جەڭىلىستىڭ كەرمەك ءدامى
دوپتى حوككەيدەن قازاقستان قۇراماسى الەم چەمپيوناتىندا تۇڭعىش جەڭىلىستىڭ ءدامىن تاتتى. الەمنىڭ ون مارتە چەمپيونى شۆەتسيا كومانداسىمەن ارادا وتكەن تارتىستى ويىندا ەل جىگىتتەرى نەبارى ءبىر گول سوعۋمەن شەكتەلدى.
دوپتى حوككەيدەن قازاقستان قۇراماسى الەم چەمپيوناتىندا تۇڭعىش جەڭىلىستىڭ ءدامىن تاتتى. الەمنىڭ ون مارتە چەمپيونى شۆەتسيا كومانداسىمەن ارادا وتكەن تارتىستى ويىندا ەل جىگىتتەرى نەبارى ءبىر گول سوعۋمەن شەكتەلدى.
شۆەتسيا قۇراماسىمەن وتكەن كەزدەسۋ 1:9 ەسەبىمەن اياقتالدى. قازاقستاندىقتار ءبىرىنشى مينۋتتاردان اشىق ايقاسقا كوشكەن بولاتىن. الايدا, شۆەدتەر ءوز مۇمكىندىكتەرىن ءمۇلت ءجىبەرمەي, ءوز قاقپاسىن قامالدى قورعاعانداي اسقان شەبەرلىكپەن ساقتاي ءبىلدى. ايتا كەتۋ كەرەك, الەكسەي نيكيشوۆتىڭ شاكىرتتەرى قانشا تىرىسقانمەن, قارسىلاستاردىڭ قورعانىسىن بۇزا المادى. ءبىرىنشى تايم 0:5 ەسەبىمەن اياقتالىپ, قازاقستاندىقتار ەكىنشى تايمدا ءبىر گول سوعىپ ەدى. قارىمتا رەتىندە قوناقتارىمىز ءبىزدىڭ ءبىر دوبىمىزعا 4 دوپپەن جاۋاپ قايتاردى.
نورۆەگيا مەن اقش كوماندالارىنان باسىم تۇسكەن قازاقستاندىق حوككەيشىلەردىڭ باعىن الاڭداعى ءتورەشىلەر دە بايلاعانداي بولدى. ساپاسىز تورەلىكتىڭ سىزى ءبىزدىڭ جىگىتتەردىڭ ويىن مانەرىنە پسيحولوگيالىق اسەر بولىپ ءتيدى دەۋگە نەگىز بار. ودان وزگە, بۇل جولى قازاقستان قۇراماسىنىڭ جىگىتتەرى «ءا» دەگەندە العاشقى تاياقتاستاسى جاقسى بولعانىمەن, ويىن باستالعان العاشقى ون مينۋتتان كەيىن تىزگىندى قولدان شىعارىپ الدى. دەنيس ماكسيمەنكو جىبەرگەن قاتەلىك ءۇشىن تورەشى تاعايىنداعان پەنالتيدى شۆەد ستەفان ەريكسون ءساتتى پايدالانا ءبىلدى. العاشقى سوققىدان كەيىن-اق كۇش الىپ كەتكەن قارسىلاستار ءبىزدىڭ قۇرامانىڭ قاقپاسىن ءبىرىنشى تايمنىڭ سوڭىنا دەيىن تەك قاقىراتا سوعۋمەن بولدى.
19-شى مينۋتتا ەريكسون ەكىنشى دوبىن ءتۇسىرىپ ەدى, ەندى ءبىزدىڭ ءجىگىتتەر وتالادى دەپ وتىرعاندا, 23-ءشى مينۋتتا حەلميۋرت قازاقستان قۇراماسىنىڭ قاقپاسىنا تاعى ءبىر دوپتى توعىتتى. بۇعان دەيىنگى ويىنداردا جەڭىمپاز بولعان ءبىزدىڭ جىگىتتەر شۆەدتەرمەن بولعان باسەكەدە دە بارىن سالدى. امال جوق, الەم چەمپيونىنىڭ اتى – الەم چەمپيونى. ونىڭ ۇستىنە دوپتى حوككەيدەن ون مارتە چەمپيوندىق اتاقتى بەرمەي كەلە جاتقان تاجىريبەلى قارسىلاستىڭ ويىن ورنەگى ەرەكشە ەكەندىگىن دە مويىنداۋ كەرەك. شۆەدتىڭ سۇر مەرگەنى اندەرسون 28-ءشى مينۋتتا ءتورتىنشى دوپتى, ال ميكەلسسون 42-ءشى مينۋتتا بەسىنشى دوپتى سوعىپ, ءبىرىنشى تايمدا-اق ويىن تاعدىرىن شەشىپ تاستادى. شۆەدتەر وزدەرىنە بەرىلگەن جەتى مۇمكىنشىلىك – ايىپ دوپ سوعۋ ءساتىنىڭ بەسەۋىن ءوز پايدالارىنا ءتيىمدى قولدانا ءبىلدى. ودان كەيىنگى ويىندا قارسىلاستار ءوز قاقپاسىن كوزدىڭ قاراشىعىنداي قورعاۋعا كوشتى.
ەكىنشى تايمدى قارقىندى باستاعان شۆەد قۇراماسى العاشقى مينۋتتاردا-اق ءبىزدىڭ قاقپاعا ەكى دوپتى سۇڭگىتىپ ۇلگەردى. تەك ءبىزدىڭ ۆياچەسلاۆ بروننيكوۆتىڭ 57-ءشى مينۋتتا سوققان جالعىز گولى قازاقستاندىق حوككەيشىلەردىڭ قارىمتا سوققى بەرۋگە قاۋقارلى ەكەنىن كورسەتتى. بروننيكوۆ وسى چەمپيونات باستالعالى قانجىعاسىنا بەسىنشى گولدى بايلاپ قانا قويعان جوق, الەمدىك دودادا بەت قاراتپاي جۇرگەن ايگىلى كوماندانىڭ قاقپاشىسى اندرەس سۆەنسوننىڭ ءوزىن جەر قاپتىردى.
قالاي دەسەك تە, الەمدىك دوپتى حوككەي بىرىنشىلىگىنە لايىقتى دا شەبەر قۇرامانىڭ كەلگەنىن ءبىزدىڭ جىگىتتەر تانىتا ءبىلدى.
قانات ەسكەندىر.
الماتى.
