قازاقستان رەسپۋبليكاسى پرەزيدەنتى نۇرسۇلتان نازارباەۆتىڭ حالىققا كەزەكتى جولداۋىنا ەرەكشە دەن قويىپ, مۇقيات تىڭداپ شىقتىق. مازمۇنى ەلىمىزدىڭ الەۋمەتتىك-ەكونوميكالىق دامۋ باعىتىنىڭ وزەكتى ماسەلەلەرىنە ارنالعان بۇل قۇندى قۇجاتتا ۇرپاق تاربيەسى مەن مۇعالىمدەر قاۋىمىنا قاتىستى دا وتە باعالى ويلار مەن تىڭ تۇجىرىمدار ايتىلدى. اتاپ ايتقاندا, ءبىزدى مەملەكەت باسشىسىنىڭ كەلەسى جىلى «پەداگوگ مارتەبەسى تۋرالى» زاڭ قابىلداۋى كەرەكتىگى تۋرالى بايلامى ايرىقشا قۋانتتى.
ەلباسى ءوزىنىڭ سوزىندە اتالعان زاڭنىڭ مۇعالىمدەر مەن مەكتەپكە دەيىنگى مەكەمەلەر قىزمەتكەرلەرىن جەمىستى ەڭبەك ەتۋگە ىنتالاندىراتىن بارلىق تەتىكتەردى قاراستىرۋى ءتيىس ەكەنىن اتاپ كورسەتتى. مۇنىڭ ىقپالىندا وقۋ ورنىنداعى بارلىق جۇكتەمەنى قىسقارتىپ, قىزمەتتەن تىس تەكسەرىستەردەن ارىلتۋ تاپسىرىلدى. سونىڭ ىشىندە مۇعالىمدەردى ەلدى مەكەندەردەگى بارلىق جۇمىستارعا قوعامدىق نەگىزدە تارتا بەرۋدى توقتاتۋ كەرەكتىگى اشىپ ايتىلدى. ءيا, بارلىق جەردە سايلاۋدى وتكىزەتىن, ونىڭ بارلىق قيىندىقتارىن كوتەرىپ, ۇگىت-ناسيحات ناۋقانىن جۇرگىزۋشى بولىپ تابىلاتىن مۇعالىمدەر ەكەنى دە راس.
پرەزيدەنت ءوز سوزىندە ەندى سالاداعى بىلىكتىلىك تالاپتارى, وقىتۋ ءادىسناماسى, تاربيەشىلەر مەن بالاباقشاداعى وزگە دە قىزمەتكەرلەردىڭ ەڭبەگىن تولەۋ جۇيەسى قايتا قارالاتىنىن العا تارتتى. سونداي-اق جولداۋ جولدارىنان ءبىز بيىل ءبىلىم جانە عىلىم مينيسترلىگىنىڭ اكىمدىكتەرمەن بىرلەسە وتىرىپ, ءتيىستى جول كارتاسىن ازىرلەيتىنىن دە بىلدىك. مۇنىڭ ءبارى وسكەلەڭ ۇرپاقتىڭ ءبىلىمى مەن تاربيەسىن جاقسارتا تۇسۋگە باعىتتالعان ناقتى قادامداردىڭ ءبىرى ەكەنى انىق.
جولداۋ ارقىلى ءبىز, سونداي-اق رەسپۋبليكادا نازارباەۆ ۋنيۆەرسيتەت سەكىلدى تاعى ءبىر ىرگەلى جوعارى وقۋ ورنى اشىلعالى جاتقانىنان حاباردار بولدىق.
نۇرسۇلتان نازارباەۆ سونىمەن بىرگە جوعارى وقۋ ورىندارىندا كەزدەسىپ قالاتىن سىبايلاس جەمقورلىق دەرەكتەرى جونىندە ايتىپ ءوتتى. پرەزيدەنتتىڭ ايتۋىنشا, تەك نارىققا توتەپ بەرە الاتىن جوعارى وقۋ ورىندارى عانا قالۋى كەرەك. ولاردىڭ اراسىنداعى باسەكە تازا كاسىبي بىلىكتىلىك تۇرعىسىندا ءجۇرۋى ءتيىس. «جاھاندىق ۋنيۆەرسيتەتتەرمەن ىنتىماقتاستىقتى جالعاستىرىپ, نازارباەۆ ۋنيۆەرسيتەتتىڭ تاجىريبەسى بويىنشا الەمنىڭ ۇزدىك توپ-مەنەدجەرلەرىن تارتۋ كەرەك», – دەدى ەلباسى.
پرەزيدەنت جولداۋدا ۇكىمەتكە ءبىلىم مەن عىلىمعا قارجىلاندىرۋدى ارتتىرۋدى دا جۇكتەدى. بىزدە قازىر عىلىمنىڭ اقساپ تۇرعانى راس. مۇنى ەلباسى ءدوپ باسىپ ايتتى. ال الەمدەگى دامىعان ەلدەردىڭ كوشىنەن قالماي ءجۇرۋ ءۇشىن ەڭ الدىمەن عىلىمدى دامىتۋعا تۋرا كەلەدى. دامۋ قاشاندا عىلىمعا بايلانىستى. «بەس جىلدىڭ بارىسىندا بىلىمگە, عىلىمعا جانە دەنساۋلىق ساقتاۋعا ارنالعان شىعىستاردى بارلىق كوزدەردەن ەلدىڭ ىشكى جالپى ءونىمىنىڭ 10 پروتسەنتكە دەيىن جەتكىزۋ كەرەك» دەگەن تۇجىرىمدى مەملەكەت باسشىسى سوندىقتان دا العا تارتتى.
قورىتا ايتقاندا, پرەزيدەنت ءوزىنىڭ جولداۋىندا دامۋدىڭ تەتىگى دە, نەگىزى دە عىلىمدا, ءبىلىمدى ۇرپاقتا جاتقانىن تايعا تاڭبا باسقانداي ەتىپ ايتىپ بەردى.
جاڭاگۇل سۇلتانوۆا,
قازاق مەملەكەتتىك قىزدار پەداگوگيكالىق ۋنيۆەرسيتەتى دەپارتامەنتىنىڭ ديرەكتورى,
PhD دوكتور
