قازاقستان رەسپۋبليكاسى پرەزيدەنتى ن.نازارباەۆتىڭ قازاقستان حالقىنا جىل سايىنعى جولداۋى ەلىمىز ءۇشىن ماڭىزى زور وقيعا سانالادى. 2018 جىلعى 5 قازانداعى جولداۋىندا مەملەكەت باسشىسى مەديتسينالىق قىزمەت ساپاسى حالىقتىڭ الەۋمەتتىك كوڭىل-كۇيىنىڭ اسا ماڭىزدى كومپونەنتى بولىپ سانالاتىندىعىن اتاپ ءوتتى.
ءبىزدىڭ «ۇلتتىق نەيروحيرۋرگيا ورتالىعىندا» جولداۋدا ايتىلعان نەگىزگى تاپسىرمالار تالقىلانعان وتىرىس وتكىزىلىپ, حالىققا كورسەتىلەتىن مەديتسينالىق كومەكتىڭ ساپاسىن جوعارىلاتۋ ماقساتىندا 2019 جىلى ورتالىقتا اتقارىلاتىن بىرقاتار جۇمىس جوسپارى ساراپتالدى. ويتكەنى الداعى جىلى كلينيكادا ماڭىزى مەن ءمانى استاسىپ جاتقان جاڭا تەحنولوگيالاردى ەنگىزۋ جوسپارلانۋدا. ولاردىڭ قاتارىندا ورتالىق جۇيكە جۇيەسى اۋرۋلارىن ستەرەتاكسيستى قولدانۋمەن گامما پىشاق قۇرىلعىسىندا راديوحيرۋرگيالىق ەمدەۋ ەپيلەپسيا كەزىندە حيرۋرگيالىق ارالاسۋلار اۋقىمىن ۇلعايتۋ مي باعانى ىسىكتەرىنىڭ ستەرەوتاكسيالىق بيوپسياسى سىندى اۋقىمدى, ءارى حالىققا وتە قاجەت تەحنولوگيالار بار.
ورتالىق جۇيكە جۇيەسى اۋرۋلارىن ستەرەتاكسيستى قولداۋ ارقىلى گامما پىشاق (Gamma Knife) قۇرىلعىسىندا راديوحيرۋرگيالىق ەمدەۋدى ەنگىزۋ ميدىڭ ىسىكتەرى مەن زاقىمدانعان تامىرلارىن ەمدەۋگە مۇمكىندىك بەرەدى. اتالعان قوندىرعىنى قولدانۋدىڭ ءمانى مي ىسىكتەرى مەن قانتامىر پاتولوگيالارىن حيرۋرگيالىق ارالاسۋلارسىز, راديوحيرۋرگيالىق گامما-ساۋلەلەندىرۋ جولىمەن ەمدەۋدەن تۇرادى. بۇل پاتسيەنتتەر ءۇشىن وتە ءتيىمدى ءارى قاۋىپسىز سانالادى. وسى ادىسپەن ءبىر ناۋقاستى ەمدەۋ شەتەلدە شامامەن 20-50 مىڭ ەۋرو تۇراتىن بولسا, ال ءبىزدىڭ ورتالىقتا مۇنداي ەم جۇرگىزۋدى ايتارلىقتاي ارزان ەتۋ جوسپارلانىپ, سونىمەن قاتار ونى جۇزەگە اسىرۋ كۆوتا شەڭبەرىندە قاراستىرىلماق. بۇگىنگى تاڭدا «گامما-پىشاق» نەيروحيرۋرگيالىق تاجىريبەدەگى راديوحيرۋرگيانىڭ جوعارى دالدىكتەگى «التىن» ستاندارتى بولىپ وتىر.
مەديتسينالىق قىزمەتتەر ساپاسىن جاقسارتۋ بويىنشا جۇرگىزىلەتىن جۇمىس اياسىندا ورتالىق ءاربىر ءۇش جىل سايىن مەديتسينالىق كومەك ساپاسىنىڭ جوعارى ستاندارتىن راستايتىن JCI حالىقارالىق بىرىككەن كوميسسياسىنىڭ سەرتيفيكاتتاۋىنان تابىستى ءوتىپ كەلەدى. الدا تاعى ءبىر وسىنداي سىننان ءوتۋ مەرزىمى تايانۋىنا بايلانىستى JCI حالىقارالىق بىرىككەن كوميسسياسىنىڭ سەرتيفيكاتتاۋىنان قايتا وتۋگە وراي 2019 جىلعا ۇلكەن جۇمىس اۋقىمى جوسپارلانۋدا.
بۇعان قوسا, ورتالىقتا كلينيكالىق جۇمىستان بولەك عىلىمي جانە ءبىلىم بەرۋ قىزمەتى بىرىكتىرىلگەنىن دە اتاپ وتكەن ءجون. جىل سايىن ورتالىق بازاسىندا 1500-دەن اسا مامان, سونىڭ ىشىندە وبلىس ايماقتارىنىڭ دارىگەرلەرى دە قايتا دايارلاۋ مەن جۇمىس ورنىندا تاجىريبەدەن ءوتىپ, بىلىكتىلىگىن ارتتىرادى. ويتكەنى ايماقتاردا ەڭبەك ەتەتىن مامانداردىڭ بىلىكتىلىگى تومەن دەڭگەيدە بولسا وڭىرلەرگە مەديتسينالىق تەحنولوگيالار «ترانسفەرتىن» جۇزەگە اسىرۋدا قيىندىقتار تۋىندايدى. ال قايتا دايارلاۋدان وتكەن ماماندار مەدتەحنولوگيالاردى وبلىستارعا ترانسفەرتتەۋدىڭ ءبىر كەپىلى. سونىمەن بىرگە اسا ماڭىزدى باعىتتىڭ ءبىرى نەيروحيرۋرگيا جانە نەۆرولوگيا بويىنشا رەزيدەنتۋرا تىڭداۋشىلارىن دايارلاۋ جۇمىسى جولعا قويىلدى. ءبىزدىڭ كلينيكا, الەۋەتىندە عىلىم مەن تاجىريبەنىڭ وزەكتى تاقىرىپتارىنا ارنالعان شەبەر-سىنىپتار مەن كەزدەسۋلەرى, جاس عالىمدار كونفەرەنتسياسىن جۇيەلى تۇردە وتكىزۋگە مۇمكىندىگى بارلىعى ايان. بۇل جاس عالىمدار ءۇشىن تاپتىرماس الاڭ دەپ ەسەپتەيمىز.
جولداۋدا «وسىعان دەيىن جاسالعان كارديولوگيالىق جانە نەيروحيرۋرگيالىق كلاستەرلەردىڭ تاجىريبەسىن پايدالانىپ, 2019 جىلى استانادا ۇلتتىق عىلىمي ونكولوگيالىق ورتالىقتىڭ قۇرىلىسىن باستاۋ كەرەك» دەپ كورسەتىلگەندەي, ءبىز ورتالىقتا قالىپتاسقان ەمدەۋ جۇمىستارى, عىلىمي ىزدەنىستەر مەن جاڭا تەحنولوگيالاردى ەنگىزۋ ارقىلى ادام دەنساۋلىعىن ساقتاۋدا اتقارىلعان ىسىمىزبەن بولىسۋگە اركەز دايارمىز.
سەرىك اقشولاقوۆ,
قازاقستاننىڭ ەڭبەك ەرى,
«ۇلتتىق نەيروحيرۋرگيا ورتالىعى» اق باسقارما توراعاسى
