كلاسسيكالىق مۋزىكا مايتالمانىنىڭ عاسىر تويىنا ارنالعان ايتۋلى كەشكە استانا قالاسى اكىمىنىڭ ورىنباسارى ەرمەك امانشاەۆ, ازەربايجان رەسپۋبليكاسىنىڭ قازاقستانداعى ەلشىسى راشاد ماممادوۆ, تۇركسوي حالىقارالىق ۇيىمىنىڭ باس حاتشىسى دۇيسەن قاسەيىنوۆ جانە مادەنيەت پەن ونەردىڭ كورنەكتى وكىلدەرى قاتىستى. استانا مەملەكەتتىك اكادەميالىق فيلارمونياسىنىڭ سيمفونيالىق وركەسترى ازەربايجاننان ارنايى شاقىرىلعان قوس ديريجەر – مۇستافا مەحمانداروۆ پەن مۋرتۋزا ءبيۋلبيۋلدىڭ سۇيەمەلدەۋىندە كومپوزيتور قولتاڭباسىنا تيەسىلى اتاقتى ء«لايلى-ءماجنۇن» پوەماسىنان ءۇزىندى, «جەتى سۇلۋ» بالەتىنەن «پرەكراسنەيشايا» جانە «ۆالس» شىعارمالارىن, سونداي-اق «تروپويۋ گروما» بالەتىنەن №2 سيۋيتانى تالعامپاز تىڭدارمان نازارىنا ۇسىندى.
تۇركى كەڭىستىگى قايراتكەرلەرى مەن ايتۋلى تۇلعالالارىنىڭ مەرەيتويلارىن اتاۋسىز قالدىرمايتىن تۇركسوي حالىقارالىق ۇيىمىنىڭ 2018 جىلدى قارا قاراەۆتىڭ جىلى دەپ جاريالاۋى – اۋەنىمەن الەمدى الديلەگەن ازەربايجان كلاسسيكالىق مۋزىكاسىنىڭ ساڭلاعى قارا قاراەۆتىڭ شىعارماشىلىق مۇراسىنىڭ شارتاراپتى شارلاپ, جەر شارىنىڭ تۇكپىر-تۇكپىرىن جايلاعان ونەرسۇيەر تىڭدارمانعا رۋحاني قۋانىش سىيلاۋدىڭ تاپتىرماس مۇمكىندىگىن تارتۋ ەتكەنى ءسوزسىز. ەلوردا تورىندە وتكەن ايتۋلى كونتسەرت اتالعان تاعىلىمدى شارانىڭ ءبىر پاراسى عانا.
قارا ابۋلفازوعلى قاراەۆتىڭ مۋزىكالىق مۇراسى مازمۇن جاعىنان كەڭ اۋقىمدى جانە جانرلىق تۇرعىدان جان-جاقتى. كومپوزيتور قيالىنا قانات بىتىرگەن تۋىندىلار مۋزىكا جانرلارىنىڭ بارلىعىن دەرلىك قامتيدى. ءوزىنىڭ سانالى شىعارماشىلىق عۇمىرىندا سازگەر 3 وپەرا, ءدال سونداي ەسەپتە بالەت پەن سيمفونيا, سونداي-اق كوپتەگەن تاقىرىپتىق ءھام باعدارلامالىق تۋىندىلار مەن كامەرالىق, اسپاپتىق وركەسترلەرگە جانە دە بىرنەشە سپەكتاكل مەن ءتۇرلى كينوفيلمدەرگە ارناپ اۋەن جازدى. قارا قاراەۆ شىعارماشىلىعىنىڭ باعىتى مەن ءستيلى نەگىزىنەن ەموتسيانالدى جارقىندىق, درامالىق تەرەڭدىك جانە نازىك ليريكانى ءوزارا ءساتتى ۇيلەستىرە وتىرىپ, سودان وزىنە عانا ءتان دارا تىنىسىن ءدوپ باسۋىمەن ەرەكشەلەنەدى. كومپوزيتوردىڭ اۋەن الەمىنە دەن قويعان تىڭدارمان سازگەر قولتاڭباسىنان ايگىلى اقىن نيزامي شىعارماشىلىعىنان ءنار العان شابىتتى دا جارقىن شىعىس ءداستۇرىنىڭ نازىك يىرىمدەرىن جازباي تانيدى. ول, اسىرەسە اۋەن ءامىرشىسىنىڭ ء«لايلى-ءماجنۇن», «جەتى سۇلۋ» شىعارمالارىنىڭ ساز سارىنىندا ايقىن اڭعارىلادى. ءتىپتى كومپوزيتور ءومىرىنىڭ سوڭىندا جازىلعان تۋىندىلار اۋەزىندە دە وسى قۇنار ساقتالعان. ياعني, ق.قاراەۆ شىعارماشىلىعىنىڭ نەگىزگى ءتىنى, وزەگى – حالىق مۋزىكاسىنىڭ جاۋھارلارى.
«استانا» كونتسەرت زالىنىڭ تورىندە وتكەن مۋزىكا كەشىنە جينالعان ونەرسۇيەر قاۋىم سوزبەن ايتىپ جەتكىزگىسىز عالامات كۇيدى استانا مەملەكەتتىك اكادەميالىق فيلارمونياسى سيمفونيالىق وركەسترىنىڭ ورىنداۋىندا جاھاندى سازىمەن تەربەگەن ايگىلى ازەربايجان كومپوزيتورىنىڭ تالعامپاز تابيعاتىنان سەزىنىپ, ءبىر-اق دەممەن وتكەن كونتسەرت شىمىلدىعىن قيماي جاپتى. ازەربايجان اۋەن الەمىنىڭ پاديشاھى – قارا قاراەۆتىڭ عاسىر تويىنا ارنالعان سالتاناتتى كەشتىڭ تاعىلىمى مەن ءمانى دە وسى ءبىر عاجايىپ مۋزىكانىڭ ءمىنسىز مانەرىمەن شەبەر ۇيلەسىپ, تىڭداۋشىسىن تىلسىم سىردىڭ تۇڭعيىعىنا بويلاتتى.
نازەركە جۇماباي,
«ەگەمەن قازاقستان»
