ادىلەت مينيسترلىگى زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسيا مۇشەلەرىمەن بىرلەسىپ ۇكىمەتتىڭ 2019 جىلعا ارنالعان جۇمىس جوسپارىن ازىرلەدى. ونىڭ نەگىزىنە ەل پرەزيدەنتى ايقىنداعان, مەملەكەتتىڭ ستراتەگيالىق قۇجاتتارىندا باياندالعان مىندەتتەر الىندى.
مارات بەكەتاەۆ الداعى جىلى «حالىقتىڭ دەنساۋلىعى جانە دەنساۋلىق ساقتاۋ جۇيەسى تۋرالى», «قازاقستان رەسپۋبليكاسىنىڭ ەكولوگيالىق كودەكسى» كودەكستەردىڭ جاڭا جوبالارى, سونداي-اق «پەداگوگتىڭ مارتەبەسى تۋرالى», «مەملەكەتتىك فەلدەگەرلىك بايلانىس تۋرالى» زاڭ جوبالارىن ازىرلەۋ كوزدەلىپ وتىرعانىن جەتكىزدى. سونىمەن قاتار مەملەكەتتىك ورگاندار قۇقىقتىق مونيتورينگ ناتيجەلەرىنىڭ نەگىزىندە بىرقاتار زاڭ جوبالارىن ازىرلەۋدى جوسپارلاپ وتىر.
جالپى جوسپار جوباسى 29 زاڭ جوباسىن ازىرلەۋدى قاراستىرادى. م. بەكەتاەۆ جوسپار جوباسىن قالىپتاستىرۋ كەزىندە زاڭ جوبالارىن جىل ىشىندە پارلامەنتتىڭ قاراۋىنا جوسپارلى ەنگىزۋ قاجەتتىلىگى ەسكەرىلگەنىن ايتتى. ماسەلەن, 2019 جىلدىڭ ءى جارتى جىلدىعىندا پارلامەنتكە 16, ال ءىى جارتى جىلدىقتا 13 زاڭ جوباسىن ەنگىزۋ جوسپارلانۋدا.
«زاڭ جوبالاردىڭ ەڭ كوپ سانىن ازىرلەۋ ەنەرگەتيكا مينيسترلىگىنە تيەسىلى, بۇل 5 زاڭ جوباسى. ۇلتتىق ەكونوميكا جانە قارجى مينيسترلىكتەرى 3 زاڭ جوباسىن ازىرلەيدى. ىشكى ىستەر, دەنساۋلىق ساقتاۋ, اۋىل شارۋاشىلىعى, مادەنيەت جانە سپورت, ءبىلىم جانە عىلىم, ەڭبەك جانە حالىقتى الەۋمەتتىك قورعاۋ مينيسترلىكتەرى 2 زاڭ جوباسىنان ازىرلەيتىن بولادى», — دەدى م. بەكەتاەۆ.
قورعانىس, قوعامدىق دامۋ, قورعانىس جانە اەروعارىش ونەركاسىبى, ينۆەستيتسيالار جانە دامۋ, سونداي-اق باس پروكۋراتۋرا, مەملەكەتتىك قىزمەت ىستەرى جانە سىبايلاس جەمقورلىقپەن كۇرەس اگەنتتىگى ءبىر-ءبىر زاڭ جوباسىنان ازىرلەيتىن بولادى.
«جوسپاردىڭ جوباسى زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسيانىڭ وتىرىسىندا تالقىلاندى. ۇكىمەتتىك ەمەس ۇيىمداردىڭ ۇسىنىستارى ەسكەرىلدى. جوسپاردا كوزدەلگەن زاڭ جوبالارى بويىنشا ءتۇسىندىرۋ جۇمىستارىن ونى قابىلداعاننان كەيىن مەملەكەتتىك ورگاندار جۇرگىزەتىن بولادى», — دەدى مينيستر.
