بۇل تۋرالى تۇرعىن ءۇي-كوممۋنالدىق شارۋاشىلىعىن تسيفرلاندىرۋعا ارنالعان جيىندا كەڭىنەن ءسوز بولدى. وندا مەملەكەتتىك جانە جەرگىلىكتى اتقارۋشى ورگاندار مەن قازاقستاندىق IT-كومپانيالار تۇكش-نى تسيفرلاندىرۋدىڭ بىرىڭعاي تاسىلدەرىن تالقىلاپ, ءوزارا پىكىر الماستى.
باسقوسۋدا پرەمەر-ءمينيستردىڭ ورىنباسارى اسقار جۇماعاليەۆ تۇرعىن ءۇي-كوممۋنالدىق شارۋاشىلىعىندا تسيفرلى تەحنولوگيالاردىڭ ماڭىزدىلىعىنا توقتالىپ ءوتتى. ونىڭ ايتۋىنشا, بۇگىندە قازاقستاندا تۇرعىن ءۇي-كوممۋنالدىق شارۋاشىلىعى سالاسىن تسيفرلاندىرۋ جۇمىسى باستالىپ كەتتى.
تۇكش سالاسىن قالاي تسيفرلاندىرۋ كەرەك؟ تسيفرلاندىرا وتىرىپ, پروتسەسكە قاتىسۋشىلاردىڭ بارلىعىنا ءتيىمدى بولاتىن قانداي جۇيە قۇرۋعا بولادى؟ وزدەرىڭىز بىلەتىندەي, مەملەكەت باسشىسىنىڭ قولداۋىمەن جانە تىكەلەي تاپسىرماسىمەن «تسيفرلى قازاقستان» باعدارلاماسى بەكىتىلگەن بولاتىن. بۇل باعدارلاما ادام مەن مەملەكەتتىڭ بارلىق سالاسىن قامتيدى, دەدى ا.جۇماعاليەۆ.
ال ينۆەستيتسيالار جانە دامۋ ءمينيسترى جەڭىس قاسىمبەك اتاپ وتكەندەي, قازاقستاندا قازىرگى ۋاقىتتا اتالعان سالانى جان-جاقتى قولداۋ ءۇشىن رەفورمالار جۇرگىزىلىپ جاتىر. پارلامەنتتە تۇرعىن ءۇي قارىم-قاتىناسى تۋرالى زاڭ جوباسى تالقىلانۋ ۇستىندە. اتالعان زاڭ جوباسىندا ەلىمىزدەگى تۇرعىن ءۇي-كوممۋنالدىق شارۋاشىلىق سالاسىنداعى جاڭا جۇيەنى تولىق قۇرۋ كوزدەلگەن. وسىعان بايلانىستى بىرقاتار تاپسىرما بار ەكەن. ارينە, بىرىنشىدەن, شارۋاشىلىقتار كورسەتەتىن قىزمەتتىڭ ساپاسىن ارتتىرۋ كەرەك. ەكىنشىدەن, تۇكش سالاسىنداعى قاۋىپسىزدىككە ماڭىز بەرگىمىز كەلەدى. ۇشىنشىدەن, تاريفتەردى بەلگىلەۋدەگى اشىقتىق, وسى سالاداعى شىعىنداردىڭ ەسەبىنىڭ اشىقتىعى ەسكەرىلەدى. سوندىقتان تسيفرلاندىرۋ ماسەلەسى تۇكش سالاسى مەن ونى دامىتۋدا ەڭ ماڭىزدى جۇمىستاردىڭ ءبىرى.
سونداي-اق ءىس-شارادا E-SHANYRAQ تۇرعىن ءۇي قورى مەن تۇرعىن ءۇي-كوممۋنالدىق شارۋاشىلىقتىڭ بىرىڭعاي اقپاراتتىق جۇيەسى ۇسىنىلدى. «تۇكش قازورتالىعى» اق باسقارما توراعاسى نۇرسۇلتان جيەنباەۆتىڭ ايتۋىنشا, جۇيەنىڭ نەگىزگى ماقساتى – كوپشىلىككە قولايلى بولۋى, سونىمەن قاتار مەملەكەتتىك تاپسىرمالارعا قول جەتكىزۋ.
ءىس-شاراعا شەت مەملەكەتتەردەن دە قوناقتار شاقىرىلدى. قازان قالاسى مەرىنىڭ ورىنباسارى يسكاندەر گينياتۋللين تاتارستاننىڭ تۇكش-نى تسيفرلاندىرۋداعى تابىستى تاجىريبەسى تۋرالى, رەسەيلىك «گالاكتيكا» كورپوراتسياسىنىڭ ۆيتسە-پرەزيدەنتى جانە باسقارما مۇشەسى سەرگەي پەتروۆ رەسەيدەگى رەسۋرستىق جابدىقتاۋ قىزمەتىن اۆتوماتتاندىرۋدىڭ ەكونوميكالىق اسەرى تۋرالى, سونداي-اق DIEHL ترانسۇلتتىق كومپانياسىنىڭ تمد ەلدەرى بويىنشا بلوگىنىڭ باسشىسى بەاتە باحترود «اقىلدى» ەسەپتەۋىشتەر جايىندا ايتىپ بەردى. سونىمەن قاتار شارا اياسىندا تۇرعىن ءۇي-كوممۋنالدىق شارۋاشىلىعىندا قولدانۋعا بولاتىن يننوۆاتسيالىق تەxنولوگيالارعا ارنالعان كورمە دە ۇيىمداستىرىلدى.
ەركەجان ايتقازى,
«ەگەمەن قازاقستان»
