وبلىس اكىمىنىڭ ءبىرىنشى ورىنباسارى سەرىك شاپكەنوۆ: «بۇل جەردە اتتارى دۇنيە جۇزىنە ايگىلى كومپانيالار جۇمىس ىستەگەندەرىمەن, جەرگىلىكتى كاسىپكەرلەردىڭ تاۋارلارى مەن قىزمەتتەرىن پايدالانۋعا مۇددەلى ەمەس», - دەپ اشىق ايتتى. مىسالى, تەڭىز كەنىشىندە ءبىر ۆاحتالىق اۋىسىمدا 50 مىڭ ادام ەڭبەك ەتەدى. ال ولارعا ازىق رەتىندە بەرىلەتىن تاۋىق ەتى شەكارا اسىپ پولشادان كەلەدى. سەبەپ- ءبىزدىڭ ەت ەۋروستاندارتقا ساي ەمەس ەكەن. وسى ولقىلىقتىڭ ورنىن تولتىرۋ ءۇشىن جەرگىلىكتى اتقارۋشى بيلىك ستاندارتقا سايكەستەندىرىپ قۇس فابريكاسىن سالۋدى, سوسىن مۇنايشىلارعا جەرگىلىكتى ءونىمدى بەرۋدى ۇسىنعان, الايدا فابريكا ىسكە قوسىلعان كۇننىڭ وزىندە ونىڭ ەتىنىڭ وتۋىنە كەپىلدىك جوق. «سوندىقتان, الدىمەن قازاقستاندىق ءونىمدى الىپ, جەتكىلىكسىز بولعان جاعدايدا عانا شەتتەن تاسىمالدايتىنداي ەتىپ زاڭعا وزگەرىس ەنگىزۋ كەرەك», - دەيدى سەرىك شاپكەنوۆ.
وبلىستىق كاسىپكەرلەر پالاتاسىنىڭ باسشىسى ابدوللا ىدىرىسوۆتىڭ ايتۋىنشا, وتاندىق تاۋاروندىرۋشىلەر ونىمدەرىن «NADLoC» پلاتفورماسىنا, مەملەكەتتىك ساتىپ الۋ پورتالىنا ۇسىنا الادى. العا قاراي تكش كوميتەتى بازاسى مەن وتاندىق تاۋاروندىرۋشىلەر رەەسترىن بىرىكتىرۋ جوسپاردا بار, سول ارقىلى جوبالاۋشىلار جەرگىلىكتى تاۋارلار تىزىمىمەن جوبالاۋ ساتىسىندا تانىسادى. ال پالاتا باسشىسىنىڭ ورىنباسارى سەرىك سارسەكەنوۆتىڭ ويىنشا, ساتىپ الۋلاردى وتكىزگەن كەزدە قازاقستاندىق قامتۋ كولەمىن زاڭ جۇزىندە بەكىتۋ كەرەك. قازىر اۋىل شارۋاشىلىعىندا پايدالانىلاتىن تەحنولوگيانىڭ 90 پروتسەنتى شەتەلدەن الىنادى, «ال ونى ءوزىمىز دە شىعارا الامىز», - دەيدى مامان.
ايماقتاعى بيزنەس يەلەرى كاسىپكەرلەر قۇقىن قورعاۋ, مونوپوليستەرگە قاتىستى زاڭ جونىندە دە ويلارىن ورتاعا سالدى. ەلباسى جولداۋىندا كورسەتىلگەن ماقساتتاردى جۇرتشىلىققا ءتۇسىندىرۋ ءۇشىن قۇرىلعان اقپاراتتىق توپ قۇرامىنداعى دەپۋتاتتار كەزدەسۋدە ايتىلعان ماسەلەلەردى ۇكىمەتكە جەتكىزەتىندەرىن ايتىپ تاراستى. بيىلعى جولداۋدا دا بيزنەستى دامىتۋعا باعىتتالعان جۇمىستار انىق كورسەتىلگەن, بۇل اتىراۋلىق كاسىپكەرلەرگە دە سەنىم بەرىپ وتىر.
باقىتگۇل باباش,
«ەگەمەن قازاقستان»
اتىراۋ
