كورەرمەن نازارىنا 300-دەن استام جادىگەر ۇسىنىلدى. ولاردىڭ اراسىندا كارتينالار, ارتىستەردىڭ پورترەتتەرى, ءتۇرلى جىلدارداعى اڭداتپالار, تەاتر تۋرالى ماقالالار جارىق كورگەن جۋرنالدار, كوستيۋمدەر مەن فوتوسۋرەتتەر بار. سونىمەن قاتار كورمەگە كەلۋشىلەر ماداقتامالار مەن تەاتر اشىلعاندا تابىستالعان العاشقى سيمۆوليكالىق كىلتتەردى تاماشالاي الادى.
– تەاتر ءۇشىن 45 جىل – بۇتىندەي ءبىر ءداۋىر. وسى ۋاقىت ارالىعىندا تەاتردا قانشاما مىقتى تۇلعالار ەڭبەك ەتتى. ءبىز ولارمەن بىرگە جۇمىس ىستەگەنىمىزدى ماقتان تۇتامىز, – دەدى مۋزىكالىق كومەديا تەاترىنىڭ ديرەكتورى امانتاي ىبراەۆ. – سونىمەن قاتار ءبىز جاڭا ەسىمدەردى اشامىز. جىل سايىن بىزگە كوپتەگەن جاس تالانتتار كەلەدى. جاقىندا تەاتردا حالىقارالىق وپەرەتتا جانە ميۋزيكل فەستيۆالى اشىلادى. ال 16 قاراشادا تەاترىمىز كورەرمەندەرمەن جانە جانكۇيەرلەرمەن بىرگە ءوزىنىڭ 45 جىلدىق مەرەيتويىن اتاپ وتەدى.
قاراعاندى اكادەميالىق مۋزىكالىق كومەديا تەاترى ءوزىنىڭ بiرiنشi تەاتر ماۋسىمىن 1973 جىلدىڭ 16 قاراشاسىندا ي.دۋناەۆسكيدىڭ «ۆولنىي ۆەتەر» وپەرەتتاسىمەن اشقان. تەاتر ءوز تاريحىندا گاسترولدىك ساپارمەن قىرعىزستان, رەسەي, ۋكراينا, بەلارۋس, تاجىكستان, قىتاي ەلدەرىنىڭ 200-دەن استام قالاسىندا ونەر كورسەتتى. ونەر ۇجىمىنىڭ رەپەرتۋارىنان 280-نەن استام قويىلىم ورىن العان. ونىڭ ىشىندە زاماناۋي جانە الەمدىك كلاسسيكالىق وپەرەتتانىڭ جاۋھار تۋىندىلارى بار.
قايرات ءابىلدا,
«ەگەمەن قازاقستان»
قاراعاندى
