قازاقستانداعى وزبەكستان جىلى اياسىندا جامبىل وبلىسى اكىمدىگىنىڭ جانە "اسىل ديزاين" ءسان ءۇيىنىڭ ۇيىمداستىرۋىمەن "اراي پلازا" كەشەنىندە وتكەن سالتاناتتى شاراعا قازاقستان رەسپۋبليكاسىنىڭ مەملەكەتتىك حاتشىسى, قازاقستان رەسپۋبليكاسى ايەلدەر ىستەرى جانە وتباسىلىق دەموگرافيالىق ساياسات جونىندەگى كوميسسيانىڭ ءتورايىمى گۇلشارا ابدىحالىقوۆا ارنايى كەلىپ قاتىستى. گۇلشارا ناۋشاقىزى الەمنىڭ 19 مەملەكەتىنەن كەلگەن قوناقتاردى سالتاناتتى شارانىڭ اشىلۋىمەن قۇتتىقتاپ, جۇمىستارىنا ساتتىلىك تىلەدى.
بۇدان كەيىن وزبەكستان رەسپۋبليكاسى ايەلدەر ىستەرى جونىندەگى كوميسسيا ءتورايىمىنىڭ ورىنباسارى مۋكرام نۇرماتوۆا تارازدىقتارعا وزبەك حالقىنىڭ ىستىق سالەمىن جەتكىزدى. قازاق ەلىندە ءوتىپ جاتقان ءسان اپتالىعىنىڭ ماڭىزدىلىعىنا توقتالدى. ال ءوز سوزىندە جامبىل وبلىسىنىڭ اكىمى اسقار مىرزاحمەتوۆ ەجەلدەن تاراز تاريحي قالا ەكەنىن, وسىنداي باي مادەنيەتىمىزدى تاماشالاۋعا كەلگەن شەتەلدىك ازاماتتارعا العىس ءبىلدىردى.
بۇدان كەيىن جۋىردا عانا يتاليا مەملەكەتىنىڭ ميلان قالاسىندا ونەر كورسەتىپ كەلگەن جەرگىلىكتى ديزاينەر ايدارحان قاليەۆتىڭ "تاراز پەرىشتەلەرى" ءسان ۇلگىلەرى كورسەتىلدى. يتاليا, فرانتسيا, وزبەكستان سياقتى كوپتەگەن مەملەكەتتەن كەلگەن سانگەرلەر بۇل قويىلىمدى قىزىعا تاماشالادى. جالپى, تاراز قالاسىندا العاش رەت باستاۋ العان ءسان اپتالىعى ءبىر اپتا بويى كونە شاھاردا جالعاساتىن بولادى. جامبىل وبلىستىق تۋريزم باسقارماسىنىڭ باسشىسى قارلىعاش ارالبەكوۆانىڭ ايتۋىنشا, وسى ۋاقىت ارالىعىندا شەتەلدىك قوناقتار اۋليەاتا ءوڭىرىنىڭ تاريحي جەرلەرىنە ساياحات جاسايدى. سونىمەن قاتار, ۇلتىمىزدىڭ ۇلتتىق تاعامدارىن شەتەلدىكتەرگە ناسيحاتتاۋ ماقساتىندا ء"دامدى, "Taraz - food tourism - 2018" ۇلتتىق تاعامدار كورمەسى وتكىزىلەتىن بولادى. "رۋحاني جاڭعىرۋ" باعدارلاماسى اياسىندا ۇيىمداستىرىلىپ وتىرعان شارادا جەرگىلىكتى اسپازدار كەلۋشىلەرگە ءتۇرلى تاعام تۇرلەرىن ۇسىنىپ, قازاقتىڭ سالت-داستۇرىمەن تانىستىرادى.
بايقاۋعا تاعام ءتۋريزمى سالاسىندا ەڭبەك ەتىپ جۇرگەن 100-گە جۋىق شەت ەلدىك جانە 300-گە جۋىق قازاقستاندىق تۋريست كەلەدى دەپ كۇتىلۋدە. سونداي-اق, "كونە تاراز" تاريحي-مادەني كەشەنىندە تاعام ءتۋريزمىن تانىتۋ تاقىرىبىندا سەمينار كەڭەستەر, شەبەرلىك ساباقتارى ۇيىمداستىرىلادى. جانە ءبىر اپتا بويى شەتەلدىك ديزاينەرلەر وزدەرىنىڭ ۇزدىك ءسان ۇلگىلەرىن كورسەتەدى.
حاميت ەسامان,
"ەگەمەن قازاقستان"
جامبىل وبلىسى
