قازاقستان پرەزيدەنتى ەكى ەل اراسىنداعى ءوزارا بايلانىستاردىڭ دوستىق سيپاتىن اتاپ ءوتىپ, ونى ودان ءارى دامىتۋ قاجەتتىگىن ايتتى.
«پرەزيدەنت مىرزا, ءCىز ەكسپو-2017 حالىقارالىق كورمەسىنە ارنايى كەلىپ, بىزگە قولداۋ كورسەتتىڭىز. ال بۇگىن الەمدىك جانە ءداستۇرلى دىندەر كوشباسشىلارىنىڭ VI سەزىنە قاتىسۋ ءۇشىن قازاقستانعا رەسمي ساپارمەن كەلدىڭىز. مۇنىڭ ءبارى ءبىزدىڭ ەلىمىزگە دەگەن ءسىزدىڭ ناعىز دوستىق نيەتىڭىزدى بىلدىرەدى. ءبىز مۇنى جوعارى باعالايمىز», دەدى ن.نازارباەۆ.
مەملەكەت باسشىسى ەكىجاقتى ەكونوميكالىق قاتىناستاردى ىلگەرىلەتۋ مۇمكىندىكتەرىنە ارنايى توقتالىپ, بىرقاتار سالالاردى جانداندىرۋعا مۇمكىندىك مول ەكەنىن جەتكىزدى.
«مەنىڭ سەربياعا ساپارىم بارىسىندا قول جەتكىزىلگەن ۋاعدالاستىقتارعا سايكەس لوگيستيكا, كولىك جانە كوممۋنيكاتسيا, قورعانىس ونەركاسىبى, اۋىل شارۋاشىلىعى, فارماتسەۆتيكا جانە قۇرىلىس سالالارىندا ىنتىماقتاستىعىمىزدى كەڭەيتۋ قاجەت. ءسىزدىڭ بۇگىنگى ساپارىڭىز ءوزارا ىقپالداستىعىمىزدى جاڭا دەڭگەيگە كوتەرۋگە مۇمكىندىك بەرەدى», دەدى ەلباسى.
كەزدەسۋ بارىسىندا نۇرسۇلتان نازارباەۆ قازاقستان رەسپۋبليكاسى مەن سەربيا رەسپۋبليكاسى اراسىندا دوستىق پەن ىنتىماقتاستىقتى جانە بەيبىتشىلىكتى نىعايتۋعا قوسقان ۇلەسى ءۇشىن الەكساندر ءۆۋچيچتى ءى دارەجەلى «دوستىق» وردەنىمەن ماراپاتتادى.
«سەربيا بارلىق حالىقارالىق ماسەلەلەردە ءبىزدى قولداپ كەلەدى. ءبىز دە سەربيا تاراپىنا قولداۋ بىلدىرەمىز. وسىناۋ دوستىق قارىم-قاتىناستاردى ەسكەرە كەلە, ءسىزدى شەتەلدىك ديپلوماتتارعا ارنالعان ەڭ جوعارى ناگرادا – ءبىرىنشى دارەجەلى «دوستىق» وردەنىمەن ماراپاتتاۋ تۋرالى جارلىققا قول قويدىم», دەدى ەلباسى.
ا.ۆۋچيچ ءوز كەزەگىندە ن.نازارباەۆقا قوناقجايلىلىق كورسەتىپ قارسى العانى ءۇشىن جانە حالىقارالىق ارەنادا سەربياعا جان-جاقتى قولداۋ بىلدىرگەنى ءۇشىن ريزاشىلىعىن جەتكىزدى. ەلباسىنىڭ ەكى ەل اراسىنداعى ەكىجاقتى قارىم-قاتىناستى دامىتۋداعى ءرولىن اتاپ كورسەتتى. سونىمەن قاتار قازاقستان پرەزيدەنتىن ەڭ جوعارى مەملەكەتتىك دەڭگەيدەگى ءى دارەجەلى «سەربيا رەسپۋبليكاسىنىڭ وردەنىمەن» ماراپاتتادى. ايتا كەتۋ كەرەك, مۇنداي قۇرمەتكە رەسەي پرەزيدەنتى ۆلاديمير پۋتين مەن قىتاي توراعاسى سي تسزينپين عانا يە بولعان.
ەكىجاقتى كەلىسسوزدەردەن كەيىن مەملەكەتتەر باسشىلارى رەسمي ساپار قورىتىندىسى بويىنشا بۇقارالىق اقپارات قۇرالدارى وكىلدەرى ءۇشىن بريفينگ وتكىزدى.
قازاقستاندىق جانە شەتەلدىك باق وكىلدەرى الدىندا سويلەگەن سوزىندە ەلباسى سەربيا پرەزيدەنتىنە قازاقستانعا العاش رەت رەسمي ساپارمەن كەلگەنى ءۇشىن ريزاشىلىق ءبىلدىرىپ, ەكى ەل اراسىنداعى ىنتىماقتاستىقتىڭ دامۋ قارقىنىن ەرەكشە اتاپ ءوتتى.
ن.نازارباەۆ بۇگىنگى وتكەن كەلىسسوزدەر ناتيجەسىندە قول جەتكىزىلگەن كەلىسىمدەرگە توقتالىپ, ء«بىزدىڭ جوعارى دەڭگەيدەگى كەزدەسۋلەرىمىز تاراپتاردىڭ ءوزارا بايلانىستاردى دامىتۋعا مۇددەلى ەكەندىگىن بىلدىرەدى. ەڭ الدىمەن, بۇل – ساۋدا-ەكونوميكا سالاسىنداعى كووپەراتسيانى ودان ءارى ىلگەرىلەتۋ. ەلدەرىمىزدىڭ ەكونوميكاسى ءبىرىن-ءبىرى تولىقتىرىپ تۇرادى. جەتكىزىلەتىن ونىمدەر تۇرلەرىن كەڭەيتۋگە دايىنبىز», دەدى.
مەملەكەت باسشىسى قازاقستان مەن سەربيا اراسىنداعى قاتىناستاردى ودان ءارى ىلگەرىلەتەتىن باسىم باعىتتاردى دا اتادى.
ء«بىز ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيا الدىنا جاڭا مىندەتتەر قويدىق. جاقىندا بۇل كوميسسيانىڭ ەكىنشى وتىرىسى ءوتتى. وندا باسىم باعىتتار ايقىندالدى. ولار – اۋىل شارۋاشىلىعى, ونەركاسىپ, قۇرىلىس, كولىك, ەنەرگەتيكا جانە باسقا دا سالالار. ءبىز ازيا مەن ەۋروپا اراسىندا جۇك تاسىمالىن جەدەلدەتۋ ءۇشىن ءتيىستى ينفراقۇرىلىم قالىپتاستىرۋعا مۇددەلىمىز», دەدى ەلباسى.
قازاقستان پرەزيدەنتى قازىرگى ۋاقىتتا ەۋرازيالىق ەكونوميكالىق وداق پەن سەربيا اراسىنداعى ەركىن ساۋدا ايماعىن قۇرۋ ءۇشىن ساراپتامالىق كەلىسسوزدەر جالعاسىپ جاتقانىن اتاپ ءوتتى. سونداي-اق كەلىسسوزدەر بارىسىندا وڭىرلىك جانە حالىقارالىق ساياسات ماسەلەلەرى تالقىلانعانىن ايتتى.
سوڭىندا مەملەكەت باسشىسى الەمدىك جانە ءداستۇرلى دىندەر كوشباسشىلارىنىڭ VI سەزىنە قاتىسۋعا شاقىرۋىن قابىل العانى ءۇشىن سەربيا پرەزيدەنتىنە ريزاشىلىق ءبىلدىردى.
ءوز سوزىندە ا.ۆۋچيچ قوناقجايلىلىق كورسەتكەنى ءۇشىن ن.نازارباەۆقا العىس ايتىپ, كەلىسسوزدەردىڭ جەمىستى بولعانىن اتاپ ءوتتى.
«مەنىڭشە, ورتالىق ازيادا استانا سياقتى قارقىندى وزگەرىپ ءارى وركەندەپ كەلە جاتقان قالا جوق. پرەزيدەنت نازارباەۆتىڭ جانە ونىڭ كورەگەندىگىنىڭ, كۇش-جىگەرى مەن ىسكە بەرىلگەندىگىنىڭ ارقاسىندا قازاقستاننىڭ قول جەتكىزگەن جەتىستىكتەرى مەنى تاڭعالدىرادى. سىزدەردىڭ «قازاقستان-2050» ستراتەگياسىندا بەلگىلەگەن ماقساتتارىڭىزعا جەتەتىندەرىڭىزگە كامىل سەنەمىن», دەدى ا.ۆۋچيچ.
سەربيا پرەزيدەنتى ەكى ەل اراسىنداعى ساۋدا-ەكونوميكالىق ىنتىماقتاستىقتىڭ ماڭىزدىلىعىن ايتىپ, ونى ءارى قاراي كۇشەيتۋ ءۇشىن زور الەۋەتتىڭ بار ەكەنىن اتاپ ءوتتى.
«كەلەشەكتە ىنتىماقتاستىعىمىزدى نىعايتا ءتۇسىپ, تاۋار اينالىمىمىزدى ارتتىراتىندىعىمىزعا سەنىمدىمىن. ويتكەنى ەكى ەل اراسىنداعى بايلانىستى نىعايتا تۇسۋگە مول مۇمكىندىك بار. الداعى ۋاقىتتا بەلگرادتا قازاقستان ەلشىلىگىن اشساڭىزدار, قۋانىشتى بولار ەدىك. بۇل – ءبىزدىڭ ۇلكەن ءوتىنىشىمىز», دەدى سەربيا پرەزيدەنتى.
سونىمەن قاتار سەربيا رەسپۋبليكاسىنىڭ پرەزيدەنتى ەكى مەملەكەتتىڭ حالىقارالىق دەڭگەيدە ءبىر-بىرىنە ءوزارا قولداۋ كورسەتۋىن نىعايتۋ قاجەتتىلىگىنە توقتالدى.
ايتا كەتەيىك, سەربيا باسشىسى قازاقستان پرەزيدەنتى ن.نازارباەۆتىڭ شاقىرۋىمەن رەسمي ساپارمەن كەلىپ وتىر. ساپار اياسىندا الەكساندر ءۆۋچيچتىڭ قازاقستان-سەربيا ىسكەرلىك فورۋمىنا, الەمدىك جانە ءداستۇرلى دىندەر كوشباسشىلارىنىڭ VI سەزىنىڭ اشىلۋىنا قاتىسۋى جوسپارلانعان.
اباي اسانكەلدى ۇلى,
«ەگەمەن قازاقستان»
