سەنات كوميتەتىنىڭ توراعاسى بىرعانىم ءايتىموۆا عىلىمي ناتيجەلەردى كوممەرتسيالاندىرۋ عىلىمي قامتىلعان ەكونوميكانى قالىپتاستىرۋعا, عىلىمي زەرتتەۋلەر ناتيجەلەرىن وندىرىسكە ەنگىزۋگە جانە يننوۆاتسيالىق ونىمدەر وندىرۋگە ىقپال ەتەتىنىنە قاتىسۋشىلاردىڭ نازارىن اۋداردى. «عىلىمي ناتيجەلەردى كوممەرتسيالاندىرۋ, ولاردى ەكونوميكالىق اينالىمعا تارتۋ اسا ماڭىزدى ماسەلە. ءبىزدىڭ باستى ماقساتىمىز – عىلىم جانە عىلىمي-تەحنيكالىق قىزمەت ناتيجەلەرىن كوممەرتسيالاندىرۋدىڭ زاڭنامالىق تۇرعىدا قارقىندى دامۋىنا بارلىق جاعدايدى جاساۋ», - دەپ اتاپ ءوتتى سەناتور.
دوڭگەلەك ۇستەل وتىرىسىنا سەنات دەپۋتاتتارى, مەملەكەتتىك باسقارۋ ورگاندارىنىڭ, عىلىمي-زەرتتەۋ ينستيتۋتتارىنىڭ, عىلىمي ۇيىمدار مەن جوعارى وقۋ ورىندارىنىڭ, «نۇر وتان» پارتياسىنىڭ, «اتامەكەن» ۇلتتىق كاسىپكەرلەر پالاتاسىنىڭ باسشىلارى مەن وكىلدەرى, عالىمدار مەن جەتەكشى ماماندار قاتىستى.
باسقوسۋدا عىلىمدى دامىتۋ جانە ونىڭ ناتيجەلەرىن كوممەرتسيالاندىرۋ جونىندەگى اۋقىمدى ماسەلەلەر بويىنشا پىكىرسايىستار بولدى.
دوڭگەلەك ۇستەل قورىتىندىسى بويىنشا پارلامەنت سەناتىنىڭ دەپۋتاتى, اكادەميك باقىتجان جۇماعۇلوۆ ءسوز سويلەدى.
ول قازاقستاننىڭ عىلىمي جانە عىلىمي-يننوۆاتسيالىق سالاسى بۇگىنگى كۇنى عانا ەمەس, سونداي-اق بولاشاقتا دا ماڭىزى زور قۇندى ناتيجەلەرگە قول جەتكىزەتىنىن اتاپ ءوتتى. اتاپ ايتقاندا, اۋىل شارۋاشىلىعىندا بەلسەندى يننوۆاتسيالىق ءۇردىس دامىپ كەلەدى. «بايسەركە-اگرو» حولدينگى بۇگىندە جەتەكشى كاسىپورىندار قاتارىنان ورىن الدى, ولار بىرقاتار باعىتتار بويىنشا رەكوردتىق كورسەتكىشتەرگە قول جەتكىزدى. اسا ماڭىزدى مىندەتتەردىڭ قاتارىندا - فەرمەرلەردىڭ, اۋىل شارۋاشىلىعى عىلىمى مەن بيزنەس اراسىنداعى كەدەرگىلەردى جويۋ, مەملەكەتتىك ءتيىمدى قولداۋ, ساندىق تەحنولوگيالاردى ەنگىزۋ بار. كەن-مەتاللۋرگيا جانە مۇناي-گاز سەكتورلارىندا كەلەشەگى زور جەتىستىكتەر بار. عىلىمي جەتىستىكتەردى كوممەرتسيالاندىرۋ ءۇردىسى باستالدى. عىلىمي جەتىستىكتەردى بيزنەسپەن بىرلەسىپ قارجىلاندىرۋدى ەنگىزۋ نەگىزگى قادام بولىپ وتىر. عىلىمدى ستراتەگيالىق باسقارۋدا ىلگەرىلەۋ بار. عىلىم تۋرالى ۇلتتىق باياندامادا الەمدىك عىلىمي ۇردىستەردى تالداۋ ماڭىزدى دەڭگەيگە كوتەرىلدى. عىلىم قورى ءبىزدىڭ ەلىمىز ءۇشىن عىلىم مەن تەحنيكانىڭ دامۋىنداعى قازىرگى ۇردىستەر تۋرالى زەرتتەۋلەردى جۇيەلى تۇردە جۇرگىزە باستادى.
ب.جۇماعۇلوۆ سونداي-اق وسى سالاداعى بىرقاتار ماسەلەلەردى ايقىندادى, ولاردىڭ ءبىرى - بيزنەستىڭ عىلىمعا جانە تەحنولوگيالىق جەتىستىكتەرگە جۇيەلى سۇرانىسىنىڭ جوقتىعى.
سەناتور ەلباسى ن.نازارباەۆتىڭ جولداۋىندا «ناقتى سەكتوردىڭ جاڭا تەحنولوگيالارعا سۇرانىسىن ىنتالاندىرۋ» مىندەتى قويىلعانىن اتاپ ءوتتى. ونى شەشۋ ءۇشىن بىرقاتار مينيسترلىكتەردىڭ, ۇكىمەت پەن پارلامەنتتىڭ كۇش-جىگەرىن بىرىكتىرىپ, زاڭ شىعارۋ سالاسىندا اۋقىمدى جۇمىستاردى جۇزەگە اسىرۋ قاجەت. ويلاسقان تۇجىرىمدامالار, زاڭ جوبالارى جۇمىستارىن ستراتەگيالىق جوسپارلاۋ, ولاردىڭ جۇيەلى جانە كەلىسىلگەن ارەكەتتەرى ءبىرىنشى كەزەككە شىعاتىن بولادى.
دوڭگەلەك ۇستەلدىڭ قورىتىندىسى بويىنشا ناقتى ۇسىنىستار جاسالدى. سەناتورلار قارجى مينيسترلىگى ءبىلىم جانە عىلىم مينيسترلىگىمەن بىرلەسە وتىرىپ, عىلىمدى قارجىلاندىرۋدى جالپى ىشكى ءونىمنىڭ 1 پايىزى دەڭگەيىنە جەتكىزۋ, جىل سايىن جاس عالىمدار ءۇشىن عىلىمي زەرتتەۋلەرگە گرانتتىق قارجىلاندىرۋ; سالىق كودەكسىنە وزگەرتۋلەر ەنگىزۋ ارقىلى عىلىمي-زەرتتەۋ جۇمىستارىن قوسىلعان قۇن سالىعىنان بوساتۋ جونىندە شارالار قابىلداۋ قاجەت دەپ سانايدى.
ءبىلىم جانە عىلىم مينيسترلىگىنە عىلىمي جانە عىلىمي-تەحنيكالىق قىزمەت ناتيجەلەرىن كوممەرتسيالاندىرۋعا مەملەكەتتىك قولداۋدى ۇلعايتۋ; قولدانبالى عىلىمي زەرتتەۋلەردىڭ كەزەڭ-كەزەڭىمەن اعىلشىن تىلىنە كوشۋىن جۇزەگە اسىرۋ بويىنشا شارالار قابىلداۋ; قولدانىستاعى نورماتيۆتىك-قۇقىقتىق اكتىلەرگە وزگەرتۋلەر ەنگىزۋ ارقىلى قولدانبالى زەرتتەۋلەر مەن جاڭالىقتار ءۇشىن جەكە سەكتوردان قوسىمشا قارجىلاندىرۋدى قامتاماسىز ەتۋ تەتىگىن ازىرلەۋ جانە تاعى باسقا مۇمكىندىكتەردى قاراستىرۋ ۇسىنىلدى.
دوڭگەلەك ۇستەل اياسىندا «عىلىم-بيزنەس-ءوندىرىس» كورمەسى وتكىزىلدى.
