الدىمەن بۇگىنگى قارسىلاسىمىز جايلى ازدى-كەم مالىمەت بەرە كەتسەك. چەحيانىڭ يابلونەتس-ناد-نيسوۋ قالاسىنىڭ كومانداسى 1945 جىلى قۇرىلعان. ستاديونى - "سترشەلنيتسە" 6 مىڭ ادامعا ارنالعان. "يابلونەتس" وسى كەزگە دەيىن ءارتۇرلى اتاۋلارمەن تانىمال بولعان. قازىرگى اتاۋىن 2015-جىلى الدى. ال 2014 جىلعى ماۋسىمدا بۇل كوماندا ءوزىنىڭ تاريحىندا بولماعان جەتىستىككە قول جەتكىزدى. كوماندا چەحيا چەمپيوناتىنىڭ قولا جۇلدەگەرى اتانىپ, كۋبوكتىڭ فينالىندا ونەر كورسەتتى.ء دال وسىندا مارتەبەگە ولاردى باس باپكەر ياروسلاۆ شيلگاۆى جەتكىزدى. ءيا, شيلگاۆى ءبىزدىڭ "استانا" كومانداسىنىڭ جانكۇيەرلەرىنە جاقسى تانىس. سەبەبى, ەكى ماۋسىم بۇرىن "استانا" ياروسلاۆ باپتايتىن "سلاۆيا" پراگا كومانداسىن جەڭىپ ەۋروپا ليگاسىنىڭ پلەي-وفف ساتىسىنا وتكەن ەدى.
"يابلونەتس" "استانامەن" سالىستىرعاندا ەۋروكۋبوكتە تاجىريبيەسىز. سەبەبى, 1997 جىلى جانە 1998 جىلى عانا ەكى رەت ۋەفا كۋبوگىنا قاتىسقان. ال ءبىزدىڭ "استانا" جىل سايىن ەۋروكۋبوكتە ويناعانىمەن قويماي, توپتىق كەزەڭنىڭ تۇراقتى وكىلى. ول از دەسەڭىز, سوڭعى كەزدەرى ءبىزدىڭ چەمپيون كوكتەمدە بولاتىن مىقتىلاردىڭ پلەي-وففىنا دا قاتىسا باستادى. سوندىقتان دا, تاجىريبيە تۇرعىسىندا قازاقستاندىق كلۋبتىڭ باسىمدىلىعى بار. دەگەنمەن, "يابلونەتس" ەۋروكۋبوك ماتچتارىنا قاتتى ماڭىزدىلىقپەن قاراپ, ءاربىر ويىندا وزدەرىن جاقسى جاعىنان كورسەتكىسى كەلەدى.
بيىلعى بىرىنشىلىكتە "يابلونەتس" بەسىنشى ورىندا كەلەدى. بۇكىل چەحيا چەمپيوناتىندا قازىر پاس بەرىپ, اسسيستەنتتىك جاساۋدان "يابلونەتس" ويىنشىسى ميحال تراۆنيك وزىپ تۇر. ونىڭ 8 پاسى گولعا اينالعان. ودان بولەك كوماندانىڭ نەگىزگى قاقپاشىسى ۆلاستيميل گرۋبىي چەحيا بىرىنشىلىگىندە 18 سەيف جاساپ كوزگە تۇسكەن. ال قورعانىستاعى توماش حيۋبشماندى بىلمەيتىن فانات از. چەحيا قۇراماسىمەن تالاي ءىرى دودالاردى جارقىراي ونەر كورسەتتى. ال شابۋىل وتىندە چەرنوگوريا قۇراماسىنىڭ شابۋىلشىسى ۆلاديمير يوۆوۆيچ بار. تانىمال باپكەر ۆلاستيميل پەترجەلانىڭ ايتۋىنشا "يابلونەتس" چەحياداعى ويىنى ەڭ ادەمى كوماندا ەكەن.
