«قازاقستان تۋريستىك قاۋىمداستىعى» زتب پرەزيدەنتى روزا اسانباەۆا بۇگىندە ەلىمىزدىڭ ءتۋريزمدى دامىتۋعا الەۋەتىنىڭ زور ەكەندىگىن اتاپ ءوتتى. ونىڭ دالەلىن وتكەن جىلى ەكسپو-2017 كورمەسى اياسىندا ەلىمىزگە كەلگەن تۋريستەر كورسەتكىشىنەن-اق اڭعارۋعا بولادى. الايدا, بۇل كورسەتكىش بيىلعى جىلى الدەقايدا تومەندەپ كەتكەن.
«قازاقستان تۋريزم قاۋىمداستىعى» زتب ديرەكتورى راشيدا شايكەنوۆا قاۋىمداستىق ءتۋريزمدى دامىتۋعا ارنالعان سوڭعى باستامالاردى قۋانىشپەن قابىلداپ وتىرعاندىعىن جەتكىزدى. پرەزيدەنت تاپسىرماسى بويىنشا ىشكى جانە كوشپەلى ءتۋريزمدى دامىتۋعا ارنالعان مەملەكەتتىك باعدارلاما جانە جاڭا زاڭ جوباسى دايىندالۋ ۇستىندە. الاكول, بۋراباي, كاسپي جانە تۇركىستان سىندى باستى تۋريزم ورىندارىن دامىتۋ جوسپارلانعان.
سوڭعى ون جىلدىقتا الەمدىك تۋريزم زور قارقىنمەن دامىپ كەلەدى. سالا جاھاندىق ەكونوميكالىق داعدارىسقا قاراماستان, ەكونوميكانىڭ ەڭ جىلدام دامىپ جاتقان سەكتورلارىنىڭ بىرىنە اينالىپ وتىر. الايدا ەلىمىزدىڭ تۋريزم سالاسى مەملەكەتتىك قولداۋدى قاجەت ەتەدى. بۇگىندە ەلىمىزدەگى 30-دان استام سالا تۋريزممەن تىكەلەي بايلانىستى. ەلىمىزدە بۇگىندە ىشكى ءتۋريزمنىڭ ۇلەسى جوعارى. سوندىقتان دا مەملەكەت تاراپىنان تۋريستىك سالادا ينفراقۇرىلىمدى نىعايتۋعا, كاسىپكەرلەرگە سالىق جەڭىلدىكتەرىن بەرۋدە, جولاۋشى تاسىمالىنداعى جەڭىلدىكتەر سياقتى ت.ب. سالاعا سەرپىن بەرەتىن مۇمكىندىكتەرگە مەملەكەتتىڭ تىكەلەي قولداۋى قاجەت.
اقمولا وبلىسى تۋريستىك قاۋىمداستىعىنىڭ توراعاسى قايرات سۇلتانوۆ بالالار تۋريزمىنە باسا نازار اۋدارۋ قاجەتتىلىگىن العا تارتتى. ەلىمىزدە كەزىندە 500-دەن اسا بالالار دەمالىس ورىندارى بولسا, بۇگىندە ونىڭ شامامەن 200-ءى قالعان. مىسالى, كوكشەتاۋدا 64 لاگەر بولسا, قازىرگى كەزدە 34-ءى قالعان. ال ونىڭ جۇمىس ىستەپ تۇرعانى - 18, 13 لاگەر مەملەكەتتىك بولىپ ەسەپتەلەدى. بۇگىندە بالالار دەنساۋلىعىنا, ولاردىڭ جازعى دەمالىسىنا قاتىستى وزەكتى ماسەلەلەر جەتكىلىكتى. دەنى ساۋ ۇرپاق – ۇلت كەلەشەگىنىڭ كەپىلى ەكەندىگىن نازارعا الاتىن بولساق, ەلىمىزدەگى بارلىق بالالار لاگەرلەرىن قايتا جانداندىرۋىمىز قاجەت. ال «شىعىس قازاقستان تۋريستىك قاۋىمداستىعى» زتب اتقارۋشى ديرەكتورى سەرىك ءجۇنىسوۆ مەملەكەتتىڭ قاتىسۋىنسىز تۋريزم سالاسى العا جىلجىمايدى, دەپ اتاپ ءوتتى. سوندىقتان دا جەكە سەكتور مەن مەملەكەتتىك ورگاندار اراسىندا ءوزارا ىقپالداستىق كەرەك.
ەلۆيرا سەرىكقىزى,
«ەگەمەن قازاقستان»
الماتى
