ايتۋلى شارادا قازاقستاننىڭ گرەكياداعى ەلشىسى تيمۋر سۇلتانعوجين مادەنيەت جانە سپورت مينيسترلىگىنىڭ قولداۋىمەن «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ قوجا احمەت ءياساۋيدىڭ مۇرالارى جانە تۇركىستان وڭىرىندەگى كيەلى-تاريحي جەرلەرى جايلى كورمەسىنىڭ لەنتاسىن قيدى.
تۋريستىك الەۋەتى دامىعان الپاۋىت ەلدەردىڭ كوشباسشى تۋريستىك ورتالىقتارى قاتىساتىن شارانىڭ باستى ماقساتتارىنىڭ ءبىرى-قازاقستاندىق تۋريستىك نىساندار مەن تاريحي ورىنداردىڭ ماڭىزىن تانىستىرۋ, تاجىريبە الماسۋعا باعىتتالعان.
كورمەگە قورىق- مۋزەي قورىنان 1871-1872 جىلدارى تۇسىرىلگەن ا.كۋننىڭ فوتوالبومىنان تۋىندىلار جانە كەسەنەنىڭ ءار جىلدارداعى بەينەلەرى مەن تۇركىستاننىڭ كورىنىستەرى, تايقازان, شىراعدان سۋرەتتەرى, قوجا احمەت ياساۋي مەن تايقازاننىڭ ماكەتتەرى كوپشىلىك نازارىنا ۇسىنىلادى. سونداي-اق ياساۋي كەسەنەسى مەن قىلۋەت جەراستى مەشىتى, شىعىس مونشاسى, گاۋحار انا, ۋكاشا اتا كەسەنەسى مەن قۇدىعى, ساۋران قالاشىعى سىندى تاريحي ورىنداردىڭ 3D تۋر نۇسقاسى ەلباسىمىزدىڭ تسيفرلاندىرۋ جۇيەسى نەگىزىندە دايىندالىپ, حالىقارالىق كورمەدە العاش رەت كورسەتىلىپ, كوزىلدىرىك ارقىلى تانىستىرىلدى.
سونىمەن قاتار قورىق-مۋزەيدىڭ تاريحي ورىندارى مەن مۋزەي حاقىندا ءۇش تىلدە جارىق كورگەن بۋكلەت كىتاپشالارى مەن جادىگەرلەردىڭ كاتالوگ كىتاپتارى كورمە ەكسپوزيتسياسىنان ورىن الدى.
شاراعا قاتىسۋشى قازاقستاندىق دەلەگاتتار ۇلتتىق كيىمدەر كيىنىپ, قازاقتىڭ ءتول ونەرى كۇي, ءداستۇرلى اندەردى ورىنداپ, ۇلتتىق تاعامدار مەن «اسىق اتۋ», «ارقان تارتۋ» سىندى ويىنداردى دا ناسيحاتتاۋدا.
ايتا كەتسەك, بۇعان دەيىن «ازىرەت سۇلتان» مەملەكەتتىك تاريحي-مادەني قورىق-مۋزەيى تۇركسوي حالىقارالىق ۇيىمىنىڭ قولداۋىمەن تۇركيا رەسپۋبليكاسىندا دا كورمە ۇيىمداستىرىپ, بىرقاتار ءىرى قالالارىنا ياساۋي مۇرالارىن ناسيحاتتاعان بولاتىن. ەۋروپالىق مادەنيەتتىڭ دامۋىنا ۇلكەن اسەر ەتە وتىرىپ تۋريزم سالاسى دامىعان, اسەم لاندشافتى ارالدارعا باي گرەتسيا جەرىنە اقش, ۇلىبريتانيا, گەرمانيا جانە فرانتسيا ازاماتتارى كوپتەپ اعىلىپ, قىزىقتى ءارى تاريحي ورىندارىمەن تانىسۋعا بەيىم. وسى ورايدا, ەلباسى نۇرسۇلتان ءابىش ۇلى نازارباەۆتىڭ «بولاشاققا باعدار:رۋحاني جاڭعىرۋ» باعدارلامالىق ماقالاسىن كەڭىنەن ناسيحاتتاۋ جانە «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ 40 جىلدىعى, تۇركىستان قالاسىنىڭ وبلىس ورتالىعى اتانۋىنا بايلانىستى قورىق-مۋزەي باسشىسى احمەتجانوۆ نۇربولات قادىر ۇلى باستاعان دەلەگاتتار گرەتسياعا جاسالعان ساپار بارىسىندا بىرقاتار تۋريستىك كەلىسسوزدەر جۇرگىزىپ, مادەني-تاريحي مۇرالاردى دارىپتەيدى.
