بۇگىندە باۋىرلاس ەلدەر – قازاقستان مەن تۇركيا اراسىندا تاريحي-مادەني بايلانىستارمەن قاتار ەكونوميكا سالاسىنداعى ارىپتەستىكتىڭ تاريحى تەرەڭگە كەتەدى. باق وكىلدەرىمەن كەزدەسۋدە باس كونسۋل بايلانىستارى تۇركى الەمىنىڭ قويناۋىنا كەتەتىن, رۋحى مەن تاريحى تۋىس ەلدەردىڭ ساياسي-ەكونوميكالىق, ديپلوماتيالىق, تاريحي جانە رۋحاني ماسەلەلەر جايلى كەڭىنەن ماعلۇمات بەردى. رىزا قاعان يىلماز ايتۋىنشا, قازاقستان پرەزيدەنتى نۇرسۇلتان نازارباەۆ پەن تۇركيا پرەزيدەنتى رەدجەپ تايپ ەردوعاننىڭ باستاماسىمەن, ەكى ەل اراسىنداعى ساۋدا اينالىمىن جۋىق ارادا 10 ميلليارد دوللارعا جەتكىزۋ ماقسات ەتىلگەن. ەجەلگى جىبەك جولىن جاڭعىرتۋ ماقساتىندا قولعا الىنعان «زاماناۋي جىبەك جولى» جوباسى مەن جۋىردا عانا ىسكە قوسىلعان باكۋ-تبيليسي-كارس تەمىرجول تورابى باۋىرلاس ەلدەر اراسىنداعى ەكونوميكالىق بايلانىستاردى نىعايتا تۇسەرى انىق. بۇگىندە قازاق جانە تۇرىك ينۆەستورلارى مۇناي, مال شارۋاشىلىعى, ازىق-ت ۇلىك, فارماتسەۆتيكا مەن ەكونوميكانىڭ باسقا دا سالالاردا وتە بەلسەندى. ءتۇبى ءبىر تۇركى ەلدەرى ساياسي, مəدەني, رۋحاني باعىتتاعى بايلانىستارىن تۇركى كەڭەسى, تۇركسوي, تۇركى اكادەمياسى حالىقارالىق ۇيىمدار شەڭبەرىندە دامىتىپ كەلەدى. يراك, سيريا سياقتى سوعىس ءورتى ورشىگەن ايماقتاردا بەيبىتشىلىك پەن تۇراقتىلىقتى قامتاماسىز ەتۋدە دە قازاقستان مەن تۇركيانىڭ مۇددەسى ورتاق.
باس كونسۋل رىزا قاعان يىلماز مىرزا تۇركيانىڭ قايىرىمدىلىق شارالارىنا باسا نازار اۋداراتىنىن ايتتى. مəسەلەن, تۇرىكتەر جەر شارىنداعى كومەككە مۇقتاج ايماقتارىنا 8 ميلليارد دوللارعا جۋىق قاراجات بولگەن, سوعىس بولىپ جاتقان ەلدەردىڭ ازاماتتارىن شەكارادان كەدەرگىسىز وتكىزىپ, ازىق-ت ۇلىك, باسپانامەن قامتاماسىز ەتكەن. بۇگىندە تۇركيادا جۇرگەن سيريالىقتاردىڭ سانى 4 ملن اسادى. تۇركيانىڭ ادام قۇقىقتارىن قورعاۋ مەن گۋمانيتارلىق كومەك كورسەتۋ جوبالارى جايلى دا كەڭىنەن مالىمەتتەر بەردى. بۇگىندە تۇركيا جەر شارىنداعى بەيبىت ءومىردىڭ ورنىقتىلىعىن قالايدى ءارى قازاقستانمەن رۋحاني-مادەني ارىپتەس رەتىندە بەيبىتشىلىك ميسسياسىندا ورتاق قادامدار ۇستانادى.
«سيرياداعى قانتوگىستى توقتاتۋدا تۇركيا مەن قازاقستان بىرلەسە ارەكەت ەتىپ كەلەدى. 2016 جىلى 15 شىلدەدە تۇركيادا اسكەري توڭكەرىس جاساۋعا ارەكەت ەتكەن فەتۋللاحشىلاردىڭ قىلمىسىنان كەيىن تۇركياعا ەڭ ءبىرىنشى بولىپ رەسمي ساپارمەن قازاقستان پرەزيدەنتى نۇرسۇلتان نازارباەۆتىڭ كەلۋى كەزدەيسوقتىق ەمەس.بۇل باۋىرلاس ەل – تۇركياعا دەگەن قولداۋ» دەپ اتاپ ءوتتى باس كونسۋل.
ەلۆيرا سەرىكقىزى,
«ەگەمەن قازاقستان»
الماتى
