وبلىستىق دەنساۋلىق ساقتاۋ باسقارماسىنىڭ باسشىسى مانشۇك ايمۇرزيەۆانىڭ ايتۋىنشا, اتىراۋلىقتاردىڭ ورتاشا ءومىر ءسۇرۋ ۇزاقتىعى − 73,2 جاس. بيىلعى ون ايدا ءولىم كورسەتكىشى 2,1 پايىزعا وسكەن, اسىرەسە ءسابي ءولىمى 23 پايىزعا دەيىن كوتەرىلىپ وتىر. مۇنى باسقارما باسشىسى نارەستەلەردىڭ شالا تۋىمەن بايلانىستىرادى. وبلىستىق پەريناتالدىق ورتالىقتا جىل سايىن 500-گە جۋىق بالا ايى-كۇنى جەتپەي ومىرگە كەلەدى. جىل باسىنان بەرى 495 نارەستە شالا تۋعان. قازىر مەديتسينا دامىعان, 400 گرامدىق نارەستەنىڭ دە جانىن ساقتاپ قالۋعا بولادى. دەگەنمەن, بۇل دا وڭاي جۇمىس ەمەس. ەسەپتە تۇرعان جۇكتى ايەلدەردىڭ 23 پايىزىنىڭ دەنساۋلىعىندا كىنارات بار. تاعى ءبىر ماسەلە – تۋبەركۋلەز اۋرۋىنىڭ كورسەتكىشى ەداۋىر ارتىپ وتىر. مۇنى ماماندار ەكپەدەن باس تارتۋدىڭ سالدارى دەيدى. بيىلدىڭ وزىندە 408 ادام قۇرت اۋرۋىنا قارسى ەكپە سالدىرماعان.
وبلىستىق قوعامدىق دەنساۋلىقتى ساقتاۋ دەپارتامەنتى باسشىسىنىڭ ورىنباسارى ەربولات ۋايىسوۆ سوڭعى 3 جىلدا تۇسكەن 153 شاعىمنىڭ جارتىسىنان كوبى مەديتسينالىق قىزمەتتىڭ ساپاسىنا بايلانىستى ەكەنىن ايتادى. سونىڭ ىشىندە اۋرۋحانالاردىڭ سىرقات ادامدى قابىلداۋدان باس تارتۋى, جۇمىسقا جارامسىزدىق جونىندەگى قۇجاتتى الۋداعى قيىندىقتار مەن جەدەل جاردەمنىڭ كەشىگىپ كەلۋى سەكىلدى شاعىمدار ءجيى كەزدەسەدى. وبلىستىق ءماسليحات وتىرىسىندا «دەنساۋلىق» مەملەكەتتىك باعدارلاماسىنىڭ جۇزەگە اسۋى تۋرالى تالقىلاۋدا ە.ۋايىسوۆ تاعى ءبىر پروبلەمانى ايتتى. بۇل – بيولوگيالىق قالدىقتاردى كومۋگە ارنايى ورىن قاراستىرىلماعانى. اۋداندارداعى دەنساۋلىق ساقتاۋ مەكەمەلەرىندە بيوقالدىقتاردى عيمارات اۋلاسىنا توگە سالۋ دەرەكتەرى انىقتالعان. ەمحانالاردا قاڭتارىلىپ تۇرعان قىمبات قوندىرعىلاردىڭ احۋالى دا كوڭىل كونشىتپەيدى. وبلىستىق اۋرۋحاناداعى جالعىز توموگراف جارامسىز كۇيدە تۇرعانىنا ءبىراز ۋاقىت بولدى. سونىڭ كەسىرىنەن تۇرعىندار جەكە ەمحانالارعا قارالۋعا نەمەسە باسقا قالالار مەن ەلدەرگە بارۋعا ءماجبۇر.
جىل سايىن دەنساۋلىق ساقتاۋ سالاسىنا قىرۋار قاراجات بولىنەدى. اتىراۋ وبلىسىندا بيىل 27,9 ملرد تەڭگە وسى باعىتقا قارالدى. سالاداعى شەشىمىن كۇتكەن ماسەلەلەر رەتىن تابارىنا سەنگىمىز كەلەدى.
باقىتگۇل باباش,
«ەگەمەن قازاقستان»
اتىراۋ
