قازاقستاننىڭ جوعارى, كاسىپتىك وقۋ ورىندارىنىڭ باسشىلارى, الماتى قالاسى ءبىلىم باسقارماسىنىڭ, «نازارباەۆ زياتكەرلىك مەكتەبىنىڭ» جانە ى. التىنسارين اتىنداعى ۇلتتىق ءبىلىم اكادەمياسىنىڭ وكىلدەرى قاتىسقان جيىن بارىسىندا اسحات ايماعامبەتوۆ نازارباەۆ زياتكەرلىك مەكتەپتەرىنىڭ قولدانىستاعى ادىستەمەسى جالپى ءبىلىم بەرۋ جۇيەسىنىڭ نەگىزى رەتىندە قابىلداناتىندىعىن اتاپ ءوتتى. سونىمەن قاتار, ەكونوميكاداعى سۇرانىسقا يە ماماندىقتاردى ەسكەرە وتىرىپ, ورتا مەكتەپتەردەگى بالالارعا كاسىپتىك باعدار بەرۋدىڭ ماڭىزدىلىعىنا ەرەكشە ءمان بەردى.
«نازارباەۆ زياتكەرلىك مەكتەپتەرى» دبۇ باسقارما ءتورايىمى كۇلاش ءشامشيدينوۆا «زاماناۋي مۇعالىم: مەكتەپ پەن جوعارى وقۋ ورىندارىنىڭ بايلانىسى» تاقىرىبىندا بايانداما جاساپ, مەكتەپتەردەگى ءبىلىم بەرۋدى جاڭعىرتۋ, پەداگوگ كادرلاردى دايارلاۋ, وقۋ ءۇردىسىن دۇرىس ۇيىمداستىرۋ ماسەلەلەرى, تاجىريبەلىك ساباقتاردىڭ, وقىتۋ ادىستەرى مەن تەحنولوگيالاردىڭ, ءبىلىم مەن تەحنولوگيانى جۇيەلەۋدىڭ ماڭىزدىلىعىنا توقتالدى. مۇعالىم مەكتەپتەگى باستى تۇلعا. بولاشاق ماماننىڭ تابىسقا جەتۋىندە بىلىكتى پەداگوگتىڭ ءرولى جوعارى. بۇگىندە مەكتەپتەر جوعارى وقۋ ورىندارىنا قاراعاندا زاماناۋي زەرتحانالىق قۇرالدارمەن جابدىقتالعان. ماتەريالدىق بازا كومەگىمەن مۇعالىمنىڭ تاجىريبەلىك ساباقتاردى ۇيىمداستىرۋىنا مۇمكىندىگى مول. پەداگوگيكالىق قىزمەتتىڭ جوعارى ستاندارتتارى ءبىلىم سالاسىنداعى قىزمەتكەرلەردىڭ بىلىكتىلىگىن تۇراقتى ارتتىرۋدى قاجەت ەتەدى.
ى. التىنسارين اتىنداعى ۇبا ۆيتسە-پرەزيدەنتى الماگۇل مۇحامەدحانوۆا ءوز بايانداماسىندا وقۋ ورىندارىنىڭ جاڭارتىلعان باعدارلاماسىنىڭ العاشقى تالداۋلارىنىڭ ناتيجەلەرىندە كەزدەسكەن ماسەلەلەرگە نازار اۋدارۋ كەرەكتىگىن ايتتى. تۇلەكتەردىڭ جاڭارتىلعان باعدارلاماداعى وقۋ ناتيجەلەرى مەن قۇزىرەتتىلىگى ورتا مەكتەپتە وقىتۋدىڭ جاڭا فورماسىنا سايكەس كەلمەيدى ءارى مودۋلدەر مەن پاندەردىڭ تاقىرىپتارى ەسكىرگەن. وسى ورايدا قازاقستاننىڭ بارلىق وڭىرلەرىندەگى جوعارى وقۋ ورىندارىنداعى جاڭارتىلعان باعدارلامالار بارىسىنا توقتالعان الماگۇل مۇحامەدحانوۆا زەرتتەلگەن باعدارلامالاردان ماڭىزدى ءرول اتقارا الاتىن قۇجاتتاردىڭ تابىلماعاندىعىن ايتتى.
الماتى قالاسىنداعى ءبىلىم بەرۋ باسقارماسىنىڭ باستىعى گۇلنار حودجابەرگەنوۆا باعدارلاما بويىنشا كاسىبي-باعىتتالعان ءبىلىم بەرۋدى ەنگىزۋ تۋرالى اقپارات بەرىپ, پەداگوگيكالىق كادرلاردىڭ جەتىسپەۋشىلىگىنە توقتالدى. قازاقستاننىڭ ءبىلىم بەرۋ اليانسىنىڭ بولجامىنا سايكەس, 5 جىلدا قازاقستانداعى مەكتەپ وقۋشىلارىنىڭ سانى 3,5 ميلليونعا, سايكەسىنشە, مۇعالىمدەر مەن مەكتەپتىڭ جۇكتەمەسى 30 پايىزعا ارتىپ وتىرادى. سوندىقتان دا وسىنداي ماسەلەلەرگە دە باسا نازار اۋدارعان ءجون.
قر بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويباەۆ «پەداگوگيكالىق ءبىلىمدى مودەرنيزاتسيالاۋعا ارنالعان جول كارتاسىنداعى ينديكاتيۆتىك كورسەتكىشتەر» تاقىرىبىندا بايانداما جاساپ, سالاداعى وزەكتى ماسەلەلەرگە توقتالدى. ال اباي اتىنداعى قازۇپۋ رەكتورى تاكير بالىقباەۆ جوعارى وقۋ ورىندارىنداعى ءبىلىم بەرۋ ۇدەرىسىن جاڭعىرتۋ, پەداگوگتاردىڭ كاسىبي دەڭگەيىن ارتتىرۋ, مۇعالىمدەردىڭ قىزمەتتىك ساۋاتتىلىعىن كوتەرۋگە قاتىستى پىكىرىمەن ءبولىسىپ, ء بىلىم بەرۋ جۇيەسىنىڭ جەتىلدىرۋدىڭ ماڭىزدىلىعىن اتاپ ءوتتى.
كونفەرەنتسيانى قورىتىندىلاي كەلە ءبىلىم جانە عىلىم ۆيتسە-ءمينيسترى اسحات ايماعامبەتوۆ ءبىلىم بەرۋ سالاسىندا انىقتالعان كەمشىلىكتەردى جويۋ ءۇشىن پەداگوگيكالىق كادرلاردى ءتيىستى جۇيەدە دايارلاۋ جونىندە قاجەتتى شارالار قابىلداناتىنىن ايتتى. سونداي-اق, ءاربىر پەداگوگيكالىق جوعارى وقۋ ورنى تۇلەكتەرىنىڭ, مەكتەپ مۇعالىمدەرىنىڭ بىلىكتىلىگىن, سونىمەن قاتار تسيفرلىق ساۋاتتىلىقتارىن باعالاۋ ءۇشىن سەرتيفيكاتتاۋدان وتەتىن بولادى. سونىمەن قاتار تۇلەكتەردىڭ جۇمىسقا ورنالاسۋ دەڭگەيى تومەن جوعارى وقۋ ورىندارىنا قاتاڭ شارالار قولدانىپ, ۋنيۆەرسيتەتتەردەن ليتسەنزيالارى قايتارىپ الىناتىن بولادى. ال پەداگوگيكالىق ماماندىققا تۇسەتىن تالاپكەرلەر ءۇشىن شەكتى بالل كوبەيتىلەدى.
ەلۆيرا سەرىكقىزى,
«ەگەمەن قازاقستان»
الماتى
