا سالىپتى. وسىلايشا سۋارمالى ەگىس شارۋاشىلىعىنىڭ تيىمدىلىگىن كورىپ وتىر.
اۋىل شارۋاشىلىعى باسقارماسىنىڭ مالىمەتىنشە, بۇگىندە وبلىس اۋماعىندا كەڭەستىك كەزەڭنەن قالعان 75 مىڭ گەكتار سۋارمالى القاپ بار ەكەن. سوندىقتان «سۋارمالى ەگىنشىلىكتى دامىتۋ» كەشەندى باعدارلاماسى بويىنشا ءاربىر اۋداندا
7 مىڭنان 20 مىڭ گەكتارعا جۋىق جەر بار ەكەنى انىقتالدى. ەندىگى ماقسات – وسى جەرگە الەۋمەتتىك-كاسىپكەرلىك كورپوراتسياسى ارقىلى ينجەنەرلىك ينفراقۇرىلىم تارتۋ.
ال «پوبەدا» جشس بولسا, بىلتىر دا, بيىل دا 3 مىڭ گەكتار جاسىمىق ەگىپ, ءونىمنىڭ 1200 تونناسىن تۇركياعا جونەلتىپتى. شارۋاشىلىق بارلىعى 20 مىڭ گەكتار جەرگە استىق ەگەدى.
قازىر القاپتاردا مايلى داقىلداردى جيناۋ جۇمىستارى ءالى دە جالعاسۋدا. كارتوپتىڭ 518 مىڭ تونناسى, كوكونىستەردىڭ 200 مىڭ تونناسى جينالدى. باقشا داقىلدارى دا مول. مىسالى, پاۆلودار اۋدانىنا قاراستى چەرنوياركا اۋىلىندا شارۋاشىلىقتار كوكونىستەردى قازىپ الىپ, بىردەن سول جەردە ونىمدەرىن ساتۋدا.
باسقارمانىڭ مالىمەتىنشە, بيىل دا استىق جيناۋ بويىنشا گەكتارىنان 13 تسەنتنەردەن جوعارى ءونىم العان جەلەزين مەن ەرتىس اۋداندارى الدا كەلەدى. ەرتىس اۋدانىندا جالپى كولەمى 182 مىڭ گەكتاردان استام استىقتى القاپ بار.
وڭىردە «جولقۇدىق ەلەۆاتورى», «اتو شارباقتى ەلەۆاتورى», «مىڭكول ەلەۆاتورى» جشس-لارى, «اگرو» فيرماسى, «پاۆلودارلىق نيۆا» جانە «ەرتىس اگرو» كاسىپورىندارى جالپى كولەمى 264,3 مىڭ توننا استىق قابىلداي الادى. بۇعان قوسا كوپتەگەن ورتا جانە ءىرى شارۋا قوجالىقتاردىڭ جەكە استىق قويمالارى بار. استىقتىڭ ىلعالدىلىعى از بولسا, ەلەۆاتورلارعا تاسىمالداماي-اق, جينالعان ونىمدەرىن قويمالاردا ساقتايتىن كورىنەدى. كۇزگى جيىن-تەرىمنىڭ ءدامى كوكتەمدە بىلىنەدى.
وڭىردە جالپى كولەمى 1 ميلليون 519 مىڭ گەكتار شابىندىقتان 1311 مىڭ توننا ءشوپ دايىندالدى. كۇزگى دالا جۇمىستارىن جۇرگىزۋ ءۇشىن 21 مىڭ توننا ديزەل وتىنى بولىنگەن. ديزەل وتىنى شارۋالارعا ارزانداتىلعان باعامەن ساتىلدى.
فاريدا بىقاي,
«ەگەمەن قازاقستان»
پاۆلودار وبلىسى
