ەندەشە, كوڭىل تۇكپىرىنە قوناقتاعان قويىن كىتاپشاداعى كەيبىر پىكىرلەردى وقىرمان نازارىنا قايتا ۇسىنىپ وتىرعان جايىمىز بار. مىناۋ ورىس رەجيسسەرى بوريس پوكروۆسكيدىڭ ايتقانى: «ەگەردە ونەرىمىز اسقاق بولماسا, وندا وركەنيەتتى ەل دە بولمايدى. ءتول مادەنيەتىمىزسىز ەشقانداي ەكونوميكا دا, ەشقانداي ساياسات تا ەڭسەمىزدى كوتەرۋگە كومەكتەسە المايدى». ۇلت مادەنيەتىن ۇلىقتاي ءبىلۋ دەپ ۇقتىق رەجيسسەردىڭ مۇنىسىن. شىنىندا دا ۇلىق ونەر عانا ۇلتتىڭ رۋحىن اسقاقتاتىپ, مارتەبەسىن بيىكتەتەدى ەمەس پە. قاجەت دەسەڭىز ادال ەڭبەك ەتىپ, ناپاقاسىن ايىرۋعا دا, حالىقتىڭ قازىناسىنا قول سۇقپاي, ادال ءومىر ءسۇرۋ داعدىسىن قالىپتاستىرۋدا دا مارتەبەلى مادەنيەتتىڭ ىقپالى ايرىقشا بولارى ءسوزسىز.
ادال ەڭبەك دەمەكشى, اتاقتى گرۋزين اكتەرى ۆاحتانگ كيكابيدزە بۇل جونىندە ءبۇي دەيدى: «ەرتەڭ ءۇرىم-بۇتاعىڭ سەنىڭ ەسىمىڭدى الىپ-جۇرۋدەن, سەنىڭ اۋلەتىڭنەن ەكەنىن ايتۋدان ۇيالمايتىنداي ءومىر ءسۇرۋ كەرەك». ومىرلىك كرەدوسى وسى ونەر ادامىنىڭ. قۇداي-اۋ, كيكابيدزەنىڭ وسى ايتقانى كەرەناۋ كەڭسەلەردە مامىق كرەسلولاردا جانتايعان جاندار كومپيۋتەرىن اشقان ساتتە نەمەسە ۇيالى تەلەفوندارىنان ءسات سايىن جىلتىلداپ شىعىپ تۇرسا, ۇياتى ويانار ما ەدى, كىم ءبىلسىن!؟. ناعىز جۇماق ۇرلىق بولماعان قوعامدا ورنايدى ەمەس پە؟
«قاراپايىمدىلىق قانا حالقىڭمەن جاقىنداستىرا تۇسەدى. پيار سابىن سۋ سياقتى, پايدا بولىپ, جىلدام جوعالىپ كەتەدى. ال ادام بويىنداعى اسىل قاسيەتتەردى ەشقانداي اقشاعا ساتىپ الا المايسىز». جارتى عاسىرعا جۋىق تىڭدارمانىن تاماشا اندەرىمەن تەربەپ, قاراپايىمدىلىعىنىڭ ارقاسىندا حالقىنىڭ قۇرمەتىنە بولەنگەن «ياللا» ءانسامبلىنىڭ جەتەكشىسى فارۋح زاكيروۆتىڭ ايتقانىن بەكەر دەي الماسسىز.
ۇشتاعان پىكىردىڭ ءسوز تۇسىنەتىن كىسىگە ايتار تاعىلىمى از ەمەس. ب.پوكروۆسكي مادەنيەتسىز مەملەكەتتىڭ كوسەگەسى كوگەرمەيتىنىن ءسوز ەتىپ, ۆ.كيكابيدزە ونەر ادامىنىڭ ادال بولۋىن ايتسا, ف.زاكيروۆ وعان قاراپايىمدىلىق سىندى اسىل قاسيەتتى قوسادى. قازاق مادەنيەتىنىڭ ءورىس ولشەمىن وسى ۇشتاعان دەڭگەيىنە سالساق قالاي بولار ەكەن؟!
عابيت ىسكەندەر ۇلى,
«ەگەمەن قازاقستان»
