نازارباەۆ ورتالىعىندا وتكەن فورۋم جۇمىسىنا قوعامدىق دامۋ ءمينيسترى دارحان كالەتاەۆ, استانا قالاسىنىڭ اكىمى باقىت سۇلتانوۆ, سونداي-اق پارلامەنت پەن قالالىق ءماسليحات دەپۋتاتتارى, ۇكىمەتتىك ەمەس ۇيىم وكىلدەرى جانە جاستار بىرلەستىكتەرىنىڭ جەتەكشىلەرى قاتىستى.
جيىندى اشقان قوعامدىق دامۋ ءمينيسترى دارحان كالەتاەۆ: «وسىدان 15 جىل بۇرىن قازاقستاننىڭ ازاماتتىق اليانسىنىڭ باستاماسىمەن ەلىمىزدە العاش رەت ۇكىمەتتىك ەمەس ۇيىمدار ءوز جۇمىسىن باستاعان بولاتىن. وسى ارقىلى مەملەكەت پەن قوعام, ازاماتتار مەن بيلىك اراسىنداعى كونسترۋكتيۆتىك ديالوگقا, قوعامدىق كەلىسىم مەن تاتۋلىققا قول جەتكىزدىك», دەدى.
ۆەدومستۆو باسشىسىنىڭ ايتۋىنشا, قازاقستاننىڭ بۇل تاجىريبەسى حالىقارالىق دەڭگەيدە قولداۋ تاۋىپ وتىر. سونىمەن قاتار مينيستر مالىمدەمەسىندە ۇەۇ وكىلدەرى ءۇشىن جاعىمدى جاڭالىعىن جەتكىزدى. «فورۋم بارىسىندا اتالعان سالاعا قاتىستى جاعىمدى جاڭالىقپەن بولىسكىم كەلەدى. استانادا ازاماتتىق باستامالار ورتالىعىنىڭ قۇرىلىسى باستالدى. ودان بولەك الەۋمەتتىك كاسىپكەرلىكتى دامىتۋعا ارنالعان بىرقاتار جوبالار قولعا الىنۋدا. ەلىمىزدىڭ بارلىق وڭىرلەرى بويىنشا الەۋمەتتىك جوبالاردىڭ كارتالارى جاسالادى. جالپى, استاناعا بۇكىل رەسپۋبليكا بويىنشا مەملەكەتتىك الەۋمەتتىك تاپسىرىستىڭ شامامەن 11%-ى كەلەدى», دەدى مينيستر.
بۇگىنگى تاڭدا ۇەۇ بويىنشا الماتى قالاسى كوش باستاپ تۇر. 5300 ۇەۇ تىركەلگەن, بۇل رەسپۋبليكاداعى بارلىق ۇەۇ ¼ بولىگىن قۇرايدى. استانا قالاسىندا 2700 ۇەۇ تىركەلگەن. بۇل رەسپۋبليكا بويىنشا 12%-دى قۇرايدى.
پرەزيديۋم مۇشەسى استانا قالاسىنىڭ اكىمى باقىت سۇلتانوۆ ۇەۇ ازاماتتىق قوعامداعى ماڭىزدى جۇمىستاردى اتقارۋشى عانا ەمەس, مەملەكەتتىك الەۋمەتتىك جوبالاردى جۇزەگە اسىرۋداعى سەنىمدى سەرىگىنە اينالعانىن ايتتى. «بۇگىندە استانا اكىمدىگى مەن 30-دان استام ۇەۇ بىرلەسىپ 464 ميلليون تەڭگەگە 66 الەۋمەتتىك ماڭىزى بار جوبالاردى جۇزەگە اسىردى. بۇدان بولەك مەملەكەتتىك باعدارلامالاردى ىسكە اسىرۋدا ۇەۇ قوعامدىق پىكىردى ەسكەرە وتىرىپ جۇمىس ىستەۋ مۇمكىندىگىن تۋعىزادى. سوندىقتان بۇگىنگى فورۋمدا ءبىز قوعامدى دامىتۋعا باعىتتالعان ءاربىر جوبا مەن باسقا دا شەشىلمەي جاتقان ماسەلەلەردى كوتەرىپ, بىرلەسىپ قاراستىراتىن بولامىز», دەدى باقىت سۇلتانوۆ.
استانا قالاسى اكىمىنىڭ ايتۋىنشا, بۇگىندە ەلوردالىق ۇەۇ حالىقتىڭ ءومىر ءسۇرۋ ساپاسىن ارتتىرۋعا باعىتتالعان ناقتى الەۋمەتتىك ماڭىزدى جوبالاردى جۇزەگە اسىرىپ جاتىر.
فورۋم بارىسىندا قاتىسۋشىلار سۇراق قويىپ, جيىن سوڭى پىكىر الماسۋعا جالعاستى. ۇەۇ ءۇشىن گرانتتار ۇسىنۋ, استانا قالاسىنىڭ ۇەۇ مەن ازاماتتىق قوعامعا قولداۋ كورسەتەتىن ازاماتتىق باستامالاردى قولداۋ رەسۋرستىق ورتالىعىن قۇرۋ تۋرالى ماسەلەلەردى قاراستىرعان قارار قابىلدادى.
فورۋم سوڭىندا 19 تامىز بەن 20 قىركۇيەك ارالىعىندا وتكىزىلگەن الەۋمەتتىك جوبالار بايقاۋىندا ۇزدىك دەپ تانىلعان قاتىسۋشىلاردى استانا قالاسى اكىمىنىڭ ورىنباسارى ەرمەك امانشاەۆ ماراپاتتادى. ايتا كەتەيىك, قاراشانىڭ 27-28 كۇندەرى ەلباسىنىڭ قاتىسۋىمەن رەسپۋبليكالىق ازاماتتىق فورۋم وتەدى.
اقمارال اعزامقىزى,
«ەگەمەن قازاقستان»
