ءدۇبىرلى دودادا 80-نەن اسا مەملەكەتتەن كەلگەن 550 ۇمىتكەر باق سىناۋعا بەل بۋىپ وتىر. جارىستىڭ العاشقى ءتورت كۇنىندە ەرلەر مەن ايەلدەر اراسىنداعى ىرىكتەۋ سىنى وتەدى. 29-30 قازان ارالىعىندا كوماندالىق كوپسايىستى تاماشالايمىز. ودان كەيىن جەكەلەگەن جاتتىعۋلار بويىنشا باسەكەلەر ۇيىمداستىرىلادى. سونداي-اق, دوحاداعى جارىستىڭ ناتيجەسى بويىنشا 2020 جىلى توكيودا الاۋى تۇتاناتىن وليمپيا ويىندارىنىڭ جولداماسىنا يەلىك ەتكەن العاشقى گيمناسشىلار انىقتالادى. ونداي قۇرمەتكە يە بولۋ باق سىناۋعا كەلگەن ەلدىڭ ورەندەرى كوماندالىق سايىستا ۇزدىك ۇشتىكتىڭ قاتارىنان كورىنۋگە ءتيىس.
ەستەرىڭىزگە سالا كەتەيىك, بىلتىر كانادانىڭ مونرەال قالاسىندا وتكەن الەم چەمپيوناتىنىڭ جەكەلەگەن سايىسىندا قىتاي مەن جاپونيا سپورتشىلارىنىڭ قارقىنى وتە كۇشتى بولدى. وسى كوماندا مۇشەلەرى ءۇش-ءۇش التىننان ولجالادى.
ۇلىبريتانيا, گرەكيا, حورۆاتيا, اقش, رەسەي جانە گەرمانيانىڭ وكىلدەرى ءبىر-ءبىر رەتتەن جەڭىس تۇعىرىنىڭ ەڭ بيىك ساتىسىنا كوتەرىلدى. جۇلدە العاندار قاتارىندا يزرايل, ۋكراينا, گوللانديا, كانادا, وڭتۇستىك كورەيا, شۆەيتساريا جانە بەلگيانىڭ ورەندەرى بار. قازاقستاندىقتار اراسىنان ەڭ ۇزدىك كورسەتكىشكە ميلاد كاريمي قول جەتكىزدى. ول ەركىن جاتتىعۋدى 9 ورىنمەن قورىتىندىلادى.
عالىم سۇلەيمەن,
«ەگەمەن قازاقستان»
