spitniknews.kz
وتكەن اپتادا تۇركيانىڭ انتاليا قالاسىندا وتكەن 55-ءشى حالىقارالىق كينوفەستيۆالدە الەمدىك كينووندىرىستىڭ ۇزدىكتەرى انىقتالدى. 10 اتالىم بويىنشا ساراپقا تۇسكەن تالانتتار تاعدىرى كاسىبي كينو ماماندارىنىڭ تاڭداۋىمەن انىقتالىپ, جاھانعا جاريا ەتىلدى. قازىلار القاسىنىڭ شەشىمىمەن, رەجيسسەر سەرگەي دۆورتسەۆويدىڭ «ايكا» فيلمىندەگى ءرولى ءۇشىن قازاقستاندىق سامال ەسلياموۆا ۇزدىك اكتريسا اتاندى.
«ايكا» كينوتۋىندىسىندا بالاسىن ومىرگە اكەلە سالىپ, ودان باس تارتقان جاس قىزدىڭ بەينەسىن كەيىپتەدىم. وڭاي بولدى دەمەيمىن. ۇلكەن ىزدەنىستى تالاپ ەتتى. بىراق سونىڭ ناتيجەسىندە كينو ونەرىنە باسقا, بايىپتى كوزقاراسپەن, جاۋاپكەرشىلىكپەن قاراپ ۇيرەندىم. بۇگىنگى جەڭىسىم سول ىزدەنىسىمنىڭ جەمىسى دەپ ويلايمىن», – دەپ تۇسىندىرەدى اكتريسا كانن جانە تۇركيا كينوفەستيۆالدەرىندەگى جەڭىسىنىڭ سىرىن.
ال فيلم رەجيسسەرى سەرگەي دۆورتسەۆوي بولسا, كينوتۋىندىسىنا تاڭداعان اكتريسا, ياعني سامال جونىندە بىلايشا پىكىر بىلدىرەدى: «جالپى, اكتەرگە ءتۋابىتتى تالانتتان بولەك, مىنەز دە كەرەك. سامالدىڭ بويىندا قولعا العان ءىسىن سوڭىنا جەتكىزبەي تىنبايتىن قايسار دا وجەت مىنەز بار. سىرتتاي وتە نازىك كورىنگەنىمەن, ىشكى قۋاتى مىقتى. ول – شىنايى سەزىمنىڭ اكتريساسى».
ايتا كەتەيىك, انتاليا قالاسىن دۋمانعا بولەپ, قازاق قىزىنا تەڭدەسسىز ابىروي سىيلاعان ايتۋلى ونەر بايقاۋىندا, سونداي-اق يراندىق رەجيسسەر دجافار ءپاناحيدىڭ ء«ۇش بەينە» (Three Faces) كارتيناسى «ۇزدىك فيلم» دەپ تانىلسا, جاپون رەجيسسەرى حيروكادزۋ كورەەدا «دۇكەن ۇرىلارى» (Shoplifters) كارتيناسى ءۇشىن «ۇزدىك رەجيسسەر» جۇلدەسىن جەڭىپ الدى. ال ليۆاندىق نادين لاباكيدىڭ «كاپەرناۋم» (Capharnaüm) فيلمىندەگى ىزدەنىسى ءۇشىن زاين ءال-رافەا «جىلدىڭ ۇزدىك اكتەرى» اتاندى. بۇدان وزگە اتالىمداعى جۇلدەلەر دە ساراپشىلار القاسىنىڭ شەشىمىمەن لايىقتى يەلەرىنە سالتاناتتى جاعدايدا تابىس ەتىلدى.
نازەركە جۇماباي,
«ەگەمەن قازاقستان»
