جولداۋ بويىنشا وتكەن ماجىلىستە تۇركىستان وبلىسىنىڭ اكىمى جانسەيىت تۇيمەباەۆ ءتيىستى باسقارمالارعا جوعارىدا ايتىلعان جانە باسقا دا ناقتى تاپسىرمالار جۇكتەدى. مىسالى, وزەكتى ينفراقۇرىلىمدىق ماسەلەلەر ءتىزىمىن جاساپ, جوبالاردى قارجىلاندىرۋ كوزىن قاراستىرۋدى, ال وبلىستىق اۋىل شارۋاشىلىعى باسقارماسىنا ەڭبەك ونىمدىلىگىن جانە قايتا وڭدەلگەن ءونىم ەكسپورتىن كوبەيتۋ بويىنشا ناقتى شارالاردى جۇزەگە اسىرۋدى تاپسىردى. ماجىلىستە نەگىزگى التى باعىتتان تۇراتىن ساياسي قۇجاتتىڭ ءمانى مەن ماعىناسىنا جەكە-جەكە توقتالىپ, ونداعى مىندەتتەردى وڭىردە اتقارىلىپ جاتقان جۇمىستارمەن بايلانىستىرا بايانداعان ج.تۇيمەباەۆ ەلباسى كاسىپكەرلىكتى قولداۋ ماقساتىندا قول قويعان «تۇركىستان» ەركىن ەكونوميكالىق ايماعىن قۇرۋ تۋرالى جارلىقتىڭ وبلىس ەكونوميكاسىنا تىڭ سەرپىلىس اكەلەتىنىن اتاپ ءوتتى.
«ەلباسى ايرىقشا توقتالعان مىندەتتەردىڭ ءبىرى – تۋريزم سالاسىن دامىتۋ. بيىلعى جارتى جىلدىڭ وزىندە تۇركىستانعا 720 مىڭعا جۋىق ادام ساپارلادى. بۇل كورسەتكىش وتكەن جىلمەن سالىستىرعاندا 57,2 پروتسەنتكە ءوستى. جاقىن ارادا وبلىس ورتالىعىنا كەلەتىن ميلليونىنشى ءتۋريستى كۇتەتىن بولامىز. تۇركىستان وبلىسىندا ءتۋريزمدى كەشەندى دامىتۋ ماقساتىندا 2018-2025 جىلدارعا ارنالعان تۋريستىك يندۋستريانى دامىتۋ تۇجىرىمداماسى ازىرلەندى. كەشەندى شارالاردىڭ ناتيجەسىندە وبلىسقا كەلەتىن شەتەلدىك تۋريستەردىڭ سانىن 5 ميلليونعا جەتەدى دەپ كۇتىلۋدە», دەدى ج.تۇيمەباەۆ. سونداي-اق وبلىس اكىمى ينۆەستيتسيا تارتۋدا سىرتتان كۇتپەي, وتاندىق ينۆەستورلاردىڭ مۇمكىندىگىن پايدالانۋ, جەردى ءتيىمدى قولدانۋ قاجەتتىگىن ايتىپ ءوتتى. ەڭبەك ونىمدىلىگى بويىنشا دا ەلباسىنىڭ سىن-ەسكەرتپەلەرىنەن قورىتىندى شىعارۋ, ماقساتتارى ءبىر بولعانىمەن وتكىزۋ مەزگىلدەرى مەن فورماتتارى وزگەشەلەۋ جينالىستاردى ازايتۋ قاجەت. ەلباسى جولداۋىندا ايتىلعان اگروونەركاسىپ كەشەنىنىڭ الەۋەتىن تولىق جۇزەگە اسىرۋ ماسەلەسىنە توقتالعان وبلىس اكىمى ءوڭىر ەكونوميكاسىنىڭ درايۆەرى بولىپ تابىلاتىن اۋىل شارۋاشىلىعىنىڭ جالپى ءونىم كولەمى 250 ملرد تەڭگەگە جەتىپ, وتكەن جىلدىڭ سايكەس كەزەڭىمەن سالىستىرعاندا 103,6% بولعانىن اتاپ ءوتتى. سونىمەن بىرگە ءوڭىردىڭ الداعى دامۋ جوسپارلارىمەن ءبولىستى.
مەملەكەت باسشىسىنىڭ ساياسي قۇجاتىنداعى مىندەتتەردى ناسيحاتتاۋ, جۇزەگە اسىرۋ جولدارىنا قاتىستى قوعام قايراتكەرى ورىنباي راحمانبەرديەۆ, ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ دوتسەنتى, تاريح عىلىمدارىنىڭ دوكتورى تۇرسىن ماحان ۇلى, «بورتە ميلكا» كاسىپورنىنىڭ قۇرىلتايشىسى, وبلىستىق ءماسليحات دەپۋتاتى نۇرالى ابىشەۆ, سايرام اۋداندىق قوعامدىق كەڭەس توراعاسى, ارداگەر ۇستاز امانگەلدى قابىلبەكوۆ, قازاقستان وزبەكتەرى «دۋستليك» قاۋىمداستىعىنىڭ توراعاسى يكرام حاشيمجانوۆ جانە ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ 4-ءىنشى كۋرس ستۋدەنتى, «تۇركىستان ستۋدەنتتەرى اليانسى» قوعامدىق بىرلەستىگىنىڭ مۇشەسى الۋا تۇرسىنحان مىنبەرگە شىعىپ, ءوز ويلارىن ورتاعا سالدى.
اكتيۆ سوڭىندا ج.تۇيمەباەۆ ەلباسى جولداۋىندا اتاپ كورسەتىلگەن ماسەلەلەردى نەگىزگە الا وتىرىپ, ەڭ الدىمەن, ونىڭ ءتيىستى دەڭگەيدە ءتۇسىندىرىلىپ, باق-تا ناسيحاتتالۋىن وبلىستىق ىشكى ساياسات باسقارماسىنا تاپسىردى. ناسيحاتتاۋ شارالارى, سونداي-اق, وبلىستىق ءبىلىم, وتباسى, بالالار جانە جاستار ىستەرى جونىندەگى باسقارمالارى مەن اۋدان, قالا اكىمدىكتەرىنە, «نۇر وتان» پارتياسى وبلىستىق فيليالىنا دا جۇكتەلدى.
عالىمجان ەلشىباي,
«ەگەمەن قازاقستان»
تۇركىستان وبلىسى
