VI فورۋم «جاڭا زامان مەن جاڭا ادامزات: ادامي دامۋ مەن جاسامپازدىق» تاقىرىبىنا ارنالعان. ەكى كۇندىك فورۋمعا 581 ادام قاتىسادى. ولاردىڭ 416-سى 86 مەملەكەت پەن 24 حالىقارالىق ۇيىمنىڭ وكىلدەرى.
فورۋم ماقساتى – حالىقارالىق دەڭگەيدە قاراستىرىلاتىن گۋمانيتارلىق ماسەلەلەردى ەسكەرگەن جاڭا كۇن ءتارتىبىن جاساۋ. حالىقارالىق ۇيىمداردىڭ مۇشەلەرى مەن ساراپشىلار ەكى كۇن بويى وزەكتى ماسەلەلەردىڭ شەشۋ جولدارىن قاراستىرادى. 2010 جىلدان باستاپ وتكىزىلىپ جۇرگەن فورۋمنىڭ باستاماشىلارى – رەسەي مەن ازەربايجان پرەزيدەنتتەرى.
حالىقارالىق گۋمانيتارلىق فورۋم – كوپتەگەن بەدەلدى مەملەكەت قىزمەتكەرلەرىن, نوبەل سىيلىعىنىڭ لاۋرەاتتارىن, بەدەلدى حالىقارالىق ۇيىمداردىڭ باسشىلارىن, زيالى قاۋىم وكىلدەرىن ءبىر ورتادا جينايتىن پىكىرتالاس پەن ديالوگ, جاھاندىق ماسەلەلەردى تالقىلاۋ الاڭى.
فورۋمعا بۇۇ باس حاتشىسىنىڭ ەكى ورىنباسارى, ISESCO, IRCICA, TÜRKSOY, تۇركپا, TWESCO, UNESCO, پارلامەنتارالىق كەڭەس (IPU), بۇۇ ەكونوميكالىق جانە الەۋمەتتىك كەڭەسى (ECOSOC), تمد اتقارۋشى كوميتەتى باسشىلارىنىڭ ورىنباسارلارى قاتىسادى.
سونىمەن قاتار, سۋدان مەملەكەتىنىڭ پرەمەر-ءمينيسترى, رەسەي مەن سلوۆاكيانىڭ ۆيتسە-پرەمەرلەرى, سلوۆەنيا, ۋرۋگۆاي, رەسەي, مىسىر, بەلارۋس, يتاليا, ەستونيا مەملەكەتتەرىنىڭ وكىلدەرى, گرۋزيا, چەرنوگوريا, وزبەكستان, بولگاريا, تۇركيا, سۋدان, تاجىكستان, قازاقستان, ۋكراينا, اۋعانستان, فيليپپين, بولگاريا ەلدەرىنىڭ مينيسترلەرى مەن مينيستر ورىنباسارلارى, بۇدان باسقا 15 مەملەكەتتەن كەلگەن 40 دەپۋتات, 46 ديپلوماتيالىق ۇيىم وكىلى, عالىمدار مەن ساراپشىلار قاتىسادى.
حالىقارالىق گۋمانيتارلىق فورۋم اياسىندا كوپتەگەن مادەني شارالار, ەل استاناسىمەن تانىسۋ باعدارلاماسى قاراستىرىلعان.
