قازاقستاندىق جوعارى وقۋ ورىندارىندا وقىتۋ ساپاسىنا قويىلاتىن تالاپتار ارتۋدا. وسىعان بايلانىستى ءال-فارابي اتىنداعى قازۇۋ ءبىلىم بەرۋدىڭ جاڭا ساپاسىن قامتاماسىز ەتۋگە ارنالعان «ۋنيۆەرسيتەت 4.0» جاڭا بۋىن ۇلگىسىن ىسكە اسىرۋدا.
ەكونوميكانى جاڭعىرتۋعا جانە 4.0 ونەركاسىبىنە ارنالعان كادرلاردى دايارلاۋعا باعىتتالعان مەملەكەتتىك دامۋ باعدارلامالارى اياسىندا قازۇۋ بيىلعى وقۋ جىلىنان باستاپ تۇپكىلىكتى جاڭا ءبىلىم بەرۋ باعدارلامالارىن ۇسىنۋدا: ەلەكتروندىق كوممەرتسيا, ساندىق لينگۆيستيكا, Big data, جاساندى ينتەللەكت, گەوينفورماتيكا, زاتتار ينتەرنەتى, بيوينفورماتيكا جانە ت.ب. احقو جانە حاماد بين حاليفا ۋنيۆەرسيتەتىمەن (كاتار) بىرلەسە يسلامدىق قارجىلاندىرۋ سالاسى بويىنشا ماگيسترلىك باعدارلاما ىسكە قوسىلدى. «ساندىق قازاقستان» باعدارلاماسىن ىسكە اسىرۋ شەڭبەرىندە قازۇۋ العاش رەت تمد كەڭىستىگىندە ساندىق ۋنيۆەرسيتەت ۇلگىسىن قۇرىپ, وقۋ ورنىنىڭ جۇمىسىن اۆتوماتتاندىرۋعا ارنالعان بۇلتتى تەحنولوگيالار, كامپۋستىق ينفراقۇرىلىمدى باسقارۋداعى اقىلدى تەحنولوگيالار, اناليتيكالىق جۇيەنى قۇرۋ ءۇشىن Big Data تەحنولوگياسىن ەنگىزدى. قازۇۋ باستاماسىمەن قۇرىلعان قازاقستاننىڭ ۇلتتىق اشىق ءبىلىم بەرۋ پلاتفورماسى قازاقستاندىق جوعارى وقۋ ورىندارىنىڭ باسەكەگە قابىلەتتىلىگىن ارتتىرا تۇسۋدە. ءال-فارابي اتىنداعى قازۇۋ قازاقستان مەن تمد-دا العاش بولىپ جاھاندىق عىلىمي جانە ءبىلىم بەرۋ كەڭىستىگىندە باسەكەگە قابىلەتتى عىلىمي توپتاردى قۇرۋعا مۇمكىندىك بەرەتىن پوستدوكتورانتۋرا باعدارلاماسىن اشتى.
مەملەكەت باسشىسىنىڭ يدەياسىن جۇزەگە اسىرۋ ماقساتىندا ۋنيۆەرسيتەتتە حالىقارالىق IT-تەحنوپارك قۇرۋ بويىنشا جۇمىستار جۇرگىزىلۋدە, ونىڭ نەگىزىن قحر-ءدىڭ مەملەكەتتىك گرانتى – جوعارى دەڭگەيدەگى سۋپەركومپيۋتەر قۇرايتىن بولادى. بۇل جوبانىڭ جۇزەگە اسىرىلۋىن جاڭا جىبەك جولى ۋنيۆەرسيتەتتەرى اليانسىنىڭ مۇشەلەرى بولىپ تابىلاتىن الەمنىڭ 130-دان استام جوعارى وقۋ ورنى قولدادى.
ۋنيۆەرسيتەت عىلىمي كەڭەسىنىڭ تالقىلاۋى ناتيجەسىندە جولداۋدى جۇزەگە اسىرۋدىڭ كەشەندى جول كارتاسى قابىلداندى. ول پرەزيدەنتتىك تاپسىرمالاردىڭ ورىندالۋىن, سونىڭ ىشىندە ستۋدەنتتىك قالاشىقتا بارىنشا جايلى ورتا قالىپتاستىرۋدى, رەيتينگتىك ەڭبەكاقى جۇيەسىن جەتىلدىرۋدى, يمپورت الماستىراتىن جوعارى تەحنولوگيالىق ونىمدەردى شىعارۋدى جانە جوعارى تەحنولوگيالىق قىزمەتتەردى ۇسىنۋمەن قاتار وقۋشىلاردىڭ كاسىبي دەڭگەيىن انىقتاۋدى قامتاماسىز ەتەتىن بولادى.
