فورۋمدا ءسوز العان پرەمەر-مينيستر باقىتجان ساعىنتاەۆ سەربيا مەن قازاقستان اراسىنداعى دوستىق قارىم-قاتىناستىڭ تۇراقتى ەكەنىن ايتا كەلىپ, اگروونەركاسىپتىك كەشەن, حيميا, تۋريزم, مەديتسينا, كولىك, تەلەكوممۋنيكاتسيا سياقتى سالالاردىڭ دامۋ الەۋمەتى جوعارى ەكەنىن جەتكىزدى.
− ەكونوميكالىق الەۋەتى جوعارى سەربيا قازاقستاننىڭ ەۋروپاداعى سەنىمدى سەرىكتەسى. ءبىز سەربيانىڭ باستى حالىقارالىق باستامالارىمىزدى جان-جاقتى قولداۋىن جوعارى باعالايمىز. ساۋدا-ەكونوميكالىق سالاداعى ىنتىماقتاستىقتا نىعايىپ كەلەدى. وتكەن جىلى قازاقستان مەن سەربيا اراسىنداعى تاۋار اينالىمى 59 پروتسەنتكە ءوستى. پرەزيدەنت مىرزامەن ەكىجاقتى كەلىسسوزدەر بارىسىندا بيزنەستەگى قارىم-قاتىناستارىمىزدى بارىنشا جوعارى دەڭگەيگە كوتەرۋگە بولاتىن ءتۇرلى باعىتتاردى تالقىلادىق, – دەدى ب.ساعىنتاەۆ.
ال سەربيا پرەزيدەنتى الەكساندر ۆۋچيچ قازاقستاندىق كاسىپكەرلەردى ءوز ەلىنە ينۆەستيتسيا قۇيۋعا شاقىردى.
− ءبىز ەركىن ساۋدا ايماعى تۋرالى كەلىسىمگە تۇزەتۋ ەنگىزۋ باعىتىندا جۇمىس ىستەپ جاتىرمىز. ارىپتەستەرىمىزدەن قۇس ەتى, ىرىمشىك, تەمەكى جانە وزگە دە تاۋارلاردى قوسا العاندا ەاەو نارىعىندا بىرنەشە تاۋارلىق پوزيتسيادا كەدەنسىز يمپورتتى قامتاماسىز ەتۋدى سۇراپ وتىرمىز. سونىمەن قاتار 5 مىڭ اۆتوموبيل كۆوتاسى جايىندا دا ايتتىق. كەلەشەكتە ىنتىماقتاستىق ءۇشىن ۇلكەن كەڭىستىك تابامىز دەپ ۇمىتتەنەمىز. اۋىل شارۋاشىلىعى سالاسىندا اۋقىمدى باستامالاردى جۇزەگە اسىرۋعا نيەتتىمىز, – دەدى سەربيا پرەزيدەنتى. سونىمەن قاتار مارتەبەلى مەيمان اسكەري-تەحنيكالىق سالادا دا ەكى ەل بىرلەسە جۇمىس ىستەي الاتىندىعىن باسا ايتتى.
− قازاقستاندىق ينۆەستورلاردىڭ ەلىمىزگە كەلگەنىن قالايمىز. سوڭعى ءۇش جىلدا Doing-business تىزىمىندە ءبىرشاما جوعارىلادىق. ءۇش جىل قاتارىنان بىزدە بيۋدجەتتىڭ ارتىلۋى ورىن الۋدا. بيۋدجەتىندە پروفيتسيت بايقالعان ەۋروپالىق ەلدەردىڭ سانى از, – دەدى الەكساندر ۆۋچيچ. سەربيا پرەزيدەنتى قازاقستاندىق كاسىپكەرلەردى تۋريزم, قوناقۇي بيزنەسى سياقتى سالالارعا شاقىردى.
− سىزدەر بارىنشا قولايلى جاعداي مەن مەملەكەتتىك سۋبسيدياعا يە بولاسىزدار. سۋبسيديانى جاڭا جۇمىس ورىندارىنىڭ سانى بويىنشا بەرەمىز, ونى ۇسىنۋدىڭ ءتۇرلى دەڭگەيلەرى مەن تاسىلدەرى بار. بىرلەسكەن كاسىپورىن قۇرۋ ارقىلى ءبىز ۇلكەن نارىقتى باعىندىرا الامىز. ماسەلەن, سىزدەر ءۇشىن باتىسەۋروپالىق, ال ءبىز ءۇشىن ەۋرازيالىق نارىققا شىعۋ مۇمكىندىگى بار, – دەدى سەربيا پرەزيدەنتى الەكساندر ۆۋچيچ.
بيزنەس-فورۋمعا اگروونەركاسىپتىك كەشەن, حيميا, تۋريزم, مەديتسينا, كولىك, تەلەكوممۋنيكاتسيا سەكىلدى سالالارداعى سەربيالىق تاراپتىڭ 100-گە جۋىق بيزنەس وكىلدەرى قاتىستى. سەرب كومپانيالارى اراسىندا Algotech (تەلەكوممۋنيكاتسيا), Chemical Agrosava (حيميا), Akomed (مەديتسينالىق جابدىقتار ءوندىرىسى), ادانكو (توقىما), Meat ING Belgrade (اۋىل شارۋاشىلىعى), ۆەتەرينارلىق مەديتسينا ينستيتۋتى, بەلگراد اۋەجايى سياقتى بيزنەس ورتالىقتارى بار.
شارا بارىسىندا 4 ۆەدومستۆوارالىق مەموراندۋمعا قول قويىلدى. ولار: قازاقستان رەسپۋبليكاسى ينۆەستيتسيالار جانە دامۋ مينيسترلىگى مەن سەربيا رەسپۋبليكاسىنىڭ قۇرىلىس, كولىك جانە ينفراقۇرىلىم مينيسترلىگى اراسىنداعى اۋە تاسىمالى سالاسىنداعى ءوزارا تۇسىنىستىك تۋرالى مەموراندۋم; قازاقستان رەسپۋبليكاسى ينۆەستيتسيالار جانە دامۋ مينيسترلىگى مەن سەربيا رەسپۋبليكاسىنىڭ قۇرىلىس, كولىك جانە ينفراقۇرىلىم مينيسترلىگى اراسىنداعى قۇرىلىس سالاسىنداعى ىنتىماقتاستىق جانە تاجىريبە الماسۋ تۋرالى مەموراندۋم; قازاقستان رەسپۋبليكاسى الەۋمەتتىك دامۋ مينيسترلىگى مەن سەربيا رەسپۋبليكاسىنىڭ جاستار جانە سپورت مينيسترلىگى اراسىنداعى جاستار ساياساتى سالاسىنداعى ءوزارا تۇسىنىستىك تۋرالى مەموراندۋم; قازاقستاننىڭ «ۆەتەرينارلىق مەديتسينا ۇلتتىق انىقتامالىق ورتالىعى» رمك مەن سەربيانىڭ عىلىمي ۆەتەرينارلىق ينستيتۋتى اراسىنداعى ىنتىماقتاستىق تۋرالى مەموراندۋم.
ەركەجان ايتقازى,
«ەگەمەن قازاقستان»
