كەلىسىمگە 2017 جىلعى 9 قاراشادا چەليابينسك قالاسىندا قول قويىلعان بولاتىن. قۇجاتتىڭ ماقساتى قازاقستاندىق تاراپتىڭ («قازترانسويل» اق) 141728 توننا مولشەرىندەگى جانە رەسەيلىك تاراپتىڭ («ترانسنەفت – ۋرال» اق – «ترانسنەفت» جاق-نىڭ ەنشىلەس قوعامى) 62048 توننا مولشەرىندەگى تەحنولوگيالىق مۇنايعا مەنشىك يەسى قۇقىقتارىن راستاۋ بولىپ تابىلادى.
زاڭ جوباسى بۇگىنگى كۇندە ءىس جۇزىندە بار مۇنايدىڭ اتالعان ۇيىمدارعا تيەسىلىگىن زاڭدى تۇردە بەكىتەدى, ال كەلىسىمدە كورسەتىلگەن كەستە مۇنايدى مەنشىك يەلەرىنە بەرۋ ءۇشىن قاجەتتى ازاماتتىق-قۇقىقتىق جانە ۇيىمدىق راسىمدەردى جەڭىلدەتۋ مەن بارىنشا تومەندەتۋگە مۇمكىندىك بەرەدى.
قۇجات مەنشىك قۇقىعى مۇنايعا وتكەن كەزدە سالىقتىق مىندەتتەمەلەردەن بوساتۋدى كوزدەيدى. بەرىلەتىن مۇنايعا يەلىك قۇقىعى قازاقستان رەسپۋبليكاسىنا قاتىستى كورپوراتيۆتىك تابىس سالىعىن (تولەم كوزىندە ۇستالاتىن سالىقتى قوسا العاندا) ەسەپتەگەندە كىرىس دەپ تانىلمايدى. سونداي-اق, قازاقستان مەن رەسەيدە جاناما سالىقتاردى (قوسىلعان قۇن سالىعى مەن اكتسيزدى) ەسەپتەۋ ءۇشىن وتكىزۋ (وتكىزۋ بويىنشا اينالىم) بولىپ تابىلمايدى.
مۇنايدى بەرۋ ۇدەرىسى قازاقستاندا سالىق سالىناتىن يمپورت دەپ تانىلمايدى جانە تاراپتار زاڭناماسىندا بەلگىلەنگەن وزگە دە سالىقتار, الىمدار جانە باسقا دا مىندەتتى تولەمدەر الۋعا جاتپايدى.
