جاستارعا دەگەن سەنىم زور
ەلباسى حالىققا ارناعان جولداۋىندا اگروونەركاسىپ كەشەنىنىڭ الەۋەتىن ارتتىرۋدىڭ ناقتى جولدارىن بەلگىلەپ بەردى. وندا كاسىپكەرلەرگە شارۋاشىلىق جۇرگىزۋدىڭ جاڭا داعدىلارىن ۇيرەتۋ ءۇشىن جاپپاي وقىتۋ جۇيەسىن ەنگىزۋ مىندەتىنە ايرىقشا نازار اۋدارىلدى.
بۇل ماسەلە اۋىلدىقتار ءۇشىن وتە وزەكتى. بۇل ماقساتقا جىل سايىن قوسىمشا 100 ميلليارد تەڭگە قاراستىرىلماق. وسىلايشا اگرارشىلاردى كوپتەن بەرى تولعاندىرىپ كەلگەن ءتۇيىندى پروبلەما شەشىمىن تاپقانى قۋانتادى.
بۇگىنگى كۇنى ەكىنىڭ ءبىرى شاعىن جانە ورتا بيزنەسپەن شۇعىلدانعىسى كەلەدى. ونداعى ويلارى – باعدارلامالارعا قاتىسۋ, جەڭىلدىكتى, قايتارىمى تومەن نەسيە الۋ. قاعاز ءبارىن كوتەرەدى دەمەكشى, بيزنەس-جوسپارلاردان ءمىن تابۋ قيىن. الايدا, ىنتا-تالاپتارى قۇپتارلىق بولعانىمەن, كەيبىرى ەكونوميكانىڭ قىر-سىرىن بىلمەگەندىكتەن, ماڭدايى تاسقا تيگەندەي كۇي كەشىپ جاتادى. ونىڭ ءبىر سەبەبى, تاجىريبەنىڭ جوقتىعى جانە دە بيزنەستى تەك پايدا تابۋ كوزى رەتىندە عانا تۇسىنەتىنى. حالىققا ساپالى قىزمەت كورسەتۋ كەرەكتىگىن كەي كەزدەرى ەستەن شىعارىپ جاتادى. جاس بۋىندى وسىنداي قاتە تۇسىنىكتەردەن ارىلتۋ مۇمكىندىكتەرىن الداعى ۋاقىتتا كوپشىلىك بولىپ قاراستىرعان ابزال. مەنىڭشە, جوعارى وقۋ ورنىن بىتىرگەن مامان بىردەن لاۋازىمدىق قىزمەتكە ۇسىنىلماي, الدىمەن ءوندىرىس ورىندارىندا كاسىبي شەبەرلىگىن شىڭداۋ سەكىلدى ەڭبەك ساتىلارىنان وتكەنى ءجون. بويلارىنان جۇمىسقا دەگەن تاباندىلىق, تاپسىرىلعان ىسكە جاۋاپكەرشىلىك, ۇيىمداستىرۋشىلىق قابىلەتى سەزىلىپ تۇرسا, مۇنداي بىلىكتى كادرلاردىڭ سۇرانىسقا يە بولارى انىق. ءبىزدىڭ سەرىكتەستىكتە ەڭبەك ەتەتىن مامانداردىڭ ۇشتەن ءبىرى جاستار. م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىمەن جاسالعان كەلىسىمگە سايكەس تەگىن وقىتامىز. وقۋ ءبىتىرىپ كەلگەن سوڭ كەمىندە بەس جىل جۇمىس ىستەۋ مىندەتتەلەدى. وسى ارالىقتا شارۋاشىلىقتى باسقارۋعا ارالاسىپ, سوزىنە ءىسى ساي مامان رەتىندە تاربيەلەنەدى. ارالارىندا سەنىمدى اقتاپ, جاقسى قىزمەتتە جۇرگەندەر از ەمەس.
بۇگىندە جاستاردىڭ اۋىلدىق ەلدى مەكەندەرگە بارۋى سيرەپ بارا جاتقانى الاڭداتادى. اسىرەسە تراكتورشى, كومباينشى سەكىلدى ماماندىقتار وتە تاپشى, جاسى ەگدە تارتىپ قالعان ازاماتتار اتقارىپ ءجۇر. ولار ەرتەڭ زەينەتكە كەتسە, ورنىن باساتىن ءىزباسارلار تابۋ قيىن. بۇل ماسەلە بىزدە شەشىمىن تاپقانىمەن, كوپ اۋىلعا وسى كورىنىس ءتان. تۇركىستان وبلىسىنان كوشىپ كەلگەن ءبىر جاس وتباسىنى مەڭگەسەر اۋلىنا مەحانيزاتور ەتىپ ورنالاستىرىپ, ءۇي-جايمەن, مالمەن قامتاماسىز ەتتىك. كەلىنشەگى بالاباقشادا جۇمىس ىستەيدى. جەڭىلدىكپەن نەسيە الۋعا دا كومەكتەستىك. ەكەۋى دە ىسكەر. قوسالقى شارۋاشىلىقپەن دە اينالىسادى. بۇل باستامانى «اقسەلەۋ» جشس-نىڭ ديرەكتورى سەرىك مالاەۆ قولداعانىمەن, بەلسەنىپ شىققان باسشىلار قاتارى از. جولداۋدا اتاپ كورسەتىلگەندەي وقۋ بىتىرگەن ستۋدەنتتەردىڭ جۇمىسپەن قامتىلۋى, جالاقىسى جوعارى جۇمىسقا ورنالاسۋى – جوعارى وقۋ ورنىنىڭ تابىستىلىعىن باعالاۋدىڭ باستى كريتەريى. ال جاس مامانداردىڭ تۇرمىس ساپاسىنا كوڭىل ءبولۋ, ولار ءۇشىن ءومىر سۇرۋگە جايلى ورتا قالىپتاستىرۋ – ەل ەرتەڭىن ويلاۋ دەگەن ءسوز.
جولداۋدا جاستار مەن وتباسى ينستيتۋتىن كەشەندى قولداۋدى مەملەكەتتىك ساياساتتىڭ باسىمدىعىنا اينالدىرۋ تالابى قويىلدى. كەلەسى جىل جاستار جىلى دەپ جاريالاندى. جاستاردىڭ بارلىق ساناتىن قولداۋعا ارنالعان شارالاردى وڭىرلىك دەڭگەيدە ىسكە اسىرۋدىڭ ماڭىزى ايرىقشا.
ەركەبۇلان مامبەتوۆ,
«مامبەتوۆ جانە ك» كومانديتتىك سەرىكتەستىگىنىڭ باس ديرەكتورى
سولتۇستىك قازاقستان وبلىسى
وركەندەتۋ ىسىنە ۇلەس قوسامىز
ەلباسىنىڭ بيىلعى جولداۋى ەلىمىزدىڭ الەۋمەتتىك-ەكونوميكالىق, سوت-قۇقىقتىق سالالارىنىڭ جۇمىسىن كەڭىنەن ايقىنداعان, قورىتقان, ناقتى قادامدارعا باعىتتاۋىمەن ىلگەرىرەكتەگى تاريحي قۇجاتتاردىڭ قاتارىن تولىقتىرعان وزگەشە جولداۋ بولعانىن باسا ايتۋىمىز كەرەك. ەلباسى ءوزى بەلگىلەپ, سەنىم ارتقان ءاربىر باعىت جاستارمەن, جاستاردىڭ ومىرىمەن تىكەلەي بايلانىستى. پرەزيدەنت الداعى جىلدى جاستار جىلى دەپ جاريالادى. ەلباسى وسى قۇجات ارقىلى جاستاردى ۇلكەن جەتىستىكتەرگە جەتكىزەتىن ءىس-شارالاردى ۇيىمداستىرىپ, ولاردىڭ ءبىلىم, اقىل-وي, ەڭبەك قابىلەتىن اشۋعا مۇمكىندىك بەرىپ وتىر.
بۇگىنگى كۇنى ءبىزدىڭ بولىمشەمىزدە الەۋمەتتىك-ەكونوميكالىق باعىتتى ارتتىرۋ جانە قازاقستانداعى باسەكەگە قابىلەتتى جاستار قاتارىن تولىقتىرۋ ماقساتىندا بىرقاتار جوبالار قولعا الىنا باستادى. وزىنە ارنايى جىل بەلگىلەنىپ, ەلباسى تاراپىنان قولداۋ بەرىلىپ جاتقان مۇمكىندىگىن پايدالانا وتىرىپ, جاستار دا مەملەكەتتىك كەپىلدىكتەردىڭ تولىققاندى جانە ساپالى جۇزەگە اسىرىلۋىنا ءوز كۇش-جىگەرىن باعىتتاۋى قاجەت. جولداۋدا ايتىلعان ءبىلىم, جۇمىسپەن قامتاماسىز ەتۋ, باسپانا الۋ ماسەلەلەرىنىڭ ءبارى جاستارعا تىكەلەي قاتىستى بولعاندىقتان, ولاردىڭ ءوزى دە يگى ماقسات ءۇشىن مۇددەلىلىك تانىتىپ, مەملەكەت باسشىسىنىڭ قامقورلىعىن پايدالانا وتىرىپ, سەنىمدى, ناتيجەلى قادام جاساۋى ءتيىس.
ايتسە دە جاستار تەك يگىلىكتىڭ پايدالانۋشىسى عانا ەمەس, باستاماشىسى ءارى وركەندەتۋشىسى ەكەنىن دە ۇمىتپاۋى كەرەك. جوعارى وقۋ ورنىندا ءبىلىم العان نەمەسە وندىرىستە ەڭبەك ەتىپ جۇرگەن ءاربىر جاس مامان بىلىكتىلىگىن كورسەتىپ, جاڭا زامانمەن باسەكەلەسە الاتىن قابىلەتىن دالەلدەپ, بەلسەندىلىك تانىتىپ, جاڭا جاستار جىلىن جاراسىمدى ەتە الادى.
ەرزات مىسىر,
قازاقستان حالقى اسسامبلەياسى جانىنداعى «جاراسىمدى جاستار» قالالىق فيليالىنىڭ توراعاسى
الماتى
ەل دامۋى باسەكەگە قابىلەتتى ۇرپاق قولىندا
پرەزيدەنت نۇرسۇلتان نازارباەۆتىڭ قازاقستان حالقىنا ارناعان ءاربىر جولداۋىن جۇرتشىلىق اسىعا كۇتەدى جانە قىزۋ تالقىلايدى. ول مەملەكەتتىك باعدارلامالاردىڭ جەتكەن ناتيجەلەرىن تالداۋعا, بولاشاققا ناقتى جاڭا مىندەتتەر قويۋعا ارنالعان ستراتەگيالىق قۇجات بولىپ تابىلادى.
ەلباسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋى 2050 جىلعا دەيىنگى مەملەكەتتىك باعداردىڭ باسىمدىقتارىن ىسكە اسىرۋدىڭ لوگيكالىق جالعاسى بولىپ تابىلادى. وندا تۇرمىس سالاسىن دامىتۋ بويىنشا باستى مىندەتتەر ايقىن كورسەتىلگەن – حالىقتىڭ ءال-اۋقاتىنىڭ ءوسۋىن قامتاماسىز ەتۋ, مەملەكەتتىڭ الەۋمەتتىك-ەكونوميكالىق دامۋى.
جولداۋدىڭ ءبىرىنشى مىندەتى – پرەزيدەنتتىڭ 2019 جىلدان باستاپ ەڭ از جالاقى مولشەرىن 1,5 ەسەگە ارتتىرۋ.
2025 جىلعا دەيىن كاسىپكەرلىكتى قولداۋ جونىندەگى جاڭا باعدارلامانىڭ اۋقىمى وتە زور. ونى ىسكە اسىرۋدىڭ ناتيجەسىندە 22 000 جاڭا جۇمىس ورنى پايدا بولادى.
مەملەكەت باسشىسى اۋىل شارۋاشىلىعى ونىمدەرىن وندىرۋشىلەردى قولداۋ, سەرپىلىستى جوبالاردى ىسكە اسىرۋ, كولىك ينفراقۇرىلىمىن دامىتۋ جونىندە جانە وزگە دە بىرقاتار مىندەتتەردى جاريالادى.
ءوزىنىڭ جولداۋىندا ەلباسى يننوۆاتسيالىق جانە سەرۆيستىك دامۋ قاجەتتىگىنە ەرەكشە كوڭىل ءبولدى. وسىعان بايلانىستى ەل پرەزيدەنتى بالامالى ەنەرگەتيكا, ۇلكەن مالىمەتتەر, ينتەرنەت-يننوۆاتسيالار, جاساندى ينتەللەكت, بلوكچەين جانە وزگە دە وسى سياقتى «بولاشاق ەكونوميكالار» باعىتىندا دامۋدى قامتاماسىز ەتەتىن ارنايى باعدارلامالاردى, ناقتى جوبالاردى ازىرلەۋدىڭ ماڭىزدى ەكەنىن اتاپ ءوتتى. «كەلەشەكتە ەلدىڭ جاھاندىق الەمدەگى ورنى مەن ءرولى وسىعان بايلانىستى بولادى», دەدى مەملەكەت باسشىسى.
بىلىكتى مامانداردى دايارلاماي, دارىندى جاستاردى قولداماي اتالعان باعىتتاردى تولىق ىسكە اسىرۋ مۇمكىن ەمەس. بۇل مىندەتتەر قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورىنىڭ ميسسياسىنا تىكەلەي بايلانىستى, ولار – دارىندى جاستارعا كومەك كورسەتىپ, قوعامدىق-ماڭىزدى الەۋمەتتىك جوبالاردى قولداي وتىرىپ, قوعامىمىزدىڭ شەكسىز الەۋەتىن دامىتۋ. قوردىڭ ۇستىمىزدەگى جىلى وتكىزىلگەن ءىس-شارالارىنىڭ 60%-ى جاستاردىڭ عىلىمداعى, IT جانە شىعارماشىلىقتاعى قابىلەتىن دامىتۋعا باعىتتالعان. باستى نازار IT سالاسىنداعى بىلىمگە جانە عىلىمدى دامىتۋعا اۋدارىلعان.
ءتورتىنشى تەحنيكالىق رەۆوليۋتسيا ۇردىسىندە قالىپتاسىپ وتىرعان جاڭا تەحنولوگيالىق جاعدايعا جاستاردى دايارلاۋ ءۇشىن ءبىز 2 جىلدىڭ ىشىندە «Method PRO» جوباسىنىڭ اياسىندا قازاقستاننىڭ 300 وقۋشىسى مەن ستۋدەنتىن كود ازىرلەۋ جانە باعدارلاما جاساۋ نەگىزدەرىنە وقىتتىق. بالالار قازاقستاننىڭ, جاقىن جانە الىس شەتەلدىك IT-يندۋستريانىڭ ۇزدىك ماماندارىنان تەگىن كاسىپتىك IT-وقۋدان ءوتتى. ۇستىمىزدەگى جىلدىڭ قورىتىندىسى بويىنشا باعدارلاماعا قاتىسۋشىلار ءىرى وتاندىق كومپانيالارعا ارنالعان 40 جوبالىق شەشىم ازىرلەدى. ۇزدىك جوبالار وندىرىسكە ەنگىزىلدى, ال ستۋدەنتتەرگە ءىرى ۇلتتىق كومپانيالارعا جۇمىسقا ورنالاسۋ بويىنشا ءتيىمدى ۇسىنىستار كەلىپ ءتۇستى.
«Smart Zholy» IT-جوباسىن ىسكە اسىرۋ وڭتۇستىك-شىعىس ازيانىڭ جانە حالىقارالىق IT-حابىنىڭ جەتەكشى ستارتاپ-الاڭدارىمەن تىعىز بايلانىستا جۇزەگە اسىرىلۋدا. ناتيجەسىندە قازاقستاندىق ازىرلەمەلەر ءوڭىردىڭ توپ-100 ستارتاپ توبىنا ەندى. قازاقستاندىق Webtotem ستارتاپى وڭتۇستىك-شىعىس ازيانىڭ ۇزدىك وندىعىنا كىردى. بۇدان باسقا, سينگاپۋرلىق SaturdayKids كومپانياسى قازاقستاندىق ستارپتاپ -Intellection جوباسىنا ينۆەستيتسيا سالۋعا كەلىستى.
بۇدان باسقا, قور ۇستىمىزدەگى جىلى «بلوكچەين» تسيفرلى مارافونى» جوباسىن ىسكە اسىرۋدى باستادى. قور بلوكچەين, كريپتوۆاليۋتا, ماينينگ, ICO جانە باسقا دا زامانۋي IT-ترەندتەر بويىنشا تۇسىنىكتەمە جۇمىسىن جۇرگىزۋ ءۇشىن قوعامدىق الاڭ قۇردى. الاڭنىڭ جۇمىسى اياسىنداعى كەزدەسۋلەر قازاقستاننىڭ ءتۇرلى وڭىرلەرىندە FinTechGroup كومپانياسىنىڭ قاتىسۋىمەن وتكىزىلەدى.
عىلىمداعى قابىلەتىن كورسەتكەن جاستاردىڭ قىزمەتىن ىنتالاندىرۋ ءۇشىن جاس قازاقستاندىق عالىمدارعا ارنالعان عىلىمي زەرتتەۋلەرگە گرانت الۋ ماقساتىندا كونكۋرستار, سونداي-اق گۋمانيتارلىق سالاداعى شىعارماشىل جاستاردى قولداۋعا باعىتتالعان بايقاۋلار ۇيىمداستىرىلۋدا.
يننوۆاتسيالاردى دامىتۋ, سونداي-اق ءبىلىمدى, باسەكەگە قابىلەتتى جاس ۇرپاقتى قالىپتاستىرۋ بارىسىندا قازاقستان ءوزىنىڭ دامۋىندا جاڭا دەڭگەيگە كوتەرىلۋىنە مۇمكىندىك الادى.
قانات جۇماباەۆ,
قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورىنىڭ اتقارۋشى ديرەكتورى
حالىق تىلەگىمەن تىكەلەي ۇندەسەدى
ەلباسى ن.نازارباەۆتىڭ باستاماسى بويىنشا قۇرىلعان «ديپلوممەن – اۋىلعا!» جوباسى مەنىڭ بۇگىنگىدەي جەتىستىكە جەتۋىمە ۇلكەن ىقپال ەتتى. ەلدىڭ ەسىندە بولار, مەملەكەت باسشىسى «مەن جاستاردى, ۋنيۆەرسيتەت تۇلەكتەرىن – مۇعالىمدەر مەن دارىگەرلەردى – اۋىلعا بارىپ, ءوز حالقىنا كومەكتەسۋگە شاقىرامىن!», – دەپ ۇندەۋ تاستادى. مىنە سول الىستى بولجاعان, حالىقتىڭ, جاس مامانداردىڭ جاعدايىن جاساۋ ماقساتى كوزدەلگەن باعدارلاما اياسىندا اۋىلعا كەلگەنىمە ەش وكىنبەيمىن. قايتا وسىنداي يگى باستاماسى ءۇشىن ەلباسىعا شەكسىز ريزامىن.
ايتايىن دەگەنىم, ەلباسىنىڭ ءاربىر جولداۋى, ءاربىر باستاماسى قاشاندا وزەكتى ماسەلەلەرگە ارنالاتىنى, حالىقتىڭ تىلەگىمەن تىكەلەي ۇندەسەتىنى ەدى. دەنساۋلىق ساقتاۋ جۇيەسىن ودان ءارى دامىتۋ كوزدەلگەن كۇنى كەشەگى جولداۋدا قازاقستاندىقتاردىڭ ءومىر ءسۇرۋ ساپاسىنىڭ جوعارى دەڭگەيدە بولۋىن قامتاماسىز ەتۋ قاجەتتىگى ايتىلىپ, وعان جەتۋدىڭ ناقتى مىندەتتەرى بەلگىلەندى. اسىرەسە اۋىلدىق جەرلەردە العاشقى مەديتسينالىق-سانيتارلىق كومەكتىڭ قولجەتىمدى بولۋىن قامتاماسىز ەتۋ تاپسىرىلدى. ارينە, بۇل الداعى ۋاقىتتا جۇزەگە اسىرىلاتىن مىندەتتەر ەلىمىزدىڭ بارلىق اۋىل تۇرعىندارىن قۋانتقانى انىق. ءوزىم جۇمىس ىستەپ جۇرگەن شايان دارىگەرلىك – امبۋلاتورياسى 2450 تۇرعىنعا قىزمەت كورسەتەدى. قاجەتتى مەديتسينالىق قوندىرعىلارمەن تولىق قامتاماسىز ەتىلگەن مەكەمەدە اعا-دارىگەرمىن, 4 مەدبيكە, ءبىر اكۋشەر حالىققا قىزمەت كورسەتۋدەمىز. جوعارى وقۋ ورنىن بىتىرگەن سوڭ-اق اۋىلدا جۇمىس ىستەۋدى تاڭداعانمىن. سودان بەرى ون جىلداي ۋاقىت ءوتىپتى, دەنساۋلىق سالاسىنداعى ءاربىر جاڭالىق, وڭ وزگەرىس ماعان جاقسى تانىس. كەلەر جىلى العاشقى مەديتسينالىق-سانيتارلىق كومەك كورسەتەتىن قىزمەتكەرلەردى ىنتالاندىرۋ ءۇشىن اۋرۋلاردى ەمدەۋ ءىسىن باسقارۋدىڭ جاڭا تاسىلدەرىن ەنگىزگەن ۋچاسكەلىك مەديتسينا قىزمەتكەرلەرىنىڭ جالاقىسىن كوبەيتۋ كوزدەلىپ وتىر. بۇل باستاما دا ءبىزدى جىگەرلەندىرىپ, ىزدەنىسكە جەتەلەيدى. وسىناۋ جاڭالىقتاردى ەستىپ, اق حالاتتىلاردىڭ كوڭىلىنە قۋانىش ۇيالاپ جاتقانى راس. ويتكەنى دارىگەرلەر مەن ورتا بۋىن مەديتسينا قىزمەتكەرلەرىنىڭ ەڭبەگى ۇشان-تەڭىز. ولار ۋاقىتپەن ساناسپاي, الدىنا كەلگەن ناۋقاستى تەكسەرۋدەن جالىقپايدى. الداعى ۋاقىتتا مەديتسينا سالاسىنىڭ ودان ءارى دامي تۇسەتىنىنە دە سەنىم مول. مەديتسينالىق قىزمەت ساپاسى ارتسا, حالىقتىڭ الەمەۋتتىك جاعدايى دا جاقسارادى. سونداي-اق «تسيفرلى قازاقستان» باعدارلاماسى اياسىندا دەنساۋلىق ساقتاۋ جۇيەسىنە وزگەرىستەر ەنگىزىلمەك. ونى جەتىلدىرۋ ماقساتىندا مەديتسينا قىزمەتكەرلەرى جۇمىستارىنىڭ ەسەبىن, جوسپارىن قاعاز كۇيىندە ەمەس, ەلەكتروندى نۇسقا تۇرىندە دە تاپسىرا الادى. بۇل ءوز كەزەگىندە دارىگەر كومەگىن قاجەت ەتەتىن جاندارعا ۋاقىتتى كوبىرەك بولۋگە مۇمكىندىك بەرەدى. جانە قىزمەت كورسەتۋدەگى اشىقتىقتى قامتاماسىز ەتەدى.
نارگيزا شاۋرزاەۆا,
شايان دارىگەرلىك-امبۋلاتورياسىنىڭ اعا دارىگەرى
تۇركىستان وبلىسى,
بايدىبەك اۋدانى
اۋىل دا بيزنەستى وركەندەتۋگە اسا قولايلى جەر
مەنىڭ اۋىل شارۋاشىلىعىمەن اينالىسىپ, وسى سالادا ەڭبەك ەتىپ كەلە جاتقانىما 15 جىل ۋاقىت ءوتىپتى. العاشىندا قاراپايىم تەحنيكا, قولدا بار ت ۇلىكپەن باستالعان بۇل ىستە سول كەزدە ارمانداي دا الماعان جەتىستىككە قول جەتكىزدىك. بۇگىندە مالدىڭ ءۇش تۇلىگى بويىنشا اسىل تۇقىمدى مال وسىرۋمەن شۇعىلدانىپ كەلەمىز.
ءدال قازىر شارۋاشىلىعىمدا 1000 باس اسىل تۇقىمدى ءىرى قارا, 1100 باس اسىل تۇقىمدى كوشىم جىلقىسى, 2000 باس ەتتى-ءجۇندى «اقجايىق» تۇقىمدى قوي بار.
ەلباسى جولداۋى قاشان دا دامۋدىڭ جاڭا مۇمكىندىكتەرىنە جول اشادى. ونىڭ ايقىن دالەلى – پرەزيدەنتىمىزدىڭ اۋىل شارۋاشىلىعى ونىمدەرىن دامىتۋعا, ونىمدەردى تەرەڭ وڭدەۋ سالاسىن ودان ءارى دامىتۋعا ەرەكشە كوڭىل ءبولۋى. ودان كەيىن ەكسپورتقا شىعارىلاتىن تاۋارلاردىڭ ءتۇرىن كوبەيتۋ, ەلىمىزدەگى تاۋار وندىرۋشىلەردى, ولاردىڭ ونىمدەرىن قولداۋ ماسەلەلەرى تۋرالى دا ايتىلدى. بۇل ەكونوميكانى جان-جاقتى دامىتۋعا سەپتەسىپ, ءبىز سەكىلدى اۋىل كاسىپكەرلەرىنىڭ مۇمكىندىگىن ۇلعايتا تۇسەرى ءسوزسىز.
مەملەكەت باسشىسىنىڭ ەكسپورتقا باعىتتالعان باسەكەگە قابىلەتتى, ساپالى ءونىم ساتۋ تۋرالى تاپسىرماسىنا ساي جاقىن ارادا تاتارستانعا اسىل تۇقىمدى كوشىم جىلقىلارىن ساتۋعا شىعارماقپىز. وسىنىڭ ءبارى مەملەكەت تاراپىنان بەرىلىپ كەلە جاتقان دەمەۋقارجىنىڭ ارقاسى ەكەنىن دە ايتا كەتكىم كەلەدى.
ءبىز «تسيفرلى قازاقستان» مەملەكەتتىك باعدارلاماسى اياسىندا وبلىستا العاش رەت «ەلەكتروندى باقتاشى» جۇيەسىن, جايىلىمدا مالدىڭ قايدا جۇرگەنىن, ورىستەردىڭ جاعدايىن, شابىندىقتىڭ ساپاسىن باقىلاپ, مونيتورينگ جاساپ وتىرۋعا دروندى قولداندىق. جوسپارىمىز مۇنىمەن شەكتەلمەيدى. مەملەكەت باسشىسىنىڭ جاڭا جولداۋىندا اۋىل شارۋاشىلىعى سالاسىنا جاسالعان مۇمكىندىكتەر ارقىلى بۇدان دا جوعارى كورسەتكىشتەرگە جەتەتىندىگىمىزگە سەنىمدىمىز.
«قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا «اۋىل – ەل بەسىگى» جوباسىن ۇسىنعان ەلباسى اۋىلسىز كەلەشەك جوق ەكەندىگىن سانامىزعا قۇيىپ بەردى. اۋىلدى قادىرلەۋ, اۋىلدى كوركەيتۋ, اۋىلعا تاعزىم ەتۋ – بولاشاققا الاڭداۋ, كەلەشەككە قامقورلىق جاساۋ. بۇل جوبانىڭ مازمۇنى ەلباسىنىڭ بىلتىر جاريالاعان «بولاشاققا باعدار: رۋحاني جاڭعىرۋ» باعدارلامالىق ماقالاسىمەن استاسىپ جاتىر. اۋىلدا ءوسىپ, بيزنەسىمىزدى وركەندەتكەن ءبىز دە ورتاق ىستەن تىس قالا المادىق. بىرقاتار ازاماتتار جينالىپ, التىن بەسىگىمىز – العاباس اۋىلىنا زاماناۋي سپورت الاڭىن سالىپ بەردىك. اۋىلىمىزعا دەگەن قامقورلىق مۇنىمەن توقتالمايدى, ارينە.
ەلباسىنىڭ اۋىلدى ەل بەسىگىنە تەڭەپ وتىرعانى بەكەر ەمەس. بيىلعى جولداۋدا ەڭبەك ونىمدىلىگىن جانە قايتا وڭدەلگەن اۋىل شارۋاشىلىعى ءونىمى ەكسپورتىن كوبەيتۋ, مەملەكەتتىك قولداۋدىڭ بارلىق شارالارى ەلىمىزگە زاماناۋي وزىق تەحنولوگيالاردى اۋقىمدى تۇردە تارتۋعا باعىتتالىپ, سالانى باسقارۋدىڭ ۇزدىك تاجىريبەسىن پايدالانۋ, اۋىل كاسىپكەرلەرىنە شارۋاشىلىق جۇرگىزۋدىڭ جاڭا داعدىلارىن ۇيرەتۋ ءۇشىن جاپپاي وقىتۋ جۇيەسىن قالىپتاستىرۋ سەكىلدى جاڭالىقتار وتە كوپ بولدى. ەلباسىنىڭ ۇكىمەتكە ءۇش جىل ىشىندە وسى ماقساتتارعا جىل سايىن قوسىمشا 100 ملرد تەڭگە قاراستىرۋدى تاپسىرۋى ءبىزدى دە قۋانتادى. ەندى سول العا قويعان مىندەتتەردى مەملەكەتتىك ورگاندارمەن بىرگە جۇزەگە اسىرۋىمىز كەرەك.
ەربولات قۇرمانعاليەۆ,
ء«سابيت» شارۋا قوجالىعىنىڭ جەتەكشىسى
باتىس قازاقستان وبلىسى,
اقجايىق اۋدانى
