قاراعاندى وبلىسىنىڭ اكىمدىگى جانە «ارسەلور ميتالل تەمىرتاۋ» اق باس ديرەكتورى پارامجيت كالون الەۋمەتتىك ماڭىزى بار نىسانداردى سالۋ تۋرالى مەموراندۋمعا قول قويدى. بۇل سوڭعى 8 جىل ىشىندە الەۋمەتتىك جاعدايدى جاقسارتۋعا باعىتتالعان قول قويىلىپ وتىرعان العاشقى قۇجات.
مەملەكەت باسشىسى جاقىندا كەنشىلەر وڭىرىنە جاساعان ءىسساپارى بارىسىندا تەمىرتاۋلىقتاردىڭ تۇرمىسىن جاقسارتۋعا باعىتتالعان بىرقاتار تاپسىرمالار بەرگەن بولاتىن.
نۇرسۇلتان نازارباەۆ جاڭا ەمحانا, بالالار باقشاسىن, سپورتتىق ساۋىقتىرۋ كەشەنىن سالۋ تۋرالى تاپسىرما بەرگەن ەدى. الەۋمەتتىك جاۋاپكەرشىلىك شەڭبەرىندەگى اتالعان جۇمىستارعا جۇمسالاتىن بارلىق شىعىنداردى «امت» ءوز موينىنا الادى. قازىرگى ۋاقىتتا ءاربىر نىسان بويىنشا جوبالار ازىرلەنگەن. بارلىق نىساندار جاڭا زامان تالاپتارىنا ساي ۇلگىدە سالىناتىن بولادى.
«مەملەكەت باسشىسىنىڭ ارقاسىندا 20 مىڭ ادامعا ارنالعان ەمحانا سالىنىپ, ەڭ باستىسى بۇل نىسان الداعى ۋاقىتتا قالاداعى مەديتسينالىق مەكەمەلەر بويىنشا قاجەتتىلىكتى تولىقتاي شەشەدى. ال 320 ورىنعا ارنالعان بالالار باقشاسىنىڭ سالىنۋى تەمىرتاۋ قالاسىنا وبلىستا ءبىرىنشى بولىپ تولىققاندى مەكتەپكە دەيىنگى ساپالى تاربيە بەرۋگە اۋىسۋعا مۇمكىندىك جاسايتىن بولادى. اتالعان ماسەلەلەر ەلباسىمىزدىڭ جولداۋىندا ايتىلعان بولاتىن. ءبىر سوزبەن ايتقاندا, بالالاردى بالاباقشاعا 3 جاستان باستاپ ەمەس, 1 جاستان باستاپ قابىلداۋعا مۇمكىندىك تۋاتىن بولادى», دەپ تولىقتىردى ءوڭىر باسشىسى.
ەمحانا مەن بالاباقشادان وزگە ەلباسى بەرىلگەن تاپسىرمانىڭ شەڭبەرىندە قالادا جاڭا زامانعا ساي دەنە شىنىقتىرۋ جانە ساۋىقتىرۋ كەشەنى سالىناتىن بولادى. سپورتتىق نىسان 320 ورىنعا ارنالعان. اتالعان نىسان 30 مىڭ تۇرعىنى بار ىقشام اۋداننىڭ جانىنان بوي كوتەرەتىن بولادى.
ءوز كەزەگىندە پارامجيت كالون اتالعان الەۋمەتتىك ماڭىزى بار نىسانداردىڭ قارقىندى تۇردە سالىناتىنىن اتاپ ءوتتى. «بارلىق ايتىلعان نىسانداردى ءبىز بەلگىلەنگەن مەرزىمدە سالۋعا كۇش سالاتىن بولامىز. قۇرىلىس جۇمىستارى بارىنشا جىلدام جۇرگىزىلەتىن بولادى. قۇرىلىس جۇمىستارى اياقتالعان سوڭ ءبىز اتالعان نىسانداردى پرەزيدەنتكە كورسەتەتىن بولامىز» - دەپ اتاپ ءوتتى پارامجيت كالون.
سونىمەن قاتار تەمىرتاۋ قالاسىندا ساپالى جىلۋ بەرۋدى قامتاماسىز ەتۋگە باعىتتالعان شارالار قولعا الىنۋدا. ەلباسى 2-جەس مودەرنيزاتسيالاپ, 7 قازاندىقتى سالۋدى تالاپ ەتكەن بولاتىن. قازىرگى ۋاقىتتا بارلىق ماسەلەلەر شەشىلىپ, جوبالىق سمەتالىق قۇجاتتار ازىرلەنىپ جاتىر. كەلەسى جىلى اتالعان نىساننىڭ قۇرىلىسى باستالاتىن بولادى.
