جولداۋدا وتاندىق ءونىمدى ارتتىرىپ, ەكسپورتقا كوڭىل ءبولۋ تاپسىرىلدى. وتكەن جىلى ەت ەكسپورتى بويىنشا رەسپۋبليكالىق كورسەتكىشتىڭ 40 پروتسەنتىن, ياعني جارتىسىنا جۋىعىن اقجايىق ءوڭىرى اتقارعان. 1300 توننا سيىر ەتى شەتەلگە, اتاپ ايتقاندا رەسەي, ارمەنيا, يران جانە اۋعانستان مەملەكەتتەرىنە شىعارىلدى. قوي ەتىن ەكسپورتتاۋ جوسپارى 2,5 ەسەگە ارتىق ورىندالىپ, 500 تونناعا جۋىق ەت شەتەلگە ساتىلدى.
– ءبىز مۇنىمەن شەكتەلمەيمىز. سەبەبى جاڭا جولداۋ قوسىمشا مۇمكىندىكتەر تۋدىرىپ وتىر. ەلباسىنىڭ تاپسىرماسىنا سايكەس وڭىردەگى يرريگاتسيالىق قۇرىلىمدار جۇيەسىن جاڭارتتىق. 4 ءىرى جوبا جۇزەگە اسىرىلىپ, سۋارمالى جەرلەر 70 مىڭ گەكتارعا كەڭەيدى. وسىنىڭ ناتيجەسىندە مال شارۋاشىلىعىمەن اينالىساتىن قوجالىقتار كوبەيە باستادى. شارۋا قوجالىقتارىنىڭ سانى 2017 جىلى 5 مىڭ بولسا, بيىل 6500-دەن استى, – دەدى وبلىس اكىمى التاي كولگىنوۆ.
ءوڭىر باسشىسى ءوزىنىڭ سوزىندە توقتاپ تۇرعان جوبالارعا ينۆەستور تارتىلىپ, جاڭادان تاعى 10 مىڭ باس مال بورداقىلايتىن الاڭدار سالۋ جوسپارلانعانىن ايتتى. بۇگىندە وڭىردەگى يگەرىلمەي جاتقان 1 ملن گەكتار جەر مەملەكەت مەنشىگىنە قايتارىلىپ, ونىڭ جارتىسى ىسكەر ازاماتتارعا قايتا بەرىلگەن. قولعا الىنعان 12 ينۆەستيتسيالىق جوبانىڭ تەڭ جارىمى شەتەلدىكتەردىڭ قاتىسۋىمەن جۇزەگە اسۋدا. ءبىلىم سالاسىندا وڭىردەگى جەكە بالاباقشالاردىڭ سانى 24-تەن 52-گە كوبەيىپ, 3 جاستان 6 جاسقا دەيىنگى بالالاردى مەكتەپكە دەيىنگى بىلىممەن قامتۋ 100 پروتسەنتتى قۇرادى.
تسيفرلاندىرۋ اياسىندا قالاداعى بالاباقشا كەزەگى تولىقتاي ەلەكتروندى كەزەك جۇيەسىنە كوشىرىلدى. جىل سوڭىنا دەيىن بارلىق اۋدان ورتالىعى وسى جۇيەگە وتەدى.
جالپى, وبلىس اكىمى اكتيۆ الدىندا وڭىردە الدا قولعا الىناتىن جوبالار تۋرالى كەڭىنەن ايتىپ بەردى. وسى جيىندا ءسوز العان «سترويكومبينات» جشس ديرەكتورى باقىتجان نۇرباەۆ 2019 جىلدىڭ قاڭتارىنان باستاپ كومپانيا قىزمەتكەرلەرىنىڭ جالاقىسى وسەتىنىن حابارلادى. وتاندىق وندىرۋشىلەر مەملەكەت قولداۋىن انىق سەزىنىپ وتىر. وڭىردەگى تەمىربەتون رەزەرۆۋارلاردىڭ 90 پروتسەنتىن ءبىزدىڭ كومپانيا شىعارادى. جىلىنا 2 ملرد تەڭگەنىڭ ءونىمىن ءوندىرىپ, ەل قازىناسىنا 200 ملن تەڭگە سالىق ءتۇسىمىن قۇيدىق. وڭىردەگى جول قۇرىلىسىنىڭ دامۋى, مەملەكەتتىك 7 – 20 – 25 باعدارلاماسى ءبىزدىڭ كومپانيانىڭ جۇيەلى تاپسىرىس الىپ, قالىپتى جۇمىس ىستەۋىنە مۇمكىندىك بەرىپ وتىر» دەيدى باقىتجان نۇرباەۆ.
«مەديتسينالىق ورتالىق» جشس ديرەكتورى رافحات يستاەۆ وڭىردەگى مەديتسينا قىزمەتكەرلەرى اتىنان پرەزيدەنت جولداۋىنان تۋىندايتىن ماقسات-مىندەتتەردى جۇزەگە اسىرۋعا دايىن ەكەندىگىن ءبىلدىردى. ۋچاسكەلىك دارىگەرلەر مەن مەدبيكەلەر جالاقىسىنىڭ ءوسۋى, قاعازباستىلىقتان ارىلۋ – دارىگەرلەردىڭ كوپتەن كۇتكەن جاڭالىعى ەدى. سونىمەن بىرگە وڭىردەگى مەديتسينالىق مەكەمەلەر وسى زامانعى ەڭ وزىق قۇرال-جابدىقتارمەن جاراقتانىپ جاتىر. ەندى بۇعان مەديتسينا قىزمەتكەرلەرىنىڭ كاسىبي بىلىكتىلىگى ساي كەلىپ, حالىق دەنساۋلىعى ءۇشىن ايانباي قىزمەت ەتۋى ءتيىس.
ورال قالاسىنداعى №17 ورتا مەكتەپ ديرەكتورى تامارا رۋديچ پرەزيدەنتتىڭ بيىلعى جولداۋى ءبىلىم سالاسى قىزمەتكەرلەرى ءۇشىن قۋانىشتى جاڭالىققا تولى بولعانىن ايتتى.
بۇدان كەيىن مىنبەگە ء«سابيت» شارۋا قوجالىعىنىڭ جەتەكشىسى ەربولات قۇرمانعاليەۆ, جەكە كاسىپكەر سايان باەتوۆ شىعىپ, وزدەرى ارالاسىپ جۇرگەن اۋىل شارۋاشىلىعى سالاسىنداعى ءىس-تاجىريبەسىمەن ءبولىستى. ءسوز الۋشىلاردىڭ ءبارى دە پرەزيدەنتتىڭ جاڭا جولداۋى ەل ەكونوميكاسى مەن الەۋمەتتىك جاعدايىن كوتەرۋگە تىڭ سەرپىن بەرەتىنىن باسا ايتتى. جيىن سوڭىندا وبلىس اكتيۆى جينالىسىنىڭ قارارى قابىلداندى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
